तिचुरोङ क्येला सारबा करारयि किताबतेबा
प्रेरित 20
पावल माकेडोनियाला राङ ग्रिस
हति ठु झि खा छारते पावलयि लोब्टुबाला डाकिला चाँसोङ, राङ हतिबाला छोइ पिन्सोङ, राङ हतिबाने बिदा च्युङदे माकेडोनिया यहला पुइसोङ। हति छेत्रला पुते हतिबाला समस्यु लेइराङ पिन छारते हति ग्रिसला पुइसोङ। ख्युइ हतिया धा सुम बिताइ क्याइसोङ। खो सिरिया यहला डुङगायि लाम्ला ढुल कितितुइना यहुदिबे ख्युइ विरोधला छल क्याक्याइबाति पावलयि माकेडोनियायि लाम्ला लयापयि थाकच्योए क्याइसोङ। तेहि बेरियाला त्योएङानयि पुरसयि पिजायि सोपात्रोस, थेसलोनिके अरिस्तार्खस राङ सिकन्दस, डर्बीका गायस तेहि तिमोथि र एशियायि तुखिकस र त्रोफिमस खो ङ्याबो पुइसोङ। हतिबा ताङलाने राङ क्योपते ङेला त्रोआसला कुँरे त्येतु। तेहि ङे अखमरि लोटा कालापसोलयि ङिनतेबे च्येला फिलिप्पिने डुङगाला ढुल क्याइरे ङिन ङाला त्रोआसला हतिबे तेहा लेप्ते, राङ हतिया ङिन तुन ताते।
पावलयि च्येस्युवा टोरासयि ढुल
हप्तायि ङिमा ताङस्युवाला जब ङे लोटा च्ययापला झोम्दे, तेहि पावलयि ङाइटोतेला ढोसोम क्याक्याइबाति, हतिबा ङ्याबो छान फेला ताम नेन त्येसोङ। ङे झोमदे ताताति थकि कोटाला बत्ति लेइराङ धु। युटिकस मिन क्याक्याइबि स्यारा झि झ्याल्ला त्येतु। पावलयि लेइराङ भेला थु ताम नानाइबाति हति ङि तिङ रिङमुवाला पुइसोङ राङ ङि टोरे हति तला सुमयि थोने टुलसोङ राङ हतिला हतिबे स्यिस्यियाला लाङसोङ। तेहि पावल माला पापसोङ, राङ कुरकुर क्याइरे हतिला क्यालच्यामु क्यापसोङ राङ नाइसोङ, “माझि चिचालानाना हति सोम्बो राङ धु।” 1 तेहि खो याला झिरे तेहि लोटा च्याक्ते साइ छारते नामे साल्बो माच्युङ थु लेइराङ भेला थु ताम नेन त्येसोङ। हति च्येला बिदा च्युङसोङ। तेहि हतिबे हति स्याराला सोम्बो अबस्थाला राङ खेरोसङ राङ लेइराङ छिमा फिङान खुँसोङ।
त्रोआसने मिलेटस थुयि ढुल
ङा ताङलाने राङ डुङगा थु पुते राङ डुङगाला स्योन्दे अस्सोसला पुते। ङे हतिया पावलला हतिया डुङलाला स्योन्दु च्युसोम होए। पावलयि हति च्वरा राङ व्यवस्था क्याइरे खो अस्सोस थु काङबि राङ पुइसोङ।
तेहि जब ख्युइ ङेला अस्सोसला ठाते, ङि खोला डुङगाला स्योन्दु च्युक्ते, राङ मितिलेनेला लेप्ते। हतिने डुङगाला ढुल क्याइरे ङाइटोतेला खियसयि धुनला लेप्छारसोङ, राङ जब सामोसला लेप्छारते। हति स्यान ङिनतेला मिलेटसला लेप्ते। एशियाला भेला बिताइ किसोम मेताति पावल एफिसस मिस्युबा ढोयापयि थाकच्योए क्याइसोङ। चिचालानाना च्युङना पेन्तिकोसयि ङिन यरुश्लेमला राङ क्योपयापयि ख्युइ आत्ति क्याइसोङ।
एफिससयि घोबा काप्पोतेबे पावलयि क्याक्याइबि टाइक्ये
ख्युइ मिलेटसने एफिससला मितेबा चाँरे चर्चयि एल्डरतेबाला क्ये ताङदे चाँसोङ। जब हतिबा ख्युइ तेहा लेप्ते ख्युइ हतिबाला नाइसोङ, “एशियाला कोबा क्याक्याबि ङिमा ताङस्युवाने राङ ङाल भेला पोरो राङ खि उइला काङ किसिमयि बिताइ क्याइसुइ सो खेला राङ छ्या होतो।” पुरा टुङबो च्युङदे छिमा तोङिन राङ, यहुदि छलयि छोए तायापला याङ ङाहि प्रभुयि स्यापच्यि स्युइरे। खेला फाइदा होङयापयि ताम खि धुनला घोषाणा कियापने राङ क्याइरे राङ खिम खिमला पोरोयि धुनला छोइ तेरयापले क्याइरे ङा च्येला मापुता। यहुदिबाला राङ ग्रिकतेबाला घ्योप्पा केरु च्युक्ते कजसुबा यहला लयाप राङ हुइ प्रभु येशु ख्रिष्टयि थोला हिछे भोरयाप नाङानयि तामयि साछि ङाहि पिपिना होतो। “ता तोइ, ङा पवित्र आत्माला बाध्य च्युङदे यरुश्लेम यहला ढुन होए, हतिया ङाल च्हि होङयाप ना सो ङाला च्याङ छ्या मेता। झोम मात्रा छ्या होतो कि भजारला कैद राङ तुका ङाहि थोला परि हुन नाङान पवित्र आत्मायि ङाला साछि तेरिन। हिन्नाङ ङा ङारि मिजेला घोङ राङ ङारि चाला मिका। झोम मात्रा सम किन, कि कजसुबायि ङिङच्येयि लोन लयि साछि तेरयापला ङाहि स्युरयाप राङ प्रभु येशुने खुँखुँबि ङाहि स्यापच्यि ङा पुरा कि ङ्युइकिन।”2
“ता तोइ, ङाला छ्या होतो कि खि नाङने पोरो कि, सुगा सुगाला ङाहि राज्ययि टाइक्ये किनराङ पुते, खि याङ ङाहि च्ये नामयाङ थोङान माना ना।” हतिचाला तिरिङयि ङिन ङा खेला साछि तेरच्याइ, कि सुइ याङ ठायि दोषि मिहा। चिचालानाना कजसुबायि उदेश्य खेला नायापला ङा च्येला हटि मिके। खे रेँ चाला राङ रेँ तुम छोम्मुवाति चाला च्याङबो क्याइरे त्योए। पवित्र आत्मायि खेला तुमयि जिम्मा खेरङान सोसोइबाति ख्युइ रेँ ठायि ङ्योङ्योइबि कजसुबायि चर्चयि तारो खेराङ कि।3 चिचालानाना ङाला छ्या होतो, कि ङा पुइ छारते झिझिरा वाजेतेबा खि उइला स्युङान ना, सुइ तुमला लाँमा लुइतु मिझ्युका। खिरि उइने घो ख्यामदु झ्युङानयि ताम नाङान मितेबा लाँङान ना, काङति लोब्टुतेबाला रेँ च्येला खेरङान ना। हतिचाला हति टाम्बा क्याइरे च्याङबो क्याइरे त्योए, कि लो सुम ङिन छान छिमा तोङिन राङ मि पोरोला चेतावानि तेरिन ताते। “ता ङा खेला कजसुबाला राङ ख्युइ ङिङच्येयि वचनला टोच्याइ, सुइ खेला क्योङबो सुन, राङ पवित्र सोसोइबातेबा पोरोयि उइला होङानयि आङकिङान सुन। ङाहि कि रेनयि सेर, ङुल, कि कोहिलायि लोभ माक्याइबा। खे राङला छ्या होतो कि ङाहि धि लाक्पि राङ ङारि राङ ङा ङ्याबो होएतातेबे कोइबाला पुरा क्याक्याइबा होतो। ङाहि ताम पोरोला ख्योएला उदारण पिपिना होए, कि ख्युइ याङ धि च्वरा तुका क्याइरे सोरे मेतातेबाला रुवा किकोइ हुन। प्रभु येशुयि वचन टाम्बाला पोर, च्हिरु क्याइरे खो कुँरि नानाइबा धुइ, कि ख्योङयापले याङ तेरयाप चोम ल ना।” होचोम नाइरे ख्युइ पुइमु चुसोङ राङ हतिबा पोरो ङ्याबो मोनलाम क्यापसोङ। हतिबा पोरो ङुइसोङ, राङ पावलला क्यालच्यामु क्यापते पा च्यारसोङ। हतिबे याङ नामयाङ ख्युइ च्ये थोङान मानाना नाइरे पावलयि नानाइबि तामला हतिबे लेइराङ बैरा क्याइसोङ। तेहि हतिबे खोला डुङगा थु क्यालसोङ।
Source notes (3)
- Cross-reference १ राजा १७:२१
- Cross-reference २ तिमोथि ४:७
- Cross-reference भजनसंग्रह ७४:२
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.