Муқеддес Калам (кирил йезиқ)
Зәбур 81
81-күй •••• Худаниң алий соти
Юһ. 10:22-42
Асаф язған күй: —
Худа Өз илаһий мәҗлисидә туруп,
У илаһлар һәккидә һөкүм чиқириду; 1
— Қачанғичә силәр наһәқ һөкүм чиқирисиләр,
Қачанғичә рәзилләргә йүз-хатирә қилисиләр?
Селаһ.
Гадайлар вә житим-йесирларниң дәвасини сораңлар,
Езилгәнләр һәм һаҗәтмәнләргә адаләтни көрситиңлар; 2
Мискинләр һәм намратларни қутқузуңлар,
Уларни рәзилләрниң чаңгилидин азат қилиңлар! 3
Надан вә билимсиздур уларниң һэммиси:
Йүрәр улар зүлмет ара,
Тәврәр зимминиң һуллири.
Мән ейтармән: — «Силәр илаһларсиләр,
Һәммиңлар Һәммидин Алий Болғучиниң оғуллири силәр;
Шундақ болсиму силәр инсанға охшаш өлисиләр,
Һәр қандақ әмир-бәккә охшашла жиқилисиләр». 4
— Турғин, и Худа, йәр-йүзини сорақ қилғайсән!
Чүнки Сән барлиқ әлләргә варис болғучисән! 5 6
Source notes (6)
- Footnote ◼ «Худа Өз илаһий мәҗлисидә туруп (риясәтчилик қилиду), У илаһлар һәккидә һөкүм чиқириду» — бизниңчә, бу мәҗлискә қатнашқан «илаһлар»ниң Худаниң хәлқигә сотчи болған яки Өз хәлқи арисида һоқуқ-мәсъулийити бар адәмләр екәнлиги төвәндики айәтләрдин көрүлиду. Мәлум җәһәтләрдин, улар Худадәк адәмләр үстидин һөкүм чиқириду; шуниң үчүн улар бу мәсъулийәтниң еғирлиғини убдан чүшиниши керәк. «У илаһлар һәккидә һөкүм чиқириду» — башқа шәрһчиләр болса «илаһлар» дегәнни йәр йүзидики падиша-һоқуқдарларни көрситиду, дәп қарайду. Музу шәрһчиләр 6-айәттики «силәр илаһлар» дегәнни кинайилик сөз дәп қарайду; чүнки шу дәвирдики падишалардин көп қисми өзлирини «Худа» дәп қарайтти, хәлқидин өзигә ибадәт қилишини тәләп қилатти. Лекин Рәббимизниң «Юһ.» 10:33-36дә ейтқан шәрһи бойичә, бу сөзләр кинайилик сөз әмәс; шуңа жуқуриқи чүшәндүрүшимиз тоғра, дәп қараймиз.
- Footnote ◼ «...житим-йесирларниң дәваси» — ибраний тилида «... атисизларниң дәваси».
- Cross-reference ◘ Пәнд. 24:11
- Footnote ◼ «Шундақ болсиму силәр инсанға охшаш өлисиләр, һәр қандақ әмир-бәккә охшашла жиқилисиләр» — 1-айәт вә униңдики изаһатни көрүң. Биринчи җүмлиниң башқа бир хил тәрҗимиси: «Шундақ болсиму силәр Адәмгә (демәк, Адәматимизға) охшаш өлисиләр».
- Footnote ◼ «Сән барлиқ әлләргә варис қилисән» — бу сөз бәлким Мәсиһкә ейтилиши мүмкин.
- Cross-reference ◘ Зәб. 2:8; Ибр. 1:2
Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.