Muqeddes Kalam (latin yéziq)

Zebur 2

2-küy •••• Xudaning Mesihi barliq ellerni idare qilidu

Eller némishqa chuqan salidu?

Néme üchün xelqler bikardin-bikar suyiqest oylaydu? 1 2

Dunyadiki padishahlar sepke tizilip,

Emeldarlar qara niyet eyliship,

Perwerdigar we Uning Mesihi bilen qarshiliship: — 3

«Ularning cheklimilirini chörüwéteyli,

Ularning asaretlirini buzup tashlayli!» — déyishidu. 4

Asmanda olturghuchi külidu,

Reb ularni mazaq qilidu;

Hem achchiqida ulargha sözlep,

Qehri bilen ularni wehimige sélip: —

«Özüm bolsam Zionda, yeni muqeddes téghimda,

Özüm mesih qilghan padishahni tiklidim». 5

Xuda teyinligen Mesih-Padishah söz qilidu

«Men ershtiki permanni jakarlaymenki,

Perwerdigar manga: —

«Sen Méning oghlum;

Özüm séni bügünki künde tughuldurdum; 6

Mendin sora, Men sanga miras bolushqa ellerni,

Teelluqung bolushqa yer yüzini chet-chetlirigiche bérimen; 7

Sen tömür tayaq bilen ularni bitchit qiliwétisen;

Sapal chinini kukum-talqan qilghandek, sen ularni pare-pare qiliwétisen» — dédi». 8 9

Emdi, hey padishahlar, hékmetlik bolunglar!

Jahandiki soraqchilar sawaq élinglar;

Perwerdigardin qorqush bilen uning xizmitide bolunglar;

Titrek ichide xushallininglar! 10

Oghulning ghezipining qozghalmasliqi üchün,

Uni söyünglar;

Chünki uning ghezipi sella qaynisa,

Yolunglardila halak bolisiler;

Uninggha tayan’ghanlar neqeder bextliktur! 11 12

Source notes (12)

Footnote ◼ «Eller némishqa chuqan salidu?» — Zeburdiki küylerde, «eller» yaki «yat eller» bolsa, Israil xelqidin bashqa herbir xelq-milletni körsitidu.
Cross-reference ◘ Ros. 4:25
Footnote ◼ «Perwerdigar we Uning Mesihi» — «Mesih» mushu yerde, kona bir örp-adetke qaritilghan. Tewrattiki belgilimide, yéngi padishah tiklinish murasimida béshigha puraqliq zeytun méyi quyulatti. Bu «mesih qilish» («mesihlesh») dep atalghan. «Yeshaya» kitab, 61-babta «mesih qilish» dégen söz bolsa, kélidighan Qutquzghuchining wujudigha may emes, belki Muqeddes Roh quyulidighanliqini körsitidu. Mushu ayettimu oxshashla, «Mesih» Muqeddes Roh bilen «mesih qilin’ghan adem»ni körsitidu.
Footnote ◼ «Ularning cheklimilirini chörüwéteyli, Ularning asaretlirini buzup tashlayli!» — «Ular» «Xuda we Uning Mesihi»ni körsitidu.
Footnote ◼ «Zion.., yeni muqeddes téghim..» — «Zion téghi» Yérusalém we muqeddes ibadetxana bu tagh üstige qurulghan. «Zion» (yaki «Sion») eslide «körünerlik» dégen menide. U Xudaning Öz xelqige himaye bolghanliqigha simwol qilinidu. «Özüm mesih qilghan padishahni tiklidim» — yuqiridiki 2-ayettiki, «Mesih» toghrisidiki izahatni körüng.
Cross-reference ◘ Ros. 13:33; Ibr. 1:5; 5:5
Cross-reference ◘ Zeb. 22:27; 72:8
Footnote ◼ «Sen tömür tayaq bilen ularni bitchit qiliwétisen» — yaki: «Sen tömür tayaq bilen ularni bashqurisen».
Cross-reference ◘ Weh. 2:27; 19:15
Footnote ◼ «Titrek ichide xushallininglar!» — bashqa birxil terjimisi: «titrek ichide yashanglar!».
Footnote ◼ «Uni (Oghulni) söyünglar» — buning menisi belkim «Xudaning oghli bilen eplishiwélinglar». «Chünki uning ghezipi sella qaynisa...» — yene birxil terjimisi «Chünki uning ghezipi tézla qozghilidu...».
Cross-reference ◘ Zeb. 34:8; Pend. 16:20; Yesh. 30:18; Yer. 17:7; Rim. 9:33; 10:11; 1Pét. 2:6

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.