Муқеддес Калам (кирил йезиқ)

Зәбур 2

2-күй •••• Худаниң Мәсиһи барлиқ әлләрни идарә қилиду

Әлләр немишкә чуқан салиду?

Немә үчүн хәлиқләр бекардин-бекар сүйқәст ойлайду? 1 2

Дуниядики падишалар сәпкә тизилип,

Әмәлдарлар қара нийәт әйлишип,

Пәрвәрдигар вә Униң Мәсиһи билән қаршилишип: — 3

«Уларниң чәклимилирини чөрүветәйли,

Уларниң асарәтлирини бузуп ташлайли!» — дейишиду. 4

Асманда олтарғучи күлиду,

Рәб уларни мазақ қилиду;

Һәм аччиғида уларға сөзләп,

Қәһри билән уларни вәһимигә селип: —

«Өзүм болсам Зионда, йәни муқәддәс теғимда,

Өзүм мәсиһ қилған падишани тиклидим». 5

Худа тайинлиған Мәсиһ-Падиша сөз қилиду

«Мән әрштики пәрманни җакалаймәнки,

Пәрвәрдигар маңа: —

«Сән Мениң оғлум;

Өзүм сени бүгүнки күндә туғулдурдум; 6

Мәндин сора, Мән саңа мирас болушқа әлләрни,

Тәәллуғуң болушқа йәр йүзини чәт-чәтлиригичә беримән; 7

Сән төмүр таяқ билән уларни битчит қиливетисән;

Сапал чинини кукум-талқан қилғандәк, сән уларни парә-парә қиливетисән» — деди». 8 9

Әнди, һәй падишалар, һекмәтлик болуңлар!

Җаһандики сорақчилар савақ елиңлар;

Пәрвәрдигардин қорқуш билән униң хизмитидә болуңлар;

Титрәк ичидә хошаллиниңлар! 10

Оғулниң ғәзивиниң қозғалмаслиғи үчүн,

Уни сөйүңлар;

Чүнки униң ғәзиви сәлла қайниса,

Йолуңлардила һалак болисиләр;

Униңға таянғанлар нәқәдәр бәхитликтур! 11 12

Source notes (12)

Footnote ◼ «Әлләр немишкә чуқан салиду?» — Зәбурдики күйләрдә, «әлләр» яки «ят әлләр» болса, Исраил хәлқидин башқа һәр бир хәлиқ-милләтни көрситиду.
Cross-reference ◘ Рос. 4:25
Footnote ◼ «Пәрвәрдигар вә Униң Мәсиһи» — «Мәсиһ» мошу йәрдә, кона бир өрп-адәткә қаритилған. Тәвраттики бәлгүлимидә, йеңи падиша тиклиниш мурасимида бешиға пурақлиқ зәйтун мейи қуюлатти. Бу «мәсиһ қилиш» («мәсиһләш») дәп аталған. «Йәшая» китап, 61-бапта «мәсиһ қилиш» дегән сөз болса, келидиған Қутқузғучиниң вуҗудиға май әмәс, бәлки Муқәддәс Роһ қуюлидиғанлиғини көрситиду. Мошу айәттиму охшашла, «Мәсиһ» Муқәддәс Роһ билән «мәсиһ қилинған адәм»ни көрситиду.
Footnote ◼ «Уларниң чәклимилирини чөрүветәйли, Уларниң асарәтлирини бузуп ташлайли!» — «Улар» «Худа вә Униң Мәсиһи»ни көрситиду.
Footnote ◼ «Зион.., йәни муқәддәс теғим..» — «Зион теғи» Йерусалим вә муқәддәс ибадәтхана бу тағ үстигә қурулған. «Зион» (яки «Сион») әслидә «көрүнәрлик» дегән мәнада. У Худаниң Өз хәлқигә һимайә болғанлиғиға символ қилиниду. «Өзүм мәсиһ қилған падишани тиклидим» — жуқуридики 2-айәттики, «Мәсиһ» тоғрисидики изаһатни көрүң.
Cross-reference ◘ Рос. 13:33; Ибр. 1:5; 5:5
Cross-reference ◘ Зәб. 21:28; 71:8
Footnote ◼ «Сән төмүр таяқ билән уларни битчит қиливетисән» — яки: «Сән төмүр таяқ билән уларни башқурисән».
Cross-reference ◘ Вәһ. 2:27; 19:15
Footnote ◼ «Титрәк ичидә хошаллиниңлар!» — башқа бир хил тәрҗимиси: «титрәк ичидә яшаңлар!».
Footnote ◼ «Уни (Оғулни) сөйүңлар» — буниң мәнаси бәлким «Худаниң оғли билән әплишивелиңлар». «Чүнки униң ғәзиви сәлла қайниса...» — йәнә бир хил тәрҗимиси «Чүнки униң ғәзиви тезла қозғилиду...».
Cross-reference ◘ Зәб. 33:9; Пәнд. 16:20; Йәш. 30:18; Йәр. 17:7; Рим. 9:33; 10:11; 1Пет. 2:6

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.