Муқеддес Калам (кирил йезиқ)

Зәбур 61

61-күй •••• Худани тәлмүрүп күтүш

Нәғмичиләрниң беши Йәдутунға тапшурулған, Давут язған күй: —

Җеним Худағила қарап сүкүттә күтиду;

Мениң ниҗатлиғим униңдиндур. 1

Пәқәт Ула мениң қорам тешим вә мениң ниҗатлиғим,

Мениң егиз қорғинимдур;

Мән унчилик тәвринип кәтмәймән. 2

Силәр қачанғичә шу аҗиз бир инсанға һуҗум қилисиләр?

Һәммиңлар қиңғийип қалған тамни,

Ирғаңлап қалған қашани ғулатқандәк, уни ғулатмақчисиләр?

Уни шөһрәт-һәйвитидин чүшүрүветиштин башқа, уларниң һеч мәслиһәти йоқтур;

Ялғанчилиқлардин хурсән улар;

Ағзида бәхит тилигини билән,

Улар ичидә ләнәт оқуйду.

Селаһ.

И җеним, Худағила қарап сүкүттә күткин;

Чүнки мениң үмүтүм Униңдиндур.

Пәқәт У мениң қорам тешим һәм мениң ниҗатлиғим,

Мениң егиз қорғинимдур;

Мән тәвринип кәтмәймән.

Ниҗатлиғим һәм шан-шөһритим Худаға бағлиқтур;

Мениң күчүм болған қорам таш, мениң панаһгаһим Худадидур.

И халайиқ, Униңға һәрдайим тайиниңлар!

Униң алдида ич-бағриңларни төкүңлар;

Худа бизниң панаһгаһимиздур!

Селаһ.

Аддий бәндиләр пәқәт бир тиниқ,

Есилзадиләрму бир ялған сөз халас;

Таразиға селинса уларниң қилчә салмиқи йоқ,

Бир тиниқтинму йениктур.

Зомигәрликкә таянмаңлар;

Булаңчилиқтин хам хиял қилмаңлар,

Байлиқлар көпәйсиму, буларға көңлүңларни қоймаңлар;

Худа бир қетим ейтқанки,

Мундақ дегинини икки қетим аңлидимки: —

«Күч-қудрәт Худаға мәнсуптур».

Һәм и Рәб, Саңа өзгәрмәс муһәббәтму мәнсуптур;

Чүнки Сән һәр бир кишигә өз әмилигә яриша қайтурисән. 3

Source notes (3)

Footnote ◼ «Нәғмичиләрниң беши Йәдутунға тапшурулған, Давут язған күй» — «Йәдутун»: Давут пәйғәмбәр «мәдһийә хори»ниң йетәкчиси дәп бекиткән, Йәдутун исимлиқ бир кишини көрситиду («1Тар.» 16:41ни көрүң). Йәнә бир хил тәрҗимиси: «Нәғмичиләрниң бешиға тапшурулуп, «Йәдутун» (мәдһийиләш дегән мәнада) аһаңида оқулсун дәп Давут язған күй: —....».
Footnote ◼ «Мән унчилик тәвринип кәтмәймән» — яки башқа бир хил тәрҗимиси «Зор еғирчилиқтиму тәврәнмәймән».
Cross-reference ◘ Аюп 34:11; Пәнд. 24:12; Йәр. 32:19; Әз. 7:27; 33:20; Мат. 16:27; Рим. 2:6; 2Кор. 5:10; Әф. 6:8; Кол. 3:25; 1Пет. 1:17; Вәһ. 22:12

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.