মথি 10

ইশু বার্চো য়োংতোংবিহিং মোউওয়া

(মর্কুস ৩:১৩-১৯, ৬:৭-১৩; লুক ৬:১২-১৬, ৯:২-৬)

1ইশুহা বার্চো য়োংতোংবিহিং মোউমসা সিংঙোবিহিং নোপাওয়া আসা তাংসা য়োংন্যা, হাইওয়া-মোংওয়াবিহিং সাংপাওয়া অধিকার পিচায়ে। 2ই বার্চো জেংওয়া পোইংবিহা ইবিরাংগা:

নাগাইহা পত্রস তাওয়া সিমোন আসা

আকো এ আনড্রিয়াস,

জোব্দিকো চেংওয়া য়াকুব আসা আকো এ য়হুন্না,

3ফিলিপ আসা

বারথোলোমাই,

থোমা আসা

তোংক্যা জুওয়া মথি,

অল্পোয়সকো চেংওয়া য়াকুব,

থেদিয়োস,

4আসা দেশকো সোতা লুইসুওয়া সিমোন আসা

য়হুদা ইস্করিয়োত, (আকুহা ইশুহিং প্যইপাওয়াগা)।

বার্চো য়োংতোংবিকো কাম

5ইশুহা আকু বার্চোহিংয়া এপা জাংমসা নিংপুয়ে, “নাবিহা দোসরা জ্যাকো দিংঙাবিকোতা আসা সামরিবিকো শহরবিতা মোহো। 6আদো য়াংপুওয়া লুকাবি ত্যাবাপা ইস্রাইলিবিকোতা হোতু। 7আসা দিংঙাবিহিং ‘সেংজাকো রাজ্যহা আবেইতা দেপাদাংতেয়ে’ তামসা হিংপা। 8হাইমবিহিং সাংপা, সিপুমবিহিং ঙারোপা, য্যা চাপুমবিহিং সাংপা আসা জেসাংবিহিং নোপা। নাবিহা এপারাং মুংচায়ো দোসরাবিহিংনে এপারাং পিচা। 9সুন, জাতাং আসা তামাকো ইচে ন্যাস্যারে মোপুগে। 10দোসরা লোইতা হোদাংনুওয়া সিপি, আংদুং, কোরোং আসা জুচোইওয়া দ্রোইংরে মোপুগে, হাংপাতানাহা লুকুইবিহা ঘ্যইওয়া সেই তাংসা মুংচানেরোওয়া।

11“হানি শহর আসা লোইতা নাবি হো, আউতা হাংসু দেংকো চুওয়া দিংঙানি, আকুহিং মো, আসা আকু লোইহিং মাহুইতেনু চোইপা আকোতারাং য়ুং। 12আকো সাতা হোদাংনুওয়া নাতিহিং তিমেপা জিংকো তামসা জাং। 13আকু সাতামি তিমেওয়া য়ুচকোবেওয়া দিংঙা নিনাহা, নাবিকো তিমেওয়াহা আকু সাতা য়ুংরোওয়া। আদো আকুমি তিমেওয়া য়ুচকোবেপা মাতানাহা, নাবিকো তিমেওয়াহা নাবিকোতারাং লায়োংপুরোওয়া। 14দোসরামি নাবিহিং লেই মাতানাহা আসা নাবিকো য়্যইদি মাহিংদানাহা, আকু সা আসা শহরসো নোপাদাংনুওয়া আপনিকো কোকোইকো দুনা আউতারাং ত্যাতে। 15আজিপ্পারাং, কা নাবিহিংয়া জাংরোওয়া, ন্যায়কো দিনতাহা আকু শহরকো দশারোমা সদোম আসা গমোরাকো দশা সহায়কো চুরোওয়া।

16“কাং, কা নাবিহিংয়া দোমাবিকো প্যাকোতা লুকাবিহিং নিংপুমি ত্যাবাপা নিংপুদাংয়ো, আকো সোতা নাবিহা পুইয়া ত্যাবাপা চলাক আসা কুইজা ত্যাবাপা ম্যমম্যইপা জিং। 17আদো দিংঙাবিহিংপা হোশিয়ার য়ুং, হাংপাতানাহা আবিহা নাবিহিংয়া ন্যায় জোওয়া সাতা সাপুরোওয়া, আসা জোংসুওয়া সাতা নাবিহিংয়া সাটাসো ডুরোওয়া। 18নাবিহিংয়া কুং সোতা টেবো কাইজি আসা জাইপুবিকো নাগাইতা জাপারোওয়া, আত্রংরাং নাবিহা আবি আসা দোসরা জ্যাবিকো নাগাইতা কুং নুওয়াং জাংকো মুংরোওয়া। 19আদো হাত্রং আবি নাবিহিং প্যইপাপুই, আত্রংহা হেপা আসা হাং য়্যইনেকোমে তামসা সিংদুমগে, হাংপাতানাহা নাবিহা হাং য়্যইনেকোমে, আত্রংরাং নাবিহিংয়া পিচারোওয়া। 20হাংপাতানাহা য়্যইওয়াহা নাবি আপনিবি মায়্যইরোওয়া, আদো নাবিকো আপাকো লাংবে নাবিকোতা জিংমসা য়্যইরোওয়া।

21“দিংঙাবিহা আপনিকো আপু, এবিহিং স্যাকো স্যইপুরোওয়া। আপাহা চেংওয়া চেমেহিং, আসা চেংওয়া চেমেহা আপা আয়ুকো তোইতা বিরোধ জোরোওয়া আসা আবিহিং স্যাপারোওয়া। 22কুং সোতা নাবিহিংয়া তাংসা আচকাপা জোরোওয়া। আদো নোইস্যা চোইপা হাংসু সাডুংপা য়ুং, আকুহা উদ্ধার মুংচারোওয়া। 23হাত্রং আবি নাবিহিং ইচো শহরতা কোইচ্যাপা, আত্রংহা ইদ্যাতা ক্যাপু, হাংপাতানাহা আজিপ্পারাং কা নাবিহিং জাংরোওয়া, দিংঙাকো চেংওয়া লেনুরোমা নাগাইহা নাবিহা ইস্রাইলকো তাংসা লোই শহরবিতা এনতাওয়া দেরেং হিংপাওয়া মাত্যইয়াংরোওয়া।

24“য়োংতোংহা আপনিকো উটকেওয়ারোমা আসা ডেইয়াহা আপনিকো গিরিওয়ারোমা টেবো মাজিংমগা। 25য়োংতোংহা আপনিকো উটকেওয়া আসা ডেইয়াহা আপনিকো গিরি ত্যাবাপা জিংনেরোওয়া। এপারাং দিংঙাবিমি কা সাকো গিরিহিংনাং সিংঙোকো জাইপু বালজিবুল1 তানাহা, ঝান কুং সাকো দিংঙাবিহিংয়া হাং জাংকোগা?

26“আকো সোতা আবিহিংপা মাচ্ছুংগে, হাংতানাহা তুংমসা মাতিংওয়া আসা গুংমসা সিদা মাচ্যইওয়া হাইরে মোতো। 27হানি নুওয়াং কা নাবিহিং নাঘিওয়াতা জাং, আকুহা নাবিহা হাহাইওয়াতা জাংপি, আসা হাই নুওয়াং নাবি নানুংতা হিংমমে, আকুহা সাকো গুইপুসো সাডিংপা ঙামসা হিংপা। 28জুপাহিং মেংচে স্যাওয়া, আদো লাংবেহিংয়া স্যামক্যইওয়া আবিহিংপাহা মাচ্ছুংগে, আকুরোমাহা লাংবে আসা জুপা নিহসোহিংসা নরকতা দাংপাকো চুওয়া সেংজাহিংপা মেংচে চুসুং। 29ইচে পাইসাতা নিহপু বাংগেরা জিয়া মোলোংমগা? আবিকো প্যাকোতাহা ইপুরে নাবিকো আপাকো ইচ্ছা মাতাপা লিতা মাহুইমগা। 30এপারাং সেংজাহা নাবিকো পোরোকো পুরিংরে তাংসা চেংমি নিও। 31আকো সোতা নাবিহা মাচ্ছুংগে, নাবিহা উইসে বাংগেরাবিরোমা সিওপা পাংক্যইপা নিও।

32“কাং, হাংসু দিংঙাবিকো নাগাইতা কাহিং স্বীকার জো, কারে আকুহিংয়া লোডিংবাতা নিওয়া কুং আপাকো নাগাইতা স্বীকার জোরোওয়া। 33আদো হাংসু কাহিং দিংঙাবিকো নাগাইতা ইন্কার জো, আকুহিংয়া কারে লোডিংবাতা নিওয়া কুং সেংজা আপাকো নাগাইতা ইন্কার জাংরোওয়া।

34“কা বাসিমতিতা তিমেওয়া পামসা লেয়ো তামসা নাবিহা মোনোগে। তিমেওয়া পাওয়া মোকো, আদো তালওয়ার চালাইকো কা লেমগা। 35হাংপাতানাহা কা চেংওয়াহিংয়া আকো আপাকো তোইতা, আসা চেমেহিংয়া আকো আয়ুকো তোইতা, আসা নামাহিংয়া আকো জুমেকো তোইতা মেংতাপা জোপাকো লেমগা। 36দিংঙাকো দুসমনহা আকো আপনিকো সাকো নাপোকোরাং নিরোওয়া।

37“হাংসু কাহিংরোমা সিওপা আপনিকো আয়ু আপাহিং জেজেংপা জো, আকুহা কুং য়োংতোং জিংকোবেপা মোতো। হাংসু কাহিংরোমা সিওপা আপনিকো চেংচুংহিং জেজেংপা জো, আকুরে কুং য়োংতোং জিংকোবেপা মোতো। 38হাংসু আপনিকো ক্রুস পুমসা কুং নুনুই মাহুই, আকুরে কুং য়োংতোং জিংমক্যইরোওয়া। 39হাংসু আপনিকো সাদিহিং বাচাইকো কেং, আকুহা য়াংপারোওয়া, আসা আপনিকো সাদি কুং সোতা য়াংপামবিহা আকুহা বাচাইরোওয়া।

40“হাংসু নাবিহিং গ্রহন জো, আকুহা কাহিং গ্রহন জোমগা, এপারাং কাহিং গ্রহন জোমবিহা কাহিং নিংপুওয়াহিং গ্রহন জোমগা। 41অগমবক্তাহিংয়া ‘অগমবক্তাগা’ তামসা স্বাগত জোওয়াহা অগমবক্তাকো ত্যাবাপারাং ইনাম মুংচারোওয়া। এপারাং সেংজাকো নাগাইতা তাংজি তিংওয়া দিংঙাহিং স্বাগত জোওয়াহা আকো ত্যাবাপারাং ইনাম মুংচারোওয়া। 42হাংসু ই আপেবিতাহা ইচোহিং কুং য়োংতোং নোমসা চাওয়াংওয়া এক গ্লাস তি পেয়াং, আকুহা হাত্রংরে আপনিকো ইনামহা মায়াংপারোওয়া।”