Muqeddes Kalam (latin yéziq)

Zebur 10

10-küy •••• — 10-küy 9-küy dawami •••• 1-ayettiki izahatni körüng

Némishqa, i Perwerdigar, yiraqta turisen?

Némishqa azabliq künlerde özüngni yoshurisen? 1

Rezil ademler tekebburluqi bilen ajiz möminlerni tap basturup qoghlap yüridu;

Ular özliri tapqan hiyliler bilen ilinip, bablinidu. 2 3

Chünki reziller öz arzu-hewesliri bilen maxtinidu;

Ach közler üchün bext tileydu;

Perwerdigarni bolsa közige ilmaydu. 4

Ular chirayidin hakawurluq yaghdurup,

Xudani izdimeydu;

Ular barliq xiyallirida: «Héchbir Xuda yoqtur!» deydu. 5

Ularning yolliri hemishe rawan bolidu;

Séning hökümliring ularning neziridin yiraq we üstün turidu;

Ularning reqibliri bolsa, ulargha qarap «tüfi!» dep mazaq qilidu.

Rezil adem könglide: «Men héch tewrenmey turuwérimen!

Dewrdin-dewrge héch musheqqetke uchrimaymen» — deydu.

Uning aghzi qarghash, aldamchiliq hem zulumgha tolghan;

Tili astida eskilik we qebihlik yatidu. 6

U mehellilerde yoshurunche marap olturidu;

U pinhan jaylarda gunahsizlarni öltürüwétidu;

Közliri yoqsullarni közleydu;

U chatqalliqida yatqan shirdek yoshurunche paylap yatidu;

U möminlerni tutuwélish üchün yoshurunche marap yatidu;

Möminlerni tutuwélip, ularni öz torigha chüshüridu.

Yoqsullar ézilidu, pükülidu;

Derdmenler uning yawuzluqliri bilen yiqilidu. 7

U könglide: «Tengri buni untup qaldi,

U yüzini yépiwélip, qarimaydu;

Buni hergiz körmeydu» — deydu. 8 9

Ornungdin turghin, i Perwerdigar;

I Tengrim, qolungni kötürgin;

Ézilgen möminlerni untuma!

Rezil adem némishqa Sen Xudani közige ilmaydu?

U könglide: «Xuda buni sürüshtürmeydu!» — deydu.

Sen buni körgensen;

Sen Öz qolung bilen yamanliq hem zulumni özlirige qayturush üchün,

Özüng bularni közlep yürisen;

Derdmenler özlirini Sanga amanet qilidu;

Chünki Sen yétim-yésirlerge yar-yölek bolup kelgensen;

Rezil, yaman ademning bilikini sunduruwetkeysen;

Uning rezillikini birmubir sürüshtürüp, üzül-késil yoqatqaysen.

Perwerdigar ebedil’ebedgiche padishahdur;

Imansiz eller bolsa Perwerdigarning zéminidin yoqilar. 10 11

18 Perwerdigar, Sen ajiz möminlerning armanlirini anglaysen;

Ularning dilini toq qilisen;

Yétim-yésirlar we ézilgüchiler üchün adaletni yaqlap,

Yer yüzidiki insanlarning ajiz-möminlerge qaytidin wehime salghuchi bolmasliqi üchün,

Quliqingni ding tutisen.

Source notes (11)

Footnote ◼ «Némishqa, i Perwerdigar, yiraqta turisen? Némishqa azabliq künlerde özüngni yoshurisen?» — 10-küyning 9-küy bilen sirliq alaqisi bar; 9-küy hem 10-küydiki ayetler ibraniy tilida alahide shekilge ige. Ibraniy yéziqida 22 herp bar. Bu ikki küydiki taq ayetlerning herbiri ibraniy élipbe tertipige asasen yéngi herp bilen bashlinidu (mesilen, uyghur tili bolsa, a-, e-, b- qatarliq herpler bilen bashlan’ghan’gha oxshash). 9-küy hem 10-küyni bir-birige baghlighanda, toluq «élipbelik nusxa» peyda bolidu. Kéyin mushundaq küyni «élipbe tertipilik» küy dep ataymiz.
Footnote ◼ «Ular özliri tapqan hiyliler bilen ilinip, bablinidu» — yaki «Ajizlar ularning hiyliliri bilen ilinip qalidu».
Cross-reference ◘ Zeb. 7:16; 9:15-16; Pend. 5:22
Footnote ◼ «Ach közler üchün bext tileydu; Perwerdigarni bolsa közige ilmaydu» — yaki «Ach közler ademni tillap, Perwerdigarni chetke qaqidu».
Cross-reference ◘ Zeb. 14:1-3; 53:1-3
Cross-reference ◘ Rim. 3:14
Footnote ◼ «Derdmenler uning yawuzluqliri bilen yiqilidu» — «yawuzluqliri» belkim köchme menide bolup, shirning küchlük putlirini yaki chishlirini we yaki owchilarning torlirini (9-ayet) körsitishi mumkin.
Footnote ◼ «U yüzini yépiwélip, qarimaydu» —yaki «U yüzini yépip qarimaydu» yaki «U yüzini yoshurup qarimaydu»
Cross-reference ◘ Zeb. 64:5; 73:11; 94:7
Footnote ◼ «Imansiz eller bolsa Perwerdigarning zéminidin yoqilar» — ibraniy tilida «eller» mushu yerde Xudaning yolini ret qilidighan yat ellerni körsitidu. «Perwerdigarning zémini» — ibraniy tilida «uning zémini». Xudaning bu zémini bolsa, Israilgha miras qilghan Qanaan zémini (Pelestin)dur.
Cross-reference ◘ Zeb. 29:10; 93:1; 145:13; 146:10; Yer. 10:10; Yigh. 5:19; Dan. 3:33; 6:27; 1Tim. 1:17

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.