১ য়হুন্না 1

সাদিকো য়্যইদি

1সাদিকো আকু য়্যইদিকো বিষয়তা, হানি শুরুসোরাং নিমমে, হানি কাবি হিংমি নিমমে, হানি কাবিকো মিচোসো কাবি তিংমি নিমমে, হানি কাবি কাংমমে আসা কাবিকো খুইসো সুমমে, 2হাত্রং ই সাদি তিংরেমমে, কাবিহা তিংয়ো আসা গাওয়াই পিচারোওয়া আসা নাবিহিংনে জাংরোওয়া, ই হাত্রংরে মাসিওয়া সাদিহা আপাহিংপা নিমগা আসা য়াংবিকোতা তিংরেমগা। 3কাবি হানি তিংমি নিমমে আসা হিংমি নিমমে, আকুহা কাবি নাবিহিং হিংপাদিংয়ো, হাংপাতানাহা কাবিহিংপা নাবিকো সংঙ্গতি জিংকো। য়াংবিকো সংঙ্গতিহা আপা আসা আকো চেংওয়া ইশু খ্রীষ্টহিংপা নিও। 4কাবিহা ই নুওয়াংহা ইকো সোতা লামগা, য়োংকো গাগ্রুওয়া পুরা জিংকো তামসা।

সেংজাহা হাহাইওয়াগা

5নেহা য়াংবি সেংজাকো চেংওয়াকোসো হিংওয়া দেরেংহা ইরাংগা: সেংজারাং হাহাইওয়াগা আসা আকোতাহা নাটুংওয়া তাওয়াহা আদ্যইসোরাং মোতো। 6য়াংবিবেমি আকুহিংপা সংঙ্গতি জোমি তামসা জাংনাহা আসা নাটুংওয়াতারাং য়ুংনাহা, য়াংবিকো কাম জোওয়া আসা য়্যইওয়াহা নিহদ্যাসারাং প্যায়োংগা। 7আদো আকুহা হাহাইওয়াতা নিমি ত্যাবাপারাং য়াংবিরে হাহাইওয়াতা তেইনাহা, ইচোহা ইচোহিংপা সংঙ্গতি জিংরোওয়া, আসা সেংজাকো চেংওয়া ইশুকো য়ুতিসো য়াংবিহিং তাংসা পাপসো শুদ্ধ জোরোওয়া। 8য়াংবিবেমি আপনিকোতা পাপ মোতোনা তামসা জাংনাহা য়াংবিহা আপনিহিংনাং ধোকা পিচাদিংয়ো, আসা য়োংকোতাহা আজিপ্পা তাওয়াহা মাতারোওয়া। 9আদো য়াংবিবেমি আপনিকো পাপ সেংজাকো নাগাইতা মানেনাহা আকুহা য়োংকো পাপহিংয়া ছমা জোরোওয়া আসা তাংসা মেংতাওয়া নুওয়াংবিসো শুদ্ধ জোরোওয়া, হাংপাতানাহা আকুহা দেংকো ছুওয়া আসা ন্যায় জোওয়াগা। 10য়াংবিবেমি পাপ মোজোয়াংনা তামসা জাংনাহা য়াংবিহা সেংজাহিংয়া প্যায়োংগা তামসা জাংদিংয়ো, আসা আকো য়্যইদিহা য়াংবিকোতা মাতারোওয়া।