Муқеддес Калам (кирил йезиқ)
Зәбур 149
149-күй •••• Қиямәт күнидики ғәлибә үчүн мәдһийиләңлар!
Һәмдусана!
Пәрвәрдигарға атап йеңи бир нахшини оқуңлар;
Мөмин бәндиләрниң җамаитидә Униң мәдһийисини ейтиңлар!
Исраил өз Яратқучисидин шатланғай;
Зион оғуллири өз Падишасидин хуш болғай! 1
Улар Униң намини уссул билән мәдһийилигәй;
Униңға күйләрни дап һәм чилтарға тәңшәп ейтқау! 2
Чүнки Пәрвәрдигар Өз хәлқидин сөйүнәр;
У мулайим мөминләрни ниҗатлиқ билән безәйду;
Униң мөмин бәндилири шан-шәрәптә роһлинип шат болғай,
Орунлирида йетип шат авазини яңратқай! 3
Ағзида Тәңригә жүксәк мәдһийилири болғай,
Қоллирида қош бислиқ қилич тутулғай; 4
Шуниң билән улар әлләр үстидин қисас,
Хәлиқләргә җаза беҗа жүргүзиду;
Әлләрниң падишалирини зәнҗирләр билән,
Ақсүйәклирини төмүр кишәнлири билән бағлайду; 5
Уларниң үстигә пүтүлгән һөкүмни беҗа кәлтүриду —
Униң барлиқ мөмин бәндилири мошу шәрәпкә несип болиду!
Һәмдусана! 6
Source notes (6)
- Cross-reference ◘ Зәб. 99:3
- Cross-reference ◘ Зәб. 80:1-5
- Footnote ◼ «Орунлирида йетип шат авазини яңратқай!» — «орунлирида йетиш» бәлким: — (1) Йәһудийларниң өрп-адәтлири бойичә, зияпәтләрдә меһманлар үчүн көрпиләр селинип, меһманлар йеничилап йетип дәстихандин алиду; шуңа мошу йәрдә хошаллиқ зияпәтләрни көрситиду; (2) мөмин бәндиләр шунчә хошал болуп, хошаллиғидин ухлалмайду; (3) өзлириниң аман-есән йетип-қопушлири үчүн шатлиниши керәк.
- Cross-reference ◘ 2Тес. 2:8; Ибр. 4:12; Вәһ. 1:16
- Cross-reference ◘ Мат. 18:18
- Cross-reference ◘ Қан. 4:6
Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.