Toto
২ পত্রস 1
ইশু খ্রীষ্টকো ডেইয়া আসা জেংওয়া পোইং কা সিমোন পত্রস কাবিকো সেংজা আসা মুক্তি পিচাওয়া ইশু খ্রীষ্টকো তাংজিতা কাবি ত্যাবাপা পাংক্যইওয়া দেংওয়া মুংচামবিহিং: নাবিহা সেংজা আসা ইশু য়োংকো প্রভুকো জ্ঞানতা অনুগ্রহ আসা তিমেওয়াহা নাবিকোতা সিওপারাং জিংপুমসা হোকো।
সেংজাকো মোউওয়া আসা জেংওয়া
পবিত্র সাদিতা য়ুংকো সোতা ঘ্যইওয়া তাংসা নুওয়াং সেংজাকো সেসোরাং মুংচামি নিও, হাংপাতানাহা আপনিকো মহিমা আসা ভলাইসো মোউওয়া সেংজাহিং য়াংবিহা নাইমি নিও। এপারাং আকো প্রতিজ্ঞা জোওয়া টেবো আসা পাংক্যইওয়া ঙেরোং য়াংবিহিং পিচামি নিও। ইকো কারণহা ই প্রতিজ্ঞাসোহা নাবিহা ই বাসিমতিতা নিওয়া দাংপাওয়া মেংতাওয়া ইচ্ছাসো নোপামসা সেংজাকো সভাওতা সহভাগী জিংকো তামসাগা। আকো সোতা হাসে ছুবা নাবিকো দেংওয়াতা ভলাই থোপেকো কোশিষ জো। আসা ভলাইতা জ্ঞান থোপে, জ্ঞানতা সহায়ওয়া থোপে, সহায়ওয়াতা ধর্য্য থোপে, ধর্য্যতা ভক্তি থোপে। ভক্তিতা আপু এবিকো লামতুওয়া, আসা আপু এবিকো লামতুওয়াতা জেজেংওয়া থোপে। হাংপাতানাহা নাবিহিং ঘ্যইওয়া গুনহা ইরাংগা আসা ই গুনমি সিওপা নিনাহা, নাবিহা কাবিকো প্রভু ইশু খ্রীষ্টকো জ্ঞানতা ই নুওয়াংবিসোহা নাবিহিংয়া কাম মাতাপা আসা ফল মাতাপা জিংপুওয়াসোহা বাচাইরোওয়া। আদো ই গুন মাতামবিহা তানাংকো নুওয়াংহিং মাতিংওয়া অন্ধবি বেপাগা। আবিহা আপনিকো নাগাইকো পাপ দুপুনতেওয়ারে লারিংপুনতেওয়া নিমগা।
আকো সোতা জেজেংওয়া ডুওয়া এবাই আসা হুম্রিবাই, সেংজাকো নাবিহিং মোউওয়া আসা জেংওয়াহিংয়া পক্কা জোকো কোশিষ জো, হাংপাতানাহা নাবিমি এপা জোনাহা নাবিহা আপনিকো দেংওয়া হাত্রংরে ম্যাল্যারোওয়া। হাংপাতানাহা এপারাং য়োংকো প্রভু আসা মুক্তি পিচাওয়া ইশু খ্রীষ্টকো অনন্ত রাজ্যকো নাপোতা নাবি হোনুওয়া টেবো স্বাগত মুংরোওয়া।
তাংজিকো হিগাকো আগমবাণী
আকো সোতা কা নাবিহিংয়া ই নুওয়াং হাত্রংদো প্যারাতাংপারোওয়া। কোকোহা নাবিহা ই তাংসা নুওয়াংহা গেমিরাং নিও আসা নাবিকো মুংওয়া আজিপ্পাতা নাবিহা সাডুংপা নিও। কা বাচেনু চোইপা নাবিহিংয়া ই নুওয়াংকো হাত্রংদো প্যারাতাংপাকো ঠিক নিও তামসা কা নোরোওয়া, হাংপাতানাহা ই কুং মোংটোকো জুপাহা ন্যাপারাং হুইতেরো তামসা কাহা গেমি নিও। ইহা য়োংকো প্রভু ইশু খ্রীষ্টরাং স্পষ্ট তিংপায়ে। কা সিপুনতেনুকো নোইতারে ই নুওয়াংবিকো প্যারাতাংকো ছুকো তামসা ছুওয়া সেই কা নাবিহিংয়া হাত্রংদো কোইপারোওয়া।
য়োংকো প্রভু ইশু খ্রীষ্টকো টেবো মহিমা আসা সেতা ন্যাসারাং লেরোওয়া তাওয়া কাবিহা নাবিহিংয়া বানাইমসা জাংওয়া মিংচিকো ভরতা হিংপাওয়া মোকো, আদো আপনিকো মিচোসো কাবিহা আকো টেবো মহিমা তিংয়ো। সেংজা আপাহা আকো আদর আসা সন্মান জোনুওয়া আসা “ইরাং কুং জেজেংওয়া চেংওয়াগা, ইহিংপা কাহা সিওপারাং গাগ্রুপা নিও,” তামসা সেংজাকো মহিমাসো আকুহিং আওয়াজ লেনুওয়া কাবিহা আউতারাং নিমগা। আকুহিংপা কাবি পবিত্র য়্যাগ্যইতা নিনুওয়া লোডিংবাসো লেওয়া ই আওয়াজহা কাবিহা আপনিবিরাং হিংয়ো।
আকো সোতা অগমবক্তাবিকো হিংপাওয়া য়্যইদিতা কাবিহা ন্যাসারাং পক্কা জিংমসা ভরসা এরোওয়া। নাবিহা ইতা ধ্যান জোকোহা এনতাওয়াগা, হাংপাতানাহা ইসোহা আকু দিন মাদেয়াংনু চোইপা আসা নাবিকো তুংসিংতা হাপকুংকো পুইমাকো হাহাইওয়া মালালাইনু চোইপা নাঘীওয়াতা লালাইওয়া দিব্রিকো কাম জোমগা। হাংসুরোমা নাগাইহা নাবিহা ই নুওয়াং কোইনেরোওয়া, তাংজিকো হিগাতা আগমবাণী জাংওয়া নুওয়াংহা অগমবক্তাকো আপনিকো নোচেংসো নোওয়া মোকো। হাংপাতানাহা দিংঙাকো ইচ্ছাসো হাইরে আগমবাণী মেলেতো, আদো পবিত্র লাংবেসো প্রের্ণা মুংমসা দিংঙাবিহা সেংজাকো কাটুসো জিংমসা য়্যইমগা।
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.