২ পত্রস 2

প্যায়োং ঝিপামবি

1হেপা ইস্রাইলি দিংঙাবিকো প্যাকোতা প্যায়োং অগমবক্তাবি নিমমে, এপারাং নাবিকো প্যাকোতারে ঝিপামবি ওয়াংরোওয়া। আবিহা দাংপাওয়াতা দেপাওয়া প্যায়োং ঝিপাওয়া পারারোওয়া আসা আপনিহিং উদ্ধার পিচাওয়া প্রভুহিংনে ইন্কার জোরোওয়া। এপারাং আবিহা আপনিকো তোইতা একব্রি দাংপুওয়াতা পারারোওয়া। 2আসা হুইসে দিংঙাবিহা আবিকো আচকাক্যইওয়া ন্যাতাকো নুনুই হুইরোওয়া আসা আবিকো সোতা আজিপ্পাকো ন্যাতাকোরে বদনাম জিংপুরোওয়া। 3আসা লোভ-লালাচতা পোরেমসা আকু প্যায়োং ঝিপামবিহা নুওয়াং বানাইমসারাং নাবিকোসো ফাইদা লাংরোওয়া। নাগাইসোরাং আবিকো দন্ডকো নুওয়াংহা নির্ণয় জিংপুনতেয়ো, আবিহিং দন্ড পিচাওয়া সেংজাহা মাজিংয়াংতো।

4লোডিংবাকো পোইংবি পাপ জোনুওয়া সেংজাহা আবিহিংনে বাঁকী মেএতো, আদো আবিহিংয়া নরকতা বাডোইপুয়ে। আউতা আবিহিংয়া সিংপাংকো নাঘিওয়াতা জিংমসা টেবো ন্যায়কো দিন চোইপা এমি নিও। 5সেংজাহা নাগাইকো বাসিমতিহিংনে বাঁকি মেএতো, সেংজাহিং ভক্তি মোজোওয়া বাসিমতিহিংয়া ব্যান্যা হ্যাপামসা দাংপাপুয়ে, আদো তাংজিকো নুওয়াং হিংপাওয়া নোহা আসা আকো প্যাপ্যাম্যাম্যাকো নীচো দিংঙাবিহিং বাচাইয়ে।1 6সেংজাহা সোদোম আসা গোমোরা শহরবিহিংয়া হাইরে মাতাক্যইপা মেহসো ওংপাপুয়ে। এপারাং সেংজাহিং মামানেওয়াবিকো গতিহা হেপা জিংমমে, আবিহিংয়া ইহা ইচো উদারণ জিংপুয়ে।2 7সেংজাহা তাংজি নিওয়া লুতহিংয়া বাচাইয়ে। আকুহা দুষ্ট দিংঙাবিকো আজক্যাক্যইওয়া কামসোহা দুঃখিত জিংপুমি নিমগা। 8আকু তাংজি নিওয়া লুতহা দুষ্ট দিংঙাবিকো প্যাকোতা য়ুংনুওয়া জেইসুং লিসুং এপা আজকাক্যইওয়া কামবি তিংনুওয়া আকো তুংসিংহা দুঃখিত জিংপুয়ে। 9আকো সোতা তাংজি নিওয়া দিংঙাবিহিংয়া পরিক্ছাসো বাচাইকো আসা দুষ্টবিহিং সজায় পিচাকো সোতা ন্যায়কো দিন চোইপা সাঁচেমসা একোহা প্রভুহা গেমগা। 10বিশেষ জোমসা আবিহিং, হাংসু আচকাক্যইওয়া অভিলাষাকো কাম জোমমে, আসা অধিকারহিং হেলা জোমমে, ইবিহা মুজুই-ম্যাল্যাওয়া আসা পুংটা জিংমগা, আসা লোডিংবাকো প্রাণীবিকো বেইজত জোকোরে মাচ্ছুমগা, 11আদো লোডিংবাকো পোইংবি, হাংসু শক্তিশালি আসা টেবো নিমমে, আবিহা আকু লোডিংবাকো প্রাণীবিহিংয়া প্রভুকো নাগাইতা নিন্দা জোমসা দোষ মাতিংপামগা। 12আদো ই দিংঙাবিহা আজকাক্যইওয়া সভাউসো কাম জোমগা। আবিহা প্যইমসা স্যানেওয়া চুংচাকো সেংচেংবি ত্যাবাপা নিও। আবিহা কোইকোরে মোকোইওয়া নুওয়াংবিকো নিন্দা জোমগা। এপা জিংপুনুওয়া আবিরে চুংচাকো সেংচেংবি ত্যাবাপা দাংপুমসা হ্যাপুরোওয়া। 13আবিহা দোসরাহিং দুঃখ পিচাওয়াকো সোতা আপনিবিরাং দুঃখ পুউনেরোওয়া। আবিকো সোতা য়াংতাওয়াকো অর্থহা জেইসুংরাং জুপাকো ইচ্ছাবি পুরা জোওয়াগা। আবিহিংপা চাকো-আংকো গাকোরাং নাবিকো সোতাহা লেফেপাওয়া আসা অপমানকো নুওয়াংগা। আবিহা হাত্রংদো প্যায়োং-কোইজাং য়্যইকো মন পরেমগা। 14আবিকো মিচোহা হাত্রংদো নুংনাংওয়াসো মেইপুওয়া নিমগা, আসা হাসে পাপ জোদো আবিহিংয়া মাতেংমগা। আবিহা লাংবেতা কমজোর নিওয়া দিংঙাবিহিং ফসাইমগা। আবিকো তুংসিংহা লোভ জোওয়াতা লোংস্ত্যাইওয়া নিমগা। আবিহা লেইসাওয়া দিংঙাগা। 15আবিহা এনতাওয়া ন্যাতা হুইতেমসা মেংতাওয়া ন্যাতাকো নুনুই হুইপুয়ে, হাংপাতানাহা আবিহা বওরকো চেংওয়া বালামকো চালতা তেইপুয়ে, হাংপাতানাহা বালামহা পাপকো কামাইতা লাগেওয়া নিমগা।3 16এপা পাপ জোনুওয়া আকুহা য়েংদি য়াচায়ে। মোয়্যইওয়া গধাহা দিংঙাবেপা য়্যইমসা আকু অগমবক্তাকো তোউজিকো কামহিং য়োইয়ে।

17এপা জিংওয়া দিংঙাবিহা সিইপুওয়া তিকো পাটিং আসা বিংঙা-ঝেসেসো ভুইপুওয়া গুইংতুওয়া বেপাগা। ইবিকো সোতাহা সেংজাহা নাটুংক্যইওয়া সিংপাং এমি নিও। 18আবিহা পুংটা আসা তোউজি নুওয়াংবি য়্যইমগা আসা জুপাহিং লোভ জিংওয়া কামবি জোমসা নেগাতিগা মেংতাওয়া ন্যাতাসো নোপামবিহিং ফসাইচামগা। 19আবিহিং স্বতন্ত্র জোপিরোওয়া তামসা প্রতিজ্ঞা জোচাংমগা, আদো আপনিহা দাংপুওয়া লোংস্ত্যাইওয়াকো ডেইয়া নিমগা, আদো হানি নুওয়াংসো দিংঙাহিং জিয়ো, দিংঙাহা আকোরাং ডেইয়া জিংপুমগা। 20আদো আবিহা য়োংকো প্রভু আসা মুক্তি পিচাওয়া ইশু খ্রীষ্টহিং নাইমসা দুষ্ট নুওয়াংবিসো নোপুমতেনুকো নোইতাহা দিংঙাহা ন্যাসারাং পাপতারাং ফাসেচপুমসা আকো অধীনতামি পরেনাহা, আবিকো অবস্থাহা নাগাইকোরোমা ঝান মেংতাপা জিংপুরোওয়া। 21হাংপাতানাহা সেংজাকো আজিপ্পাকো তাংজিকো ন্যাতা গেমসারে আপনিকো মুংচাওয়া পবিত্র আজ্ঞাহিং মামানেনাহা, আকুহা ই ন্যাতাকো তোইতাহা হাত্রংরে সিদা ম্যইচ্যইওয়ারাং আসল জিংকোগা। 22আবিহা এপা জিংওয়া জাংদি বেপা নিও, “কিয়াহা আপনিকো ও্যইওয়ারাং লায়োংমসা চাপুমগা”4 আসা “তি হুপাওয়া পাকাহা ন্যাসারাং লাদিংতা কেরোউমগা।”