Муқеддес Калам (кирил йезиқ)

Зәбур 146

146-күй •••• Һәммигә Қадир Худаға һәмдусаналар ейтилсун!

Һәмдусана! Яһни мәдһийиләңлар!

Бәрһәқ, бундақ қилиш шериндур;

Худайимизни күйләңлар!

Мәдһийә оқуш инсанға яришиду. 1

Пәрвәрдигар Йерусалимни бена қилмақта;

Исраилниң сүргүн қилинғанлирини У жиғип келиду; 2

У көңли сунуқларни давалайду;

Уларниң ярилирини таңиду. 3

У юлтузларниң санини санайду;

Уларниң һәммисигә бир-бирләп исим қойиду. 4 5

Улуқдур Рәббимиз, зор қудрәтликтур;

Униң чүшиниши чәксиздур.

Пәрвәрдигар мулайим мөминләрни йөләп көтириду;

Рәзилләрни йәргичә төвән қилиду.

Пәрвәрдигарға тәшәккүрләр билән нахша ейтиңлар;

Күйләрни чилтарға тәңшәп ейтиңлар!

У асманни булутлар билән қаплитиду,

Зиминға ямғурни бекитиду,

Тағларда от-чөпләрни өстүриду; 6

Малларға озуқ,

Тағ қарғисиниң җүҗилири зарлиғанда, уларға озуқ бериду;

Ат күчидин У зоқ алмайду;

Адәмниң чәбдәс путлирини хурсәнлик дәп билмәйду;

Пәрвәрдигар бәлки Өзидин әйминидиғанларни,

Өзиниң өзгәрмәс муһәббитигә үмүт бағлиғанларни хурсәнлик дәп билиду.

Source notes (6)

Cross-reference ◘ Зәб. 32:1; 92:1-3; 134:3
Footnote ◼ «Пәрвәрдигар Йерусалимни бена қилмақта; Исраилниң сүргүн қилинғанлирини У жиғип келиду» — бу айәткә қариғанда, мошу күй Исраил Бабилға сүргүн болғанлиғидин қайтип кәлгәндин кейин йезилған.
Cross-reference ◘ Мис. 15:26; Аюп 5:18
Footnote ◼ «У... уларниң һәммисигә бир-бирләп исим қойиду» — башқа бир хил тәрҗимиси: «У... уларни (юлтузларни) исмилирини чақирип опуққа чиқириду».
Cross-reference ◘ Йәш. 40:26
Cross-reference ◘ Аюп 38:26, 27; Зәб. 103:13-14; Һош. 2:23, 24

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.