২ পত্রস 3:9

প্রভুকো দিন

1ও জেজেংওয়া ব্যারোবাই, ই নাবিহিং লাদাংওয়া চিঠিহা দোস্রো চিঠিগা। ই চিঠিতাহা এপা জিংওয়া নুওয়াংবিকো প্যারাতাংপামসা নাবিকো চোসোওয়া নোচেংবি উৎসাহ জোকো কেংমগা। 2নাগাইকো সময়তা পবিত্র অগমবক্তাবিকো আগমবাণী আসা জেংওয়া পোইংবিকো হিংপাওয়া য়োংকো প্রভু আসা মুক্তি পিচাওয়াকো আজ্ঞাহিং নাবিহা মালারিংওয়া কা ইচ্ছা জোরোওয়া। 3হাংসুরোমা নাগাইহা নাবিহা কোইনেরোওয়া, নোইস্যাকো দিনবিতাহা ল্যস্যইপাওয়াবিহা ল্যস্যইপামসা, আপনিকো অভিলাষাতা এপা জাংমসা ওয়াংরোওয়া, 4“খ্রীষ্টহা ন্যাসা লেরো তামসা প্রতিজ্ঞা জোমকোতাসা? য়াংবিকো আজা আটাবিহা সিপুমসা হ্যাপুয়ে, আদো বাসিমতি দিংনুসো চলেওয়া তাংসা নুওয়াংবিহা হেপা নিমমে এপারাং চলেদিংয়ো।” 5আবিহা গে-গেপারে সৃষ্টিকো নুওয়াংবিহা মেগেমবেপা জোমগা। সেংজাহা আকো য়্যইদিসো নাগাইসোরাং লোডিংবা সৃষ্টি জোয়ে, আসা বাসিমতিহা তিসো আসা তিসোরাং য়োইমি নিও। 6আকু তিসোরাং আকু সময়কো বাসিমতিহা ব্যান্যা হ্যামসা দাংপুয়ে।1 7আদো নেকো নিওয়া ডিংবা আসা বাসিমতিহিংনে মেতা অংপাকো সেংজাকো আকু য়্যইদিসোরাং জোগাইমসা এমি নিও। সেংজাহিং মামানেওয়া দিংঙাহিং দোষি তিংপামসা মাদাংপানু চোইপা ডিংবা আসা বাসিমতিহা য়ুংরোওয়া।

8আদো ও জেজেংওয়া ব্যারোবাই, ই ইচো নুওয়াং মালারিং, প্রভুকো সোতাহা সাইয়ুহা এক হাজার লো ত্যাবাপাগা আসা এক হাজার লোহা সাইয়ু ত্যাবাপা নিও।2 9লেরা-লেরাবিকো নোমি ত্যাবাপা প্রভুহা আপনিকো প্রতিজ্ঞা পুরা জোকোহা মোগোই পামগা, আদো নাবিহা হাংসুরে মাদাংকো তামসা আকুহা ইচ্ছা জোমগা, আসা তাংসা পছসাতাপ জোমসা আকোতা ওয়োংকো তামসা আকুহা ধর্য্য জোমসা খুইদিংমি নিও।

10আদো প্রভুকো ন্যায়কো দিনহা কুইমবি ত্যাবাপা একবিরি লেরোওয়া। আত্রংহা ডিংবাহা টেবো আওয়াজ জোমসা য়াংপুরোওয়া, ডিংবাকো ফুইমা, গ্রহ-নক্ষত্রবি, বাসিমতি আসা আউতা নিওয়া তাংসা নুওয়াং মেহসো ওংপুমসা ভষ্ম জিংপুরোওয়া। 11এপারাং ই তাংসা নুওয়াংবিহা এপা দাংপুমসা হ্যাপুরোওয়া। আকো সোতারাং নাবিহা হেপাজিংওয়া সাদিতা য়ুংনেকোগা? নাবিহা পবিত্র আসা ভক্তি জোওয়া সাদিতা য়ুং। 12আসা নাবিহা সেংজাকো আকু দিনহিং খুইমসা আকু দিনহা সেন্নেপা দেয়োংকো তামসা কোশিষ জোমসা য়ুং। আকু দিনতাহা ডিংবাবিহা মেসো ওংপুমসা গ্রহ-নক্ষত্রবিরে গোলেচপুমসা হ্যাপুরোওয়া। 13আদো য়াংবিহা সেংজাকো প্রতিজ্ঞা জোওয়া আকু চুবে বাসিমতি আসা চুবে লোডিংবাকো ন্যাতা কাংদিংয়ো। আউতাহা তাংজিবি মেংচে য়ুংরোওয়া।

14আকো সোতা ও জেজেংওয়া ব্যারোবাই, আকু দিনকো সোতা খুইনুওয়া সেংজাকোতা তিমেওয়া আসা দাগ মাতাপা নির্দোষ য়ুংকো কোশিষ জো। 15প্রভুহা নাবিহিং পাপসো বাচেকো মৌকা পিচানুওয়া আকুহা হাসেকো ধিরোজি নিমমে, আকুহা ধ্যান জো। য়াংবিকো জেজেংওয়া এ পাউলরে সেংজাকোসো মুংচাওয়া দুংজিসো ইরাং নাবিহিংয়া লামি নিমগা। 16ইকো বিষয়তা আকুহা এপাজিংওয়া নুওয়াং আপনিকো চিঠিবিতা লামি নিমগা। আকো লাওয়া লেরা নুওয়াংবিহা কোইকো হোমরাইপা নিও। মেগেওয়া আসা হোহোইরারাওয়া দিংঙাবিহা আকো তুইপেং-দাংপেং অর্থরে লাগাইমগা। আবিহা তাংজিকো হিগাকোরে এপারাং অর্থ লাগাইমগা। আকো সোতা আবিহা আপনিহিং দাংপুওয়াতা দেপামগা। 17আদো ও জেজেংওয়া ব্যারোবাই, নাবিহা ই তাংসা নুওয়াং নাগাইসোরাং সিদা চ্যইনতেও। আকো সোতা হোশিয়ার জিং। এপা জিংনুওয়া দুষ্টবিহা নাবিহিংয়া ওইরোইপোইকো মাছুরোওয়া আসা আপনিকো সাডুংপা হুইংদ্যাওয়া জায়গাসোহা মিইরোওয়া। 18আদো য়াংবিকো প্রভু আসা মুক্তি পিচাওয়া ইশু খ্রীষ্টকো অনুগ্রহতা আসা জ্ঞানতা গ্যইপু-গ্যইপুমসা হোসি। আকুহিংয়া নে আসা হাত্রংদো মহিমা জিংকো। আমেন!