Muqeddes Kalam (latin yéziq)
Zebur 32
32-küy •••• Gunahni étirap qilip, Xudadin kechürüm sorash; •••• Xuda jawaben bésharet béridu
Dawut yazghan «Masqil»: —
Itaetsizlikliri kechürüm qilin’ghan,
Gunahliri yépilghan kishi bextliktur! 1 2
Perwerdigar rezillikliri bilen hésablashmaydighan,
Rohida héchqandaq hiylilik yoq kishi bextliktur!
Men gunahimni iqrar qilmay, sükütte turuwalghanidim,
Kün boyi ahu-pighan ichide,
Söngeklirim chirip ketti;
Chünki méni basqan qolung manga kéche-kündüz éghir boldi;
Yazdiki qurghaqchiliqtek yilikim qaghjirap ketti.
Sélah! 3
Emdi gunahimni Séning aldingda étirap qildim,
Qebihlikimni Sendin yoshuruwermeydighan boldum;
Men: «Perwerdigargha asiyliqlirimni étirap qilimen» — dédim,
Shuning bilen Sen méning rezil gunahimni kechürüm qilding.
Sélah! 4
Shunga Séni tapalaydighan peytte,
Herbir ixlasmen Sanga dua bilen iltija qilsun!
Chong topanlar örlep, téship ketkende,
Sular shu kishige hergiz yéqinlashmaydu. 5
Sen méning dalda jayimdursen;
Sen méni zulumdin saqlaysen;
Etrapimni nijatliq naxshiliri bilen qaplaysen!
Sélah. 6
— «Men sen méngishqa tégishlik yolda séni yétekleymen hem terbiyleymen;
Méning közüm üstüngde bolushi bilen sanga nesihet qilimen. 7
Eqli yoq bolghan at yaki éshektek bolma;
Ularni chekleshke tizginleydighan yügen bolmisa,
Ular hergiz sanga yéqin kelmeydu». 8
Rezillerge chüshüdighan qayghu-hesretler köptur,
Biraq méhir-shepqetler Perwerdigargha tayan’ghan kishini chörideydu;
I heqqaniylar, Perwerdigar bilen shadlinip xursen bolunglar;
Köngli duruslar, xushalliqtin tentene qilinglar!
Source notes (8)
- Footnote ◼ «Dawut yazghan «Masqil»» — «Masqil» dégen sözning menisi bizge namelum; bezi alimlar uni «terbiyilik» bildüridu, dep qaraydu; yeni beziler uni «mahirliq bilen éytilsun» dégenni bildüridu, dep qaraydu. «Itaetsizlikliri kechürüm qilin’ghan, gunahliri yépilghan kishi bextliktur! » — ibraniy tilida «Ah, itaetsizlikliri kechürüm qilin’ghan, gunahliri yépilghan kishining bextlikliri!». Bu behtlikler bir-birlep töwende teswirlinidu.
- Cross-reference ◘ Rim. 4:6, 7
- Footnote ◼ «Sélah!» — menisi éniq emes. Zeburdiki herbir küy naxsha qilip éytilghan waqitta, «Sélah» belkim pedidiki birdem toxtashni (pauz) körsitip, «toxta, oylan» dégen menide ishlitilishi mumkin.
- Cross-reference ◘ Zeb. 38:18; 51:3; Pend. 28:13; 1Yuh. 1:9
- Footnote ◼ «Shunga séni tapalaydighan peytte, herbir ixlasmen Sanga dua bilen iltija qilsun!» — «shunga» dégen mushu muhim söz Xudaning kechürümini izdigen ademge ümid bérishi kérek (5-ayetni körüng). «Chong topanlar örlep téship ketkende, sular shu kishige yéqinlashmaydu» — mushu sözler oqurmenlerge Nuh peyghemberning dewridiki topanni eslitidu. Topan kélishtin burun Xudani izdigenler üchün «Xudani tapalaydighan peyt» bolidu; lékin topan bésip kelgendin kéyin Xudani izdeydighan héchqandaq purset qalmaydu.
- Cross-reference ◘ Zeb. 27:5; 31:20
- Footnote ◼ «Méning közüm üstüngde bolushi bilen...» — (1) Xuda Özini söygenlerni herdaim közide tutidu; (2) qedimde padishahlar xizmetchilirige peqet köz ishariti bilenla yol körsitetti.
- Cross-reference ◘ Pend. 26:3; Yaq. 3:3
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.