মথি 11

ইশু আসা বাপ্তিস্মা পিচাওয়া য়হুন্না

(লুক ৭:১৮-৩৫)

1আপনিকো বার্চো য়োংতোংবিহিং ই নুওয়াং আজ্ঞা জোপুনতেনুকো নোইতাহা ইশুহা গালীলকো দিংঙাবিহিং ঝিপাকো আসা এনতাওয়া দেরেং হিংপাকো শহরতা হোয়ে।

2বাপ্তিস্মা পিচাওয়া য়হুন্না জেলতা নিনুওয়া, আকুহা ইশুকো জোওয়া কামবিকো তোইতা হিংয়ে। আকুহা আপনিকো ইচো নিহসো য়োংতোংবিহিং মোউমসা ইশুকোতা উইকো নিংপুয়ে, 3আবিহা ইশুকোতা ওয়াংমসা ই নুওয়াং উইয়ে, “কাবিকো আশা জোওয়া মুক্তি পিচাওয়া জাইপু খ্রীষ্টহা নাতিরাংগা না কাবিহা দোসরাহিং খুইচাকোগা?”

4ইশুহা আবিহিং জাংয়ে, “নাবিহা হাং-হাং তিংদিংমে, আসা হিংদিংমে, হোমসা আকু নুওয়াংরাং য়হুন্নাহিং জাংয়াপি, 5মিচো মিতিংমবিহা তিংদিংনা, তেইমক্যইমবিহা তেইদিংনা, য্যা চাপুওয়াবিহা সাংদিংনা, নানুং মাহিংওয়াবিহা হিংদিংনা, সিপুমবিহা ঙারোদিংনা আসা জোরোংবিহা এনতাওয়া দেরেং হিংচা মুংদিংনা। 6কুং তোইতা শংঙ্কা মোজোওয়া দিংঙাহা আশিষিত নিও।”

7য়হুন্নাকো য়োংতোংবি হোপুনতেনুকো নোইতাহা ইশুহা দিংঙাবিহিংয়া য়হুন্নাকো বিষয়তা জাংয়ে, “নাবিহা চিচ্চোওয়া জায়গাতাহা হাং কাংকো হোমগা? বিংঙাসো য়াপাদিংওয়া মিপাহিংগা? 8না হাং কাংকো হোমগাসা? না এনতাওয়া এনতাওয়া আংদুং লুওয়া দিংঙাহিং কাংকো হোমগা। এনতাওয়া এনতাওয়া আংদুং লুওয়া দিংঙাবিহা জাইপুবিকো য়ুংওয়া সাতামি মায়ুংমগা। 9আজিপ্পারাং জাংকে নাবিহা হাং কাংকো হোমগা? না অগমবক্তাহিংগা? ওই, আজিপ্পামি জাংদানাহা, নাবিহা অগমবক্তারোমা ইচো টেবো দিংঙাহিং তিংমি নিও। 10হাংপাতানাহা তাংজিকো হিগাতাহা সেংজাহা য়হুন্নাকো তোইতারাং এপা জাংমি নিও, ‘কাং, কা নাকো নাগাই নাগাই কুং পোইংহিং নিংপুরোওয়া, আকুহা নাকো ন্যাতাহিং তৈয়ার জোরোওয়া।’

11“আজিপ্পারাং কা নাবিহিং জাংরোওয়া, বাপ্তিস্মা পিচাওয়া য়হুন্নারোমা টেবো দিংঙাহা মেকেয়াংতো। আদো সেংজাকো রাজ্যতা হাংসু তাংসারোমা চিয়োপা নি, আকুহা য়হুন্নারোমারে টেবো জিংরোওয়া। 12বাপ্তিস্মা পিচাওয়া য়হুন্নাকো এনতাওয়া দেরেং হিংপাওয়া সময়সোহা নেচোইপা সেংজাকো রাজ্যহা সিওপারাং নাগাই গ্যইদিংমি নিও, আসা বিরোধ জোমবিহা সেংজাকো রাজ্যকো তোইতা সিওপারাং জিয়োকো কেংদিংয়ো। 13বাপ্তিস্মা পিচাওয়া য়হুন্নাকো সময় চোইপা মোসাকো লিংপাং আসা তাংসা অগমবক্তাবিহা সেংজাকো রাজ্যকো বিষয়তা য়্যইমি নিও। 14আসা আবিকো জাংওয়া নুওয়াংমি দেংনাহা আবিকো লেরোওয়া তাওয়া এলিয়াহা য়হুন্নারাংগা। 15হাংসুকো হিংওয়া নানুং নি, আবিহা হিংকো।

16“হিনি জুকুংকো দিংঙাবিহিংয়া কা হাংসুহিংপা নোওকোগা? আবিহা হাতিতা গামসা আপনিকো ব্যারোবিহিংপা এপা য়্যইওয়া আপেবি ত্যাবাপা নিও,

17‘কাবিহা নাবিকো সোতা য়াংতাওয়াকো বাসি মুইয়ে, আদো নাবিহা মায়ৌতো।

কাবিহা লোচো পেংঙেংওয়া লেহদি লেদো, নাবিহা মাকাইতো।’

18“য়ু মাআংওয়া আসা উপাস য়ুংওয়া য়হুন্না লেয়ে, আকুহিংয়া নাবিহা জেসাং বাইওয়া দিংঙা তামসা জাংমগা। 19কা দিংঙাকো চেংওয়াহা চাপা-আংপামসা লেয়ো, আদো কাহিংয়া ‘কাং, আকু মায়াওয়া, গাইব্রে, তোংক্যা জুওয়া আসা পাপিবিকো ব্যারো তামসা দোষ তিংপায়ো!’ সেংজাকো দুংজিহিংয়া আকো ফলসোরাং ঠিক তিংপারোওয়া।”

পাপসো মালায়োংওয়াবিহিং হোশিয়ার

(লুক ১০:১৩-১৫)

20হানি শহরবিতা ইশুহা উইসে আআংপেপেচপুওয়া কামবি জো, আকু শহরকো দিংঙাবিহা আপনি আপনিকো পাপহিং মাল্যাওয়াকো সোতা আকুহা আকু শহরকো দিংঙাবিহিংয়া সাডিংপা ঙামসা এপা জাংয়ে 21“ও খোরাজিম আসা বেথসেদাকো দিংঙাবাই, নাবিকো তোইতাহা টেবো দুঃখ দেপায়ে, হাংপাতানাহা নাবিকো প্যাকোতা জোওয়া আআংপেপেচপুক্যইওয়া কামবিহা তুরোস আসা সিদোন শহরতা জোনাহা, আকো দিংঙাবিহা নাগাইসোরাং পাপহিং ল্যাকোগা আসা পাপহিং ল্যাওয়া তিংপাকো সোতা বোরাকো আংদুং লুমসা চেকা নাইকোগা। 22কা নাবিহিংয়া জাংরোওয়া, ন্যায়কো দিনতাহা নাবিকো দুঃখরোমাহা সেংজাহা তুরোস আসা সিদোনকো দিংঙাবিকো দুঃখরাং সহায়কো চুওয়া জিংরোওয়া।” 23“ও কোর্ফরনহুমকো দিংঙাবাই! নাবিহা লোডিংবাতা দেকারো তাওয়া নোমগা? নাবিহা নরকতারাং দেকারোওয়া, হাংপাতানাহা সদোমতারে নাবিহিং ত্যাবাপা আআংপেপেচপুক্যইওয়া কাম তিংপানাহা সদোম শহরহা নেচোইপা নিদিংকোগা। 24আদো কা নাবিহিং জাংরোওয়া, ন্যায়কো দিনতাহা নাবিকোরোমাহা সদোম শহরকো দিংঙাবিকো দন্ড সহায়কো চুরোওয়া।”

য়াপুমবিহিং শাপাওয়া

(লুক ১০:২১-২২)

25আত্রংহা ইশুহা পাচাইয়ে, “ও সেংজা আপা, লোডিংবাসো বাসিমতিকো গিরি, কা নাতিহিংয়া গারানি তারোওয়া, হাংপাতানাহা নাতিহা ই নুওয়াংহিংয়া দুংজি আসা নোচেং নিওয়া দিংঙাবিসো ম্যইমসা এয়ো, আসা আপেবিবেপা জিংওয়া দিংঙাবিহিংয়া তিংপায়ো। 26আজিপ্পারাং আপা, নাতিহিংয়া এপা জোওয়ারাং এনতায়ো।”

27ইশুহা দিংঙাবিহিংয়া জাংয়ে, “কুং আপাহা কাহিংয়া তাংসা নুওয়াং ত্যইমি নিও। আপা ল্যামসা চেংওয়াহিংয়া হাংসুরে মানাইমগা আসা চেংওয়া ল্যামসা আপাহিংনে হাংসুরে মানাইমগা। আদো চেংওয়াকো নাইপাপিওয়াবিহা আপাহিংয়া নাইমগা।

28“ও ব্যা পুমসা য়াপুমবাই, নাবি তাংসা কুংতা ওয়াং, কা নাবিহিংয়া শাকো পিচারোওয়া। 29কুং তোং পুউ, আসা কাহিংপা ঝি, হাংপাতানাহা কুং তুংসিংতা সাংমেওয়া আসা মেসেদ্রাংওয়া নিও আসা নাবিহা লাংবেতা শাচা মুংরোওয়া। 30হাংপাতানাহা কুং তোংহা জাংতোংপা নিও, আসা কুং ব্যাহা ফেলেংপা নিও।”