Muqeddes Kalam (latin yéziq)

Pend-nesihetler 11

Yalghan taraza Perwerdigargha yirginchliktur;

Adil jing téshi Uni xursen qilar. 1

Tekebburluq bilen birge shermendichilik egiship kéler;

Lékin danaliq kichik péillargha hemrah bolar. 2

Toghrilarning semimiyliki özini yétekler;

Lékin kazzaplarning egriliki özini weyran qilar. 3

Xudaning ghezep künide mal-dunyaning paydisi bolmas;

Lékin heqqaniyet ademni ölümdin qutquzar. 4

Kamil ademning heqqaniyliqi özini tüz yolgha bashlar;

Yaman adem öz yamanliqidin yiqilar.

Durus ademlerning heqqaniyliqi özlirini qutquzar;

Lékin kazzaplar öz hiyle-neyringidin tutular.

Rezil adem ölse, uning ümidi yoqqa chiqar;

Gunahkarning ümidi axiri quruq qalar. 5

Heqqaniy adem qiyinchiliqtin xaliy qilinar;

Rezil adem uning ornigha tutular. 6

Munapiqlar öz aghzi bilen yéqinini buzar;

Lékin heqqaniylar bilimi bilen qutquzular.

Heqqaniy adem ronaq tapsa, sheher xush bolar;

Rezil adem halak bolsa, xelq tentene qilar.

Toghrilarning beriket tileshliri bilen sheher gülliner;

Lékin rezillerning tili bilen weyran bolar.

Öz yéqinini sökidighan kishi — eqilsizdur;

Emma yorutulghan adem aghzini yighar.

Gep toshughuchi mexpiyetlerni ashkarilar;

Sadiq adem amanetke xiyanet qilmas.

Yolyoruq kem bolsa, el-yurt yiqilar;

Ulugh bir meslihetchi bolsa, el nijat tapar. 7 8

Yatqa borun bolghan kishi ziyan tartmay qalmas;

Qol bériship képil bolushni yaman körgen kishining quliqi tinch bolar. 9

Shapaetlik ayal izzet-hörmetni qoldin bermes;

Zorawanlar bayliqni qoldin bermes.

Rehimdil öz-özige bext yaritar;

Rehimsiz öz ténini aghritar.

Yaman ademlerning alghan ish heqqi ularni aldar, beriketsiz bolar;

Emma heqqaniyet térighuchi adem emeliy in’am alar. 10

Heqqaniyet ademge hayatliq tapquzar;

Yamanliqni közlep yüridighan kishi ölümge yüz tutar.

Niyiti buzuq kishi Perwerdigargha yirginchliktur;

Emma yoli diyanetlik kishiler uning xursenlikidur.

Qol tutushup birleshsimu, yamanlar jazagha tartilmay qalmas;

Lékin heqqaniylarning nesli nijat tapar. 11 12

Chirayliq emma tétiqsiz xotun,

Choshqining tumshuqigha altun halqa salghandektur.

Heqqaniylarning arzusi peqet yaxshi méwe élip kéler;

Yamanlarning kütkini ghezep-neprettur.

Biraw merdlerche tarqatsimu, gülliner;

Yene biraw bérishke tégishlikini ayisimu, peqet namratlishar.

Merd adem etliner;

Bashqilarni sugharghuchi özimu sughirilar. 13

Ashliqni satmay bésiwalghan kishi elning lenitige uchraydu;

Lékin ashliqni sétip bergüchige beriket tiliner.

Yaxshiliqni izdep intilgen adem shapaet tapar;

Yamanliqni izdigen adem özi yamanliq körer. 14

Öz mal-duniyasigha tayan’ghuchi yiqilar;

Heqqaniy kishi yopurmaqtek kökirer. 15

Öz öyige azarchiliq salghan kishi shamalgha miras bolar;

Eqilsiz adem aqilanining quli bolup qalar.

Heqqaniyning béridighan méwisi «hayatliq derixi»dur;

Dana kishi köngüllerni hayatliqqa mayil qilar. 16 17

Qaranglar, heqqaniy adem bu dunyada sewenliki üchün bedel töligen yerde,

Reziller bilen gunahkarlarning aqiwiti qandaq bolar? 18 19

Source notes (19)

Cross-reference ◘ Law. 19:36; Qan. 25:13; Pend. 16:11; 20:10,23
Cross-reference ◘ Pend. 15:33; 16:18; 18:12
Cross-reference ◘ Pend. 13:6
Cross-reference ◘ Pend. 10:2; Ez. 7:19; Zef. 1:18
Footnote ◼ «Gunahkarning ümidi...» — bashqa birxil terjimisi, «Küchlüklerning ümidi...».
Cross-reference ◘ Zeb. 34:19; Pend. 21:18
Footnote ◼ «Yolyoruq kem bolsa...» — bashqa birxil terjimisi, «Köp meslihetchiler bolsa,...». «...nijat tapar» — yaki «....bixeter turar».
Cross-reference ◘ 1Pad. 12:1-20
Footnote ◼ «Yatqa borun bolghan kishi ziyan tartmay qalmas» — 6:1 we izahatni körüng.
Footnote ◼ «Yaman ademlerning alghan ish heqqi ularni aldar, beriketsiz bolar» — ibraniy tilida «yaman ademning ish heqqi yalghan bolar».
Footnote ◼ «Qol tutushup birleshsimu,...» — bashqa birxil terjimisi: — «shübhisizki,...».
Cross-reference ◘ Pend. 16:5
Cross-reference ◘ Zeb. 112:9; 2Kor. 9:9
Cross-reference ◘ Zeb. 7:16; 9:15,16; 10:2; 57:6
Cross-reference ◘ Zeb. 1:3, 4; 92:12-14
Footnote ◼ «hayatliq derixi» — mushu yerde «hayatliq derixi» dégenlik, «Érem baghchisi»diki Adem’atimiz we Hawa’animizning behrimen bolushigha teyyarlan’ghan derexni körsitidu (3:18-ayetni körüng). «... hayatliqqa mayil qilar» — eyni tékistte «hayatliq» dégen söz yoq. Lékin heqqaniyliq yolida Xudaning mömin bendiliri ademlerning könglini özi üchün almaydu, belki ularni Xudaning yoligha jelp qilidu; shunga toluq menisi: «Kim dana bolsa kishilerning könglini nijat yoligha bashlaydu» dep qaraymiz. Mushu ayetni «Luqa» 5:10 bilen sélishturghili bolidu.
Cross-reference ◘ Yar. 2:9, Yaq. 5:19, 20
Footnote ◼ «Qaranglar, heqqaniy adem ...bedel töligen yerde, reziller bilen gunahkarlarning aqiwiti qandaq bolar?» — bu ayet Injil, «1Pét.» 4:18de neqil keltürülidu.
Cross-reference ◘ 1Pét. 4:17,18

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.