Зәбур 113

113-күй •••• Худаниң Исраил хәлқиниң Мисирдин чиқишида уларға намайән қилған улуқлуғи

1Исраил Мисирдин,

Яқуп җәмәти ят тиллиқ әлләрдин чиққанда, 1

2Шу чағда Йәһуда Худаниң муқәддәс җайи,

Исраил униң сәлтинити болди,

3Деңиз буни көрүп бәдәр қачти,

Иордан дәрияси кәйнигә янди;

4Тағлар қочқарлардәк,

Дөңләр қозилардәк ойнақлиди.

5Әй деңиз, сән немә болдуң, қачқили?

Иордан дәрияси, йолуңдин янғили?

6Тағлар қочқарлардәк,

Дөңләр қозилардәк ойнақлиғили?

7И йәр йүзи, Рәбниң җамалидин,

Яқупниң Худасиниң җамалидин тәврән;

8У қорам ташни көлчәккә,

Чақмақ тешини мол булақ сулириға айландуриду. 2 3

113-күй — давами •••• Бутларға чоқунғанлар һәм Худаға ибадәт қилғанлар

9Бизгә әмәс, и Пәрвәрдигар, бизгә әмәс —

Өзгәрмәс муһәббитиң үчүн, һәқиқәт-садақитиң үчүн,

Өз намиңға шан-шәрәп кәлтүргәйсән.

10Әлләр немишкә «Уларниң Худаси қәйәрдә?» дәп мазақ қилишиду?

11Бирақ Худайимиз болса әршләрдидур;

Немини халиса, У шуни қилғандур.

12Уларниң бутлири болса пәқәт күмүч-алтундин ибарәт,

Инсанниң қоллири ясиғинидур, халас.

13Уларниң ағзи бар, бирақ сөзләлмәйду;

Көзлири бар, көрмәйду; 4

14Қулақлири бар, аңлимайду,

Бурни бар, пуралмайду;

15Қоллири бар, силалмайду;

Путлири бар, маңалмайду;

Канийидин һеч бир сада чиқармайду.

16Уларни ясиғанлар уларға охшаштур,

Уларға таянғанларму шундақтур.

17И Исраил, Пәрвәрдигарға тайиниңлар;

У силәргә ярдәм қилғучиңлар һәм қалқиниңлардур.

18И Һарун җәмәти, Пәрвәрдигарға тайиниңлар;

У силәргә ярдәм қилғучи һәм силәрниң қалқиниңлардур. 5

19Пәрдәрдигардин әйминидиғанлар, Пәрвәрдигарға тайиниңлар;

У силәргә ярдәм қилғучи һәм қалқиниңлардур.

20Пәрвәрдигар бизни әсләп кәлди;

У бәхит ата қилиду;

У Исраил җәмәтигә бәхит ата қилиду;

У Һарун җәмәтигә бәхит ата қилиду;

21Пәрвәрдигардин әйминидиғанларға,

Чоңлири һәм кичиклиригиму бәхит ата қилиду.

22Пәрвәрдигар силәргә қошлап бериду,

Силәргә һәм пәрзәнтлириңларға;

23Силәргә Пәрвәрдигар тәрипидин бәхит ата қилинған,

Асман-зиминни Яратқучидин бәрикәтләнгән!

24Асманлар болса Пәрвәрдигарниң асманлиридур;

Бирақ зиминни болса инсан балилириға тапшурғандур.

25Өлүкләр Яһни мәдһийиләлмәйду,

Сүкүт дияриға чүшүп кәткәнләрму шундақ;

26Бирақ бизләр һазирдин башлап Яһқа әбәдил-әбәткичә тәшәккүр-мәдһийә қайтуримиз!

Һәмдусана!