Muⱪeddes Kalam (yǝngi yeziⱪ)

Zǝbur 33

33-küy •••• Pǝrwǝrdigarning meⱨribanliⱪi jaⱨanƣa tolƣan

Əy ⱨǝⱪⱪaniylar, Pǝrwǝrdigar üqün tǝntǝnǝ ⱪilinglar!

Mǝdⱨiyilǝx duruslar üqün güzǝl ixtur. 1

Rawab bilǝn Pǝrwǝrdigarni mǝdⱨiyilǝnglar;

Ontarƣa tǝngkǝx bolup, Uningƣa küylǝrni eytinglar. 2

Uningƣa atap yengi bir munajat-nahxini eytinglar;

Maⱨirliⱪ bilǝn qelip, awazinglarni yuⱪiri yangritinglar. 3

Qünki Pǝrwǝrdigarning sɵzi bǝrⱨǝⱪtur;

Uning barliⱪ ixliri wǝdilirigǝ sadaⱪǝtliktur.

U ⱨǝⱪⱪaniyǝt ⱨǝm adalǝtni yahxi kɵrgüqidur;

Yǝr-zemin Pǝrwǝrdigarning meⱨribanliⱪi bilǝn tolƣandur. 4

Pǝrwǝrdigarning sɵzi bilǝn asmanlar yaritilƣan,

Uning aƣzidiki nǝpǝs bilǝn ularning barliⱪ ⱪoxunlirimu yaritilƣandur; 5 6

U dengizdiki sularni bir yǝrgǝ yiƣip dɵwilǝydu;

U okyanlarni ambarlar iqidǝ saⱪlap turidu; 7

Pütkül yǝr yüzidikilǝr Pǝrwǝrdigardin ǝymǝnsun;

Dunyadiki pütün jan igiliri Uningdin ⱪorⱪup, ⱨɵrmǝtlisun;

Qünki Uning bir sɵzi bilǝnla ix püttürülgǝnidi;

Uning bir ǝmri bilǝnla degǝnliri bǝrpa ⱪilinƣanidi.

Pǝrwǝrdigar ǝllǝrning pilanini tosuwetidu;

U ⱪowmlarning hiyallirini bikar ⱪiliwetidu. 8

Pǝrwǝrdigarning nǝsiⱨǝti mǝnggügǝ turidu;

Ⱪǝlbidiki oyliri dǝwrdin-dǝwrgǝ ixⱪa axurulidu. 9

«Pǝrwǝrdigar bizning Hudayimizdur» dǝydiƣan ⱪowm bǝhtliktur!

Yǝni Ɵz mirasi boluxⱪa talliƣan hǝlⱪ bǝhtliktur! 10

Pǝrwǝrdigar ǝrxtin yǝrgǝ nǝzǝr salidu,

U pütkül insanlarni kɵrüp turidu.

Turalƣusidin yǝr yüzidikilǝrning ⱨǝmmisigǝ ⱪaraydu;

U ularning ⱨǝrbirining ⱪǝlblirini Yasiƣuqidur;

Ularning barliⱪ ixlirini dǝngsǝp qiⱪⱪuqidur.

Padixaⱨ bolsa ⱪoxunlirining kɵplüki bilǝn ƣalib bolalmaydu;

Palwan ɵzining zor küqi bilǝn ɵzini ⱪutⱪuzalmaydu;

Tulparƣa tayinip hǝwp-hǝtǝrdin ⱪutⱪuzulux biⱨudiliktur,

U zor küqi bilǝn ⱨeqkimni ⱪutⱪuzalmaydu;

Mana, ularning jenini ɵlümdin ⱪutⱪuzux üqün,

Ⱪǝⱨǝtqiliktǝ ularni ⱨayat saⱪlax üqün,

Pǝrwǝrdigarning kɵzi Ɵzidin ǝyminidiƣanlarning üstidǝ turidu,

Ɵzining ɵzgǝrmǝs muⱨǝbbitigǝ ümid baƣliƣanlarning üstidǝ turidu. 11

Bizning jenimiz Pǝrwǝrdigarƣa tǝlmüridu;

Bizning yardǝmqimiz,

Bizning ⱪalⱪinimiz U bolidu.

Xunga Uning bilǝn ⱪǝlbimiz xadlinip ketidu;

Qünki Uning muⱪǝddǝs namiƣa tayinip ixǝnduⱪ.

I Pǝrwǝrdigar, biz Sangila ümid baƣliƣinimizdǝk,

Sening ɵzgǝrmǝs muⱨǝbbitingmu üstimizdǝ bolƣay!

Source notes (11)

Cross-reference ◘ Zǝb. 92:1; 135:3; 147:1
Footnote ◼ «Rawab bilǝn Pǝrwǝrdigarni mǝdⱨiyilǝnglar» — «rawab» bu ayǝttǝ ⱨǝm Zǝburdiki baxⱪa ayǝtlǝrdǝ ixlitilgǝndǝ, «rawab» degǝn sɵz rawabⱪa ohxap ketidiƣan bir sazni kɵrsitidu. «Ontarƣa tǝngkǝx bolup, uningƣa küylǝrni eytinglar» — «ontar» on tarliⱪ qiltardǝk bir saz.
Cross-reference ◘ Zǝb. 40:3; 96:1; 98:1; 144:9; Yǝx. 42:10; Wǝⱨ. 5:9; 14:3
Cross-reference ◘ Zǝb. 45:7; 119:64; Ibr. 1:9
Footnote ◼ «ularning (asmanlarning) barliⱪ ⱪoxunliri» — bir tǝrǝptin ⱪuyax, ay, yultuzlarni kɵrsǝtsǝ, yǝnǝ bir tǝrǝptin barliⱪ pǝrixtilǝrni kɵrsitidu.
Cross-reference ◘ Yar. 1:6, 7
Footnote ◼ «U dengizdiki sularni bir yǝrgǝ yiƣip dɵwilǝydu» — baxⱪa birhil tǝrjimisi: «U dengizdiki sularni küplǝrgǝ yiƣidu». «U okyanlarni ambarlar iqidǝ saⱪlap turidu» — bu ayǝtning mǝnisi sirliⱪ bolƣini bilǝn, Hudaning sularni toluⱪ idarǝ ⱪilidiƣanliⱪini kɵrsǝtkǝnlikidin ⱨeqⱪandaⱪ xübⱨǝ yoⱪ.
Cross-reference ◘ Yǝx. 19:3
Cross-reference ◘ Pǝnd. 19:21; 21:30; Yǝx. 46:10
Cross-reference ◘ Zǝb. 65:4; 144:15
Cross-reference ◘ Ayup 36:7; Zǝb. 34:15; 1Pet. 3:12

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.