BaHebburu 4

1Nkikaako, Leza wakatupa chisyomezyo chakwe kuti tukanjile mukulyookezya kwakwe, atuyoowe mbukunga umwi wanu ulabetekwa kukukachilwa kuchijana. 2Nkaambo makani mabotu akaza kulindiswe mbuli kulimbabo, pesi makani ngibakamvwa tee akabagwasya pe, nkaambo teebakaabilana lusyomo pe lwabaabo bakali kuswiilila. 31 Nkaambo iswe nitwakasyoma tunjila mukulyookezya ooko, mbuli Leza mbwakaamba kuti,

“Mbuli mbundakakonka mulunyemo lwangu kuti,

‘Choonzyo tabakoyoonjila mukulyookezya kwangu,’ ”

Nikuba kuti milimu yakwe yakali yamanisigwa kuzwa kumalengelo anyika. 42 Nkaambo Leza muli aamwi malembe waamba kuti atala abuzuba bwamusanu aabili, “Alimwi Leza wakalyookezya mubuzuba bwamusanu aabili kuzwa kumilimu yakwe yoonse.” 53 Alubo waamba kuti, “Choonzyo tabakoyoonjila mukulyokezya kwangu.” 6Nkikaako mbukunga kuchili mweenya wakuti bamwi bakanjile mukulyookezya, alimwi aabo bataanzi kukutambula makani mabotu bakakachilwa kunjila nkaambo kakutaswiilila, 74 nkaambo kacheechi, Leza wakabamba chimwi chiindi chibotu mpawo wakachuunika kuti, “Sunu,” nikwakayinda chiindi chilamfu wakaambuula atala acheechi akupa Devidi kuti aambuule majwi akali aambuulwa kale mumalembe kuti,

“Sunu, naa mwalimvwa ijwi lyakwe,

mutayumyi myoyo yanu.”

8Nkaambo kuti Josuwa wakabapa kulyookezya, Leza nikuli takaambula pe muchiindi chitobela atala abuzuba bumbi. 9Aboobo eelyo, kwachaala sabata yakulyookezya kwabantu baLeza, 105 nkaambo kufumbwa unjila mukulyookezya kwaLeza alubo ulaleka kubeleka mbuli Leza mbwaakachita kuli zyakwe. 11Nkikaako atusungwaale kunjila mukulyookezya ooko, kuchitila kuti kutabi usweka anzila iliboobo yakutaswilila.

12Nkaambo ijwi lyaLeza lilapona alimwi lilabeleka, lilimbuli ipanga libosya kwiinda ipanga libosya mabazu woonse, liyasa mane kupambukaniya kwabuumi amuuya amafuwa amumpolyo, akuyanduula miyeeyo aziyanda moyo. 13Alimwi kunembo lyakwe taakwe chilengwa chisisidwe, pesi zyoonse zili antanganana akubikkwa kumeso aakwe ooyo ngutweelede kuyoopandulwida eezyo nzitwakachita.

Jesu Mupayizi Mupati

14Eelyo mbukunga tujisi mupayizi mupati loko wakayinda mumajulu, Jesu, Mwana Mulombe waLeza, atujatisye kulyaaambilila kwesu. 15Nkaambo tatukwe mupayizi mupati utakonzyi kuba aluzyalo mukukompama kwesu, pesi ooyo ulaabulemu boonse wakasunkwa munzila zyoonse mbuli mbutusunkwa, nikuba oobo taakwe naakabisya pe. 16Eelyo ngatuswene afwiifwi abusichaamba kuchuuno chaluzyalo, kuti tukatambule luse akujana luzyalo lutugwasya muchiindi chakubula.