Муқеддес Калам (кирил йезиқ)

Зәбур 83

83-күй •••• Пәрвәрдигарниң һозурини сеғиниш

Нәғмичиләрниң бешиға тапшурулуп, «Гиттиф»та челинсун дәп, Кораһниң оғуллири үчүн йезилған күй: —

Маканлириң нәқәдәр әзиздур,

Самави қошунларниң Сәрдари болған Пәрвәрдигар! 1

Җеним Пәрвәрдигарниң һойлилириға тәшна болуп,

Сеғинип һәтта һалидин кетар,

Дилим вә әтлирим һаят Тәңригә тәлмүрүп нида қилар; 2

Мана, қучқачму тапқан мубарәк бир маканни,

Қарлиғачму өзигә һәм бала туғидиған уга ясайдиған җайни тапқан,

— Йәни Сениң қурбангаһлириңдин,

И самави қошунларниң Сәрдари болған Пәрвәрдигар,

— Мениң Падишасим, мениң Худайим!

НәСениң өйүңдә туруватқанлар бәхитликтур!

Улар үзлүксиз Сени мәдһийиләйду.

Селаһ.

Күч-қудрити Сәндин болған киши бәхитликтур —

Қәлбидә көтирилмә йоллар болғанлар; 3

Жиға вадисидин өткәндә,

Улар уни булақлиққа айландурар;

Бәрһәқ, күз ямғурлири уни бәрикәтләргә толдуриду. 4

Улар күчигә-күч улап меңиверәр;

Һәр бири Зионға йетип келип, Худаниң һозурида һазир болар.

И самавий қошунларниң Сәрдари болған Пәрвәрдигар, дуайимни аңлиғайсән;

И Яқупниң Худаси, қулақ салғайсән!

Селаһ.

Қара, и қалқинимиз болған Худа,

Өзүң мәсиһ қилғиниңниң йүзигә илтипат билән қариғин! 5

Чүнки Сениң һойлилириңда өткән бир күн

Башқа йәрдә өткән миң күндин әладур;

Рәзилләрниң чедирлиридә яшиғандин көрә,

Худайимниң өйиниң босуғисида турғиним яхшидур. 6

Пәрвәрдигар Худа қуяш вә қалқандур,

Пәрвәрдигар шапаәт вә шан-шөһрәт бәхш етиду;

Дурус маңғанлардин У һәр қандақ илтипатни һеч айимайду;

Самавий қошунларниң Сәрдари болған Пәрвәрдигар,

Бәхитликтур Саңа таянған инсан! 7

Source notes (7)

Footnote ◼ «Нәғмичиләрниң бешиға тапшурулуп, «Гиттиф»та челинсун дәп» — «Гиттиф»ниң мүмкинчилиги бар бир мәнаси: «Гат шәһириниң сази».
Cross-reference ◘ Зәб. 41:1-3; 62:1-3
Footnote ◼ «...қәлбидә көтирилмә йоллар болғанлар» — «көтирилмә йоллар» — көтирип ясалған, Йерусалимға тавап қилидиған йолучилар маңидиған йоллар болса керәк.
Footnote ◼ «Жиға вадисидин өткәндә» — «Жиға вадиси» яки «бака вадиси». Ибраний тилида «бака» биринчидин «жиға»ни билдүриду, иккинчидин бир хил үҗмә дәриғини билдүриду, йәнә «жиғлайдиған дәрәқ» — кесилгән болса дәрәқ сүйи жиғлиғандәк чиқиду. Давут пәйғәмбәр икки қетим бир «Бака вадиси» (йәни «Рәфайим җилғиси»)да ғәлибә қилди һәм әшу йәрдә униң үч җан-дости җенини тәвәккүл қилип униңға су елип кәлди («2Сам.» 5-, 23-бапта). «күз ямғурлири уни бәрикәтләргә толдуриду» — Қанаанда (Пәләстиндә) күз ямғурлири йәрни һайдаш, һәм уруқ селишқа тәйяр қилиду.
Footnote ◼ «Өзүң мәсиһ қилғиниңниң йүзигә илтипат билән қариғин!» — «мәсиһ қилғини», 2-күйдики изаһатларни, шундақла «Тәбирләр»ниму көрүң.
Footnote ◼ «Худайимниң өйиниң босуғисида турғиним яхшидур» — йәнә бир хил тәрҗимиси: «Худайимниң өйидә ишикбақар болғиним яхшидур».
Cross-reference ◘ Зәб. 2:12; 33:9

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.