Зәбур 82

82-күй •••• Дүшмәнләрниң сүйқәстлири һәққидә дуа

1-2Асафниң күй-нахшиси: —

Үн чиқармай турувалма, и Худа,

Сүкүт қилип җим турувалма, и Тәңрим!

3Чүнки мана, Сениң дүшмәнлириң давраң қилмақта,

Саңа өчмәнләр баш көтәрмәктә.

4Улар қувлуқ билән сүйқәст қилар хәлқиңгә,

Қарши план түзүшәр Сен қәдирлигәнләргә.

5Ейтар улар: — «Жүрүңлар, барчә қовум қатаридин йоқ қилайли уларни!

Елинмисун еғизға қайта Исраилниң нами!».

6Улар һәмнәпәс, һәмдил мәслиһәтләшти;

Улар Саңа қарши иттипақ түзди.

7Мана, Едом вә Исмаилларниң чедирлири,

Моаб һәм Һагрийлар;

8Гәбал, Аммон, вә Амаләк;

Филистийә һәмдә Тур аһалилири,

9Асурийәму уларға қошулди;

Улар Лут оғуллириға яр-йөләк болуп кәлгән еди.

Селаһ. 1

10Сән Кишон дәриясида Мидиянийларға,

Сисераға вә Ябинға қандақ тақабил турған болсаң,

Уларғиму шундақ қилғайсән;

11Булар Ән-Дор йезисида қирилған еди,

Йәр үчүн тизәк-оғутқа айланған еди.

12Уларниң әмирлирини Орәб вә Зеәбкә,

Уларниң даһийлирини Зәбаһ һәм Залмуннаға охшаш қилғайсән; 2

13Чүнки улар дәп ейтқан: «Худаниң чимән-яйлақлирини өзимизгә мүлүк қиливалайли!».

14И Худайим, уларни домилинидиған қамғақтәк,

Шамалда учурулған саман кәби сорувәткәйсән.

15От орманлиққа туташқанға охшаш,

Ялқун тағларни көйдүргәнгә охшаш,

16Сән йәнә уларни бориниң билән қоғлиғайсән,

Қара қуюниң билән вәһимигә салғайсән;

17Уларниң Сениң намиңни издиши үчүн,

Уларниң йүзлирини шәрм-һая билән чөмдүргәйсән, и Пәрвәрдигар!

18Улар номустин әбәдий шәрмәндә болғай,

Җаһанға рәсва болуп йоқитилғай.

19Улар билсунки,

Намиң Пәрвәрдигар болған Сәнла пүткүл җаһандики Әң Алий Болғучидурсән.