Ayuba

Ayuba

Ayuba

Ucuɗuwu wa aatagada a nda

A gura ca ucuɗuwu u mantsa ma na Ayuba yuwain wuma wa̱ yi shi, ko a gura damma nda uba̱ta̱ u na wu uta̱i shi. Aatagada a Ayuba alabari a vuma va̱ a̱ɓula̱ o ro a ɗa za na sowoi a̱tsuma̱lima̱ na addama. U lamba ta̱ utsuru wa̱ yi suru na̱ muwun ma̱ a̱ yi, waru na̱ ne suru u sowo ta̱ a̱tsuma̱lima̱ na̱ mɓa̱la̱ n vama. Adama o ndolo a̱tsuma̱ o ure wi ishipa, ɗaɗa za vi iɗana'a u gerei adanshi a na n'utsa̱ ma Ayuba n yuwain, oɓolo na adanshi a na a̱yi Ayuba na aciya̱yi u yuwain, ununa a yuwain ukadu u na ee reve ili i na yaa farasa. A̱ba̱jini a adanshi e le u roco ta̱ ununa A̱sula̱ a tsu yuwan na̱ vaɗilima̱. A̱ tyo o ukosu reve A̱sula̱ na aciya̱yi a yuwan adanshi na̱ Ayuba.

N'utsa̱ ma Ayuba n ca ta̱ ucuɗuwu wa̱ a̱tsuma̱lima̱ a̱ yi a̱tsuma̱ e idanshi yi itoni ya̱ a̱ma̱li o una̱ wu urevu u le. A ta majiyan ma na A̱sula̱ a tsu ca ta̱ iliyinkapa o una̱ wu ulinga u sa'ani, waru u tsu ge'eto ta̱ ulinga wi iwuya. Adama o ndolo o una̱ u majiyan me le, a̱tsuma̱lima̱ a na Ayuba o sowuso u ta̱wa̱ ta̱ adama a na u yuwain unusu. Amma o una̱ wu urevu wa Ayuba ne ɗa u ri shi, adama a na a̱yi we ene ta̱ wuntsaa u sowo cu'un vu uge'etosu u nda shi, a na wo o'woi u yuwan ta̱ wuma wa̱ a̱ɓula̱ na̱ mejege. U reve ili i na i zuwai A̱sula̱ a lyawai cu'un vi ili iwuya i nda i farai na̱ yi shi, amma wi isawan ta̱ u damma a̱ yi u ri nu unusu shi, hali u yuwan okolo o ugbamu u yuwan A̱sula̱ yeci. Ayuba o uta̱a̱ okolo a̱ yi diga o uzuwu wo okolo a̱ yi shi, amma u zuwa ta̱ okolo a na o roco alanga eteshe a na a̱ yi za vu unusu ɗa shi elime A̱sula̱, waru ne ɗa wuma wa̱ yi na̱ tsugbain tsa̱ a̱ yi tsa̱a̱ ka̱mba̱.

A̱sula̱ a ca Ayuba usuwu u yeci ya̱ yi ununa Ayuba cigai shi. Amma u ca ta̱ Ayuba usuwu o una̱ wu ucawu wo okolo a Ayuba, a̱tsuma̱ o ure u na u zuwa niyi asalama a̱tsuma̱ e ishipa i na i rocoyi ucira wa̱ A̱sula̱ nu urevu wa̱ yi. Amma Ayuba a̱tsuma̱ a̱ mini mo uta̱nu u gura ta̱ reve a na A̱sula̱ za vu urevu ɗa, waru zagbain, a̱yi nda zuwa ta̱ Ayuba vadala diga a̱tsuma̱ e idanshi yu usuɗuwu nu upan u na u yuwain.

O ukosu wa alabari'i, A̱sula̱ a̱ ka̱mbuwa̱a̱ ta̱ Ayuba na aba'un a na a la'ai za vu ufaru, oɓolo nu utsuru u na u la'ai za vu ufaru. A̱sula̱ e ge'eto ta̱ n'utsa̱ ma Ayuba adama o ulambu wu urevu u le o una̱ wa̱ a̱tsuma̱lima̱ a na Ayuba o sowuso. Ayuba ɗa goon ri nu urevu ana A̱sula̱ a ɗa zagbain, na la'ai idanshi ya̱ a̱za̱ e itoni ya̱ a̱ma̱li yi n'utsa̱ ma Ayuba na a dansa adama A̱sula̱.

Ili i na i ri pe a̱tsuma̱ a aatagada a nda

Alabari Ayuba nu ufaru wa̱ a̱tsuma̱lima̱ a̱ yi 1:1-2:13

N ka̱mbula̱i ma Ayuba na̱ n'utsa̱ ma̱ yi 3:1-31:40

Ufaru wa adanshi Ayuba 3:1-26

N ka̱mbula̱i mu ufaru 4:1-14:22

N ka̱mbula̱i ma̱ ire 15:1-21:34

N ka̱mbula̱i ma ta'atsu 22:1-27:23

Adanshi a Ayuba adama o urevu 28:1-28

Ayuba lyuwa ta̱ elime na adanshi 29:1-31:40

Adanshi a̱ Elihu 32:1-37:24

A̱sulazuva a̱ usu ta̱ Ayuba 38:1-42:6

Alabari a wuma u sa'avu wa Ayuba 42:7-17.