Muⱪeddes Kalam (yǝngi yeziⱪ)
Zǝbur 27
27-küy •••• Hudani kütkin!
Dawut yazƣan küy: —
Pǝrwǝrdigar mening nurum wǝ nijatliⱪimdur;
Mǝn yǝnǝ kimdin ⱪorⱪay?
Pǝrwǝrdigar ⱨayatimning ⱪorƣinidur;
Mǝn kimning aldida titrǝy? 1
Yamanliⱪ ⱪilƣuqilar «Uning ǝtlirini yǝyli» dǝp manga ⱨujum ⱪilƣanda,
Rǝⱪiblirim, düxmǝnlirim manga yeⱪinlaxⱪanda,
Putlixip, yiⱪildi ular.
Zor ⱪoxun bargaⱨ ⱪurup meni ⱪorxawƣa alsimu,
Ⱪǝlbimdǝ ⱨeq ⱪorⱪunq yoⱪ;
Manga urux ⱪozƣisimu, yǝnila hatirjǝm turuwerimǝn.
Pǝrwǝrdigardin birla nǝrsini tilǝp kǝldim;
Mǝn xuningƣa intilimǝktimǝnki: —
Ɵmür boyi Pǝrwǝrdigarning ɵyidǝ bolsam,
Pǝrwǝrdigarning güzǝllikigǝ ⱪarap yürsǝm,
Uning ibadǝthanisida turup, yetǝklixigǝ muyǝssǝr bolsam, dǝymǝn. 2
Beximƣa kün qüxkǝndǝ, U meni sayiwini astiƣa alidu;
Meni qedirining iqidǝ aman saⱪlap yoxuruwalidu.
U meni uyultax üstigǝ muⱪim turƣuzidu.
Xunga ⱨazir ǝtrapimdiki düxmǝnlirim aldida bexim yuⱪiri kɵtürülidu.
Uning muⱪǝddǝs qedirida tǝntǝnǝ ⱪilip ⱪurbanliⱪlar sunimǝn;
Nahxa-küylǝr eytimǝn, munajatlarni eytimǝn Pǝrwǝrdigarƣa!
Nida ⱪilƣinimda awazimni angliƣaysǝn, i Pǝrwǝrdigar;
Manga meⱨir-xǝpⱪǝt kɵrsitip, ijabǝt ⱪilƣaysǝn.
Ɵz kɵnglüm: «Uning didarini izdǝnglar!» dǝydu;
Didaringni, i Pǝrwǝrdigar, ɵzüm izdǝymǝn.
Mǝndin Ɵzüngni ⱪaqurmiƣaysǝn!
Ƣǝzǝplǝngǝndǝ ⱪulungni neri ⱪoƣlimiƣaysǝn;
Sǝn meningdin yardimingni ayimay kǝlding;
Sǝn mǝndin ayrilmiƣaysǝn, meni taxliwǝtmigǝysǝn, i Nijatkarim Huda! 3
Ata-anam meni taxliwǝtsimu,
Pǝrwǝrdigar meni ⱪuqiⱪiƣa alidu. 4
Manga Ɵz yolungni ɵgǝtkǝysǝn, i Pǝrwǝrdigar;
Küxǝndilirim paylap yürmǝktǝ,
Meni tüz yolƣa baxliƣaysǝn. 5
Meni rǝⱪiblirimning mǝyligǝ tapxurmiƣaysǝn,
Qünki manga ⱪara qaplaxmaⱪqi bolƣan yalƣanqilar heli kɵptur,
Ularning nǝpǝslirimu zorawanliⱪtur.
Aⱨ, Pǝrwǝrdigarning meⱨribanliⱪini tiriklǝrning zeminida kɵrüxkǝ kɵzüm yǝtmigǝn bolsa...!
Pǝrwǝrdigarni tǝlmürüp kütkin!
Jigǝrlik bol, ⱪǝlbing mǝrdanǝ bolsun!
Xundaⱪ ⱪil, Pǝrwǝrdigarni tǝlmürüp kütkin! 6
Source notes (6)
- Cross-reference ◘ Yǝx. 10:17; 60:19,20; Mik. 7:8; Luⱪa 1:79; Yuⱨ. 1:4; 8:12; Wǝⱨ. 21:23
- Footnote ◼ «... Ɵmür boyi Pǝrwǝrdigarning ɵyidǝ bolsam, ... Uning ibadǝthanisida turup, yetǝklixigǝ muyǝssǝr bolsam» — Dawut pǝyƣǝmbǝrning zamanida «Hudaning ɵyi», yǝni «muⱪǝddǝs ibadǝthana» tehi selinmiƣanidi (oƣli Sulayman keyin yasidi). Ibadǝthana Musa pǝyƣǝmbǝr arⱪiliⱪ yasalƣan «muⱪǝddǝs qedir» idi. Xuning bilǝn Dawutning «muⱪǝddǝs ibadǝthana» degini bǝlkim roⱨiy jǝⱨǝttin, yǝni Hudaning Ɵz ⱨuzur-dǝrgaⱨini kɵrsitidu, dǝp qüxiniximiz kerǝk.
- Footnote ◼ «Mǝndin Ɵzüngni ⱪaqurmiƣaysǝn!» — ibraniy tilida «Yüzüngni mǝndin yoxurmiƣaysǝn!».
- Footnote ◼ «Ata-anam meni taxliwǝtsimu,...» — Dawut Saul padixaⱨ tǝripidin ⱪoƣlanƣan. Saul uni «jinayǝtqi» dǝp ⱨesabliƣan qaƣlirida, Dawut ata-anisi tǝripidin bir mǝzgil qǝtkǝ ⱪeⱪilƣan boluxi mumkin idi. Keyin ular uning bilǝn billǝ boldi. Tǝwrat «1Sam.» 21-, -22-babni kɵrüng.
- Cross-reference ◘ Zǝb. 25:4-5, 9, 12; 86:11; Zǝb. 119.
- Cross-reference ◘ Yǝx. 25:9; 33:2; Ⱨab. 2:3
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.