Муқеддес Калам (кирил йезиқ)

Зәбур 3

3-күй •••• Сәһәрдики дуа

Давут өз оғли Абшаломдин қечип жүргән күнләрдә язған күй: —

И Пәрвәрдигар, мени қиставатқанлар нәқәдәр көпийип кәткән,

Мән билән қаршилишиватқанлар немидегән көп! 1 2

Нурғунлар мән тоғрилиқ: —

«Худадин униңға һеч ниҗат йоқтур!» дейишиватиду.

Селаһ! 3

Бирақ Сән, и Пәрвәрдигар, әтрапимдики қалқандурсән;

Шан-шәривим һәм бешимни йөлигүчидурсән! 4

Авазим билән мән Пәрвәрдигарға нида қилимән,

У муқәддәс теғидин иҗабәт бериду.

Селаһ.

Мән болсам яттим, ухлидим;

Ойғандим, чүнки Пәрвәрдигар маңа яр-йөләк болиду. 5

Мени қоршап сәп түзгән түмәнлигән адәмләр болсиму,

Мән улардин қорқмаймән! 6

И Пәрвәрдигар, орнуңдин тур!

Мени қутқуз, и Худайим!

Мениң барлиқ дүшмәнлиримниң тәстикигә салғайсән;

Рәзилләрниң чишлирини чеқивәткәйсән!

Ниҗатлиқ болса Пәрвәрдигардиндур;

Бәрикитиң Өз хәлқиңдә болсун!

Селаһ! 7

Source notes (7)

Footnote ◼ «Давут өз оғли Абшаломдин қечип жүргән күнләрдә...» — мошу вақиә, «2Сам.» 15-18-бапта хатириләнгән.
Cross-reference ◘ 2Сам. 15,16,17,18
Footnote ◼ «Худадин униңға һеч ниҗат йоқтур!» — демисәкму, «ниҗат» «(Худадин кәлгән) қутқузуш» дегәнни билдүриду. «Селаһ» — мошу сөз бәлким күй чалған вақтида музикидики бир «пауза»ни көрситиши мүмкин; шуниң билән униң: — «Тохта, ойлан!» дегән имаси болуши мүмкин.
Footnote ◼ «Шан-шәривим һәм бешимни йөлигүчидурсән!» — «мениң шан-шәривим» дегән ибарә икки бислиқ сөз болуп, бәлким: (1) Давутниң мәдһийисиниң темиси Худа Өзидур; (2) Худаниң Давутниң өз Худаси болғанлиғи, бу наһайити пәхирлик, шәрәплик иштур, дегән икки мәнани билдүрүши мүмкин.
Cross-reference ◘ Зәб. 4:9
Cross-reference ◘ Зәб. 26:3
Cross-reference ◘ Пәнд. 21:31; Йәш. 43:11; Йәр. 3:23; Һош. 13:4; Вәһ. 7:10; 19:1

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.