Muqeddes Kalam (latin yéziq)

Zebur 33

33-küy •••• Perwerdigarning méhribanliqi jahan’gha tolghan

Ey heqqaniylar, Perwerdigar üchün tentene qilinglar!

Medhiyilesh duruslar üchün güzel ishtur. 1

Rawab bilen Perwerdigarni medhiyilenglar;

Ontargha tengkesh bolup, Uninggha küylerni éytinglar. 2

Uninggha atap yéngi bir munajat-naxshini éytinglar;

Mahirliq bilen chélip, awazinglarni yuqiri yangritinglar. 3

Chünki Perwerdigarning sözi berheqtur;

Uning barliq ishliri wedilirige sadaqetliktur.

U heqqaniyet hem adaletni yaxshi körgüchidur;

Yer-zémin Perwerdigarning méhribanliqi bilen tolghandur. 4

Perwerdigarning sözi bilen asmanlar yaritilghan,

Uning aghzidiki nepes bilen ularning barliq qoshunlirimu yaritilghandur; 5 6

U déngizdiki sularni bir yerge yighip döwileydu;

U okyanlarni ambarlar ichide saqlap turidu; 7

Pütkül yer yüzidikiler Perwerdigardin eymensun;

Dunyadiki pütün jan igiliri Uningdin qorqup, hörmetlisun;

Chünki Uning bir sözi bilenla ish püttürülgenidi;

Uning bir emri bilenla dégenliri berpa qilin’ghanidi.

Perwerdigar ellerning pilanini tosuwétidu;

U qowmlarning xiyallirini bikar qiliwétidu. 8

Perwerdigarning nesiheti menggüge turidu;

Qelbidiki oyliri dewrdin-dewrge ishqa ashurulidu. 9

«Perwerdigar bizning Xudayimizdur» deydighan qowm bextliktur!

Yeni Öz mirasi bolushqa tallighan xelq bextliktur! 10

Perwerdigar ershtin yerge nezer salidu,

U pütkül insanlarni körüp turidu.

Turalghusidin yer yüzidikilerning hemmisige qaraydu;

U ularning herbirining qelblirini Yasighuchidur;

Ularning barliq ishlirini dengsep chiqquchidur.

Padishah bolsa qoshunlirining köplüki bilen ghalib bolalmaydu;

Palwan özining zor küchi bilen özini qutquzalmaydu;

Tulpargha tayinip xewp-xeterdin qutquzulush bihudiliktur,

U zor küchi bilen héchkimni qutquzalmaydu;

Mana, ularning jénini ölümdin qutquzush üchün,

Qehetchilikte ularni hayat saqlash üchün,

Perwerdigarning közi Özidin eyminidighanlarning üstide turidu,

Özining özgermes muhebbitige ümid baghlighanlarning üstide turidu. 11

Bizning jénimiz Perwerdigargha telmüridu;

Bizning yardemchimiz,

Bizning qalqinimiz U bolidu.

Shunga Uning bilen qelbimiz shadlinip kétidu;

Chünki Uning muqeddes namigha tayinip ishenduq.

I Perwerdigar, biz Sangila ümid baghlighinimizdek,

Séning özgermes muhebbitingmu üstimizde bolghay!

Source notes (11)

Cross-reference ◘ Zeb. 92:1; 135:3; 147:1
Footnote ◼ «Rawab bilen Perwerdigarni medhiyilenglar» — «rawab» bu ayette hem Zeburdiki bashqa ayetlerde ishlitilgende, «rawab» dégen söz rawabqa oxshap kétidighan bir sazni körsitidu. «Ontargha tengkesh bolup, uninggha küylerni éytinglar» — «ontar» on tarliq chiltardek bir saz.
Cross-reference ◘ Zeb. 40:3; 96:1; 98:1; 144:9; Yesh. 42:10; Weh. 5:9; 14:3
Cross-reference ◘ Zeb. 45:7; 119:64; Ibr. 1:9
Footnote ◼ «ularning (asmanlarning) barliq qoshunliri» — bir tereptin quyash, ay, yultuzlarni körsetse, yene bir tereptin barliq perishtilerni körsitidu.
Cross-reference ◘ Yar. 1:6, 7
Footnote ◼ «U déngizdiki sularni bir yerge yighip döwileydu» — bashqa birxil terjimisi: «U déngizdiki sularni küplerge yighidu». «U okyanlarni ambarlar ichide saqlap turidu» — bu ayetning menisi sirliq bolghini bilen, Xudaning sularni toluq idare qilidighanliqini körsetkenlikidin héchqandaq shübhe yoq.
Cross-reference ◘ Yesh. 19:3
Cross-reference ◘ Pend. 19:21; 21:30; Yesh. 46:10
Cross-reference ◘ Zeb. 65:4; 144:15
Cross-reference ◘ Ayup 36:7; Zeb. 34:15; 1Pét. 3:12

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.