प्रेरित 21

पावल यरुश्लेमयि ढुल

1खो ङ्याबो बिदा च्युङदे ङे डुङगाला स्योन्दे शिधा कोशला लेप्ते, राङ ङाइटोतेला रोडसला राङ हतिने पटाराला क्योप छारसोङ। 2तेहि फोनिकेला ढोयापयि डुङगा झि खुँ छारते ङे हतिला राङ स्योन्दे पुते। 3जब साइप्रस थोङसोङ, तेहि ङि हतिला योन यहला सिरिया यहला टुरोसला पापते। चिचालानाना डुङगायि सामान हतिया भयाप च्युङसोङ। 4लोब्टुबाला पाते खुछारते हतिबा ङ्याबो ङे हतिया ङिन तुन ताते। पावलला यरुश्लेमला माढो नाइरे हतिबाला पवित्र आत्मायि लाम्मला नाइसोङ। 5हतिने ङे ढोयापयि भेला च्युङ छारते रेँ ढुलला थोन्दे। रेँ प्येरा राङ च्यिटाकातेबा पोरो राङ हतिबा पोरो ङेला भजारयि फि थु केलदु लेप्सोङ, राङ ङि छो छोम्मुवायि नेमुला पुइमु चुरे मोनलाम क्यापते, राङ चिकि चिने बिदा च्युङदे। 6तेहि ङे डुङगाला स्योन्दे, राङ हतिबा रेँ खिमला लसोङ।

7टुरोसने छो छोम्मुवायि ढुल क्याइ छारते ङे टेलिमाइसला क्योप छारसोङ। हतिया भाइबाला नामास्ते क्याइरे ङिन झि ताते। 8ङाइटोतेला ङे बिदा च्युङदे कैसरियाला लेप्ते, राङ टाइक्ये किङान फिलिपयि खिमला स्युरे। खो हति तुनयि नाङने च्हि ना, राङ ङे हति ङ्याबो ताते।1 9ङोन्सेखिलङान ख्युइ पोमु ङा मिजे माक्याइबा धु। 2

10ङे हतिया ङिन रेन ताते यहुदियाने अगाबस मिन क्याक्याइबि ङोन्सेखिलङान झि लेप्सोङ।3 11ख्युइ ङि तेहा लेप्ते पावलयि कारा खेरते लाक्पा काङबा तामसोङ, राङ नाइसोङ, “पवित्र आत्मा जु नेन्दु, ‘धि कारा मि सुइ हिना, हतिला यरुश्लेमला यहुदिबे याङ धि च्वरा क्याइरे राङ तेमङान ना राङ यहुदि मान्ते मितेबे लाला टोएङान ना।’”

12धि ताम थोइरे, ङे राङ हति सायि मि ढिक्ते हतिला यरुश्लेमला माढो नाइरे स्युवा क्याप्ते। 13हिन्नाङ पावलयि जवाक पिन्सोङ, “खे धि च्वरा क्याइरे ङुइरे ङाहि समला चिला किप्पो मेता सुन? चिचालानाना प्रभु येशुयि मिनयि चाला कैदि होङयाप मात्रा माना, हिन्नाङ यरुश्लेमला स्यियाप याङ ङा तयार होए।” 14हतिला घोकोर माङ्युइबाति “प्रभुयि धोप्पा पुरा सअ” नाइरे ङे च्यामाना ताते।

15हति ङिन ङे तयार ताते, राङ यरुश्लेम यहला पुते। 16ङे ङ्याबो कैसरियायि लोब्टु रेन याङ पुइसोङ, राङ हतिबे ङेला साइप्रसयि लोब्टु ङिङबा झि मनासोन नाङानयि खिमला ख्योसोङ। हति तेहा ङे त्योए कोइ च्युङसोङ।

पावलयि याकुबला ठाठाता

17तेहि जब ङे यरुश्लेमला क्योपते, तेहि भाइतेबे ङेला केन राङ स्वागत क्याइसोङ। 18ङाइटोतेला पावल ङे ङ्याबो याकुबयि तेहा पुइसोङ। हतिया एल्डरबा पोरो धु। 19हतिबाला नामास्ते नाइ छारते, पावलयि हतिबे स्यापच्यियि लाम्ला यहुदि मान्ते मितेबे उइला कजसुबायि क्याक्याइबि लाइ हतिबाला च्यिच्यि क्याइरे मनङि क्यापसोङ। 20धि थोइ छारते हतिबे कजसुबायि छे तेसोङ। तेहि खोला नाइसोङ, “तोइ भाइ, यहुदिबे उइला हिछे किङानतेबा तोङ ल्हायि च्हि धु, राङ ठिमयि तामला हतिबा पोरो जोशिलो धु। रुपरेखा हतिबे ख्युइ भारेला याङ ताम रेन थोथोइबा धु, सो च्हि हिना नाना, यहुदि मान्ते मितेबे उइला त्योएङान यहुदिबाला ख्युइ ‘मोशाला तोङ राङ हतिबे च्यिटातेबाला खतना माके राङ लुलाब मानि माके’ नाइरे लालाबा धु। 21हतिबे याङ ख्युइ भारेला ताम रेन थोथोइबा होतो, सो काङते ना नाइना, यहुदि मान्तातेबे उइ 22ला त्योएङान यहुदितेबाला ख्युइ ‘मोशाला तोङ राङ हतिबे च्यिटाकातेबाला खतना माके राङ लुलाम खाला ङ्योन’ नाइरे लालाबा होतो, अरे। 23हतिचाला च्हि हुन नेन, सो कि वाचा किङानतेबा स्यि ङे ङ्याबो होतो।4 24हतिबाला खेरते ख्योए याङ धिबा ङ्याबोङ्याबो चाङमा सअ, राङ हतिबाला कोइयापयि खर्च ख्युइ पिन, राङ हतिबे स्येबु टाकुलिया सोयोङ। हति च्वरा क्याइरे ख्युइ ठिम ङ्याङ्याना थोङदे ख्युइ भारेला च्याङ तामयि तेम्बा मिधु नाइरे पोरोयि हा:कोङान ना। 5 25हिन्नाङ यहुदि मान्ते मितेबे सुइ हिछे क्याक्याइबा होतो, हतिबे कुला भोल क्यापते पुपुलि क्यु, ठा, झिङबा च्युइरे सासाति तुढोयि स्या राङ पातारने कुरुला त्योए कोइ हुन नाङान हुइ थाकच्योए हा:कोरु च्युक्ते पत्र टिटिबा धु।”6

26तेहि पावलयि हति मिबाला खेरसोङ, राङ ङाइटोतेला हतिबा ङ्याबोङ्याबो राङला याङ चाङमा सोइसोङ, राङ चाङमा सोयापयि ङिनतेबाला जब पुरा होङयाप ना, तथा पोरोयि चाला तेरङानयि भेटियि लोन तेरतु हति मोनलाम क्यासि खिमयि नाङला स्युसोङ।

पावल ला मोनलाम क्यासि खिमला स्युस्युबा

27जब ङिन तुन पुरा होङाला छेलसोङ, तेहि एशियायि यहुदिबे पावलला मोनलाम क्यासि खिमला थोङदे मियि तुम पोरोला कारु च्युसोङ, राङ खोला सुङसोङ। 28हतिबा जु नेन राङ क्ये धोनाला छेलसोङ “इस्राएलि मितेबा” “रुवा कि! मितेबाला काङ च्याला हुइ मि, हुइ ठिम राङ धि सायि विरोधला छोइ पिन्दे ढोङान मि धि राङ ना। झोम मात्रा माना, धि ग्रिकबाला याङ मोनलाम क्यासि खिमयि नाङला ख्योरे हति पवित्र साला भाभा सोसोइबा होतो।” 29चिचालानाना धि ताङला हतिबे एफिससयि त्रोफिमस नाङान मि झिला खो ङ्याबो भजारला थोथोङाति हतिला पावलयि मोनलाम क्यासि खिमयि नाङला ख्योख्योबा ना नाइरे हतिबे ठानि क्याइसोङ।7

30तेहि भजार काङ च्याला ठुझि च्युङसोङ, राङ मितेबा लाम्मा झिला स्युरे लेप्सोङ। हतिबे पावलला सुङदे मोनलाम क्यासि खिमयि फिला ढुकिन राङ ख्योसोङ, राङ हतितुइनाराङ कोतेबा क्यापसोङ। 31जब हतिबे खोला सोएयापयि च्युइ क्याइरे, तेहि यरुश्लेम पोरो मि किप्पो च्युङदु नाङानयि ताम यि लोन सिपाहियि सेनापतियि तेहा क्योपतु। 32खो हतितुइनाराङ सिपाहि राङ घोबातेबा ङ्याबो खेरते ख्युइ तेहा स्युकिन राङ लेप्सोङ। हतिबे सेनापति राङ सिपाहितेबाला थोङसोङ, राङ पावलला क्याकाला छेलसोङ। 33तेहि हति सेनापति पावलयि धुनला लेप्ते सुङदे खोला च्यालता ङि तेमयापयि आदेश पिन्सोङ। धि सु हिना राङ धि च्हि क्याइ सुइ नाइरे टिसोङ। 34धि हति मिझोमयि नाङने रेनयि ताम झि राङ रेनयि स्यान ताम नाइरे क्ये तोन्सोङ, राङ हति होलोयि क्याइरे घटना च्हि ना सो हा:को माङ्युबाति पावलला अड्डाला खेर नाइरे आदेश पिन्सोङ। 35जब पवाल टाइला क्योपते, तेहि होलोयि तुप्पाति क्याइरे सिपाहितेबे खोला तेक्ते खेरसोङ। 36चिचालानाना मितेबे तुम “हतिला सोए” नाइरे क्ये धोनिन राङ च्येच्येला लेप्सोङ।

पावलयि राङला क्योपते किनलो

37अड्डाला क्योलेला पावलयि सेनापतिला नाइसोङ, “हजुर, आङ होएना, ङा चिगा नासोम होए।” ख्युइ नाइसोङ, “च्हि ख्युइ ग्रिकयि क्ये स्येयिनाइ?” 38“च्हि ख्योए मिश्री मानाइ च्हि, सुइ थाल्लाका विद्रोह मचाइ क्याइरे तोङ स्यि विद्रोतेबाला झङगलला खेखेरा होतो?”

39हिन्नाङ पावलयि जवाक पिन्सोङ, “ङाता किलिकियायि भजार टार्सस यि यहुदि मिझि ना, टिमा भजारयि मि माना। स्युवा होए, धि मिला चिगा नायापयि आङ पिन।”

40जब ख्युइ आङ पिन्दे, तेहि टाइला लाँरे पावलयि मितेबाला लाक्पि ता तान्सोङ। मितेबा शान्त च्युङ छारते च्येला, ख्युइ मितेबाला हिब्रु क्येला जु नाइसोङ।