तिचुरोङ क्येला सारबा करारयि किताबतेबा
प्रेरित 15
येरुश्लेमला हिछेकिङानबा झोमयाप
ता मि रेनयि यहुदियाने एन्टिओखियाला लेप्ते भाइबाला धि च्वरा छोइ तेराला छेलसोङ, “खे मोशायि लुलाम च्वरा खतना माच्युङना ता खोला थारथोनयाप खुङान मानाना।” 1 तेहि पावल राङ बारनाबास हतिबा ङ्याबो भेद भाब राङ नारे क्याइ छारते च्येला, हतिबे भाइबे पावल राङ बारनाबासला राङ स्यान चोमला धि टिवायि थाकच्योएयि चाला लोब्टुतेबा राङ एल्डरतेबे तेहा यरुश्लेमला ढोयापला धामसोङ।
चर्चयि स्दस्यतेबा हतिबाला हतिने बिदा पिन्सोङ। हतिबा फोनिके राङ सामरियायि लाम्ला यहुदि मान्ते मितेबे प्रभुला ग्रहण क्याइ छारते ताम हतिबाला सविस्तार क्याइरे स्येसोङ। हति लोन यि हतिबे भाइतेबा लेइराङ किप्पो च्युङदु। जब हतिबा यरुश्लेमला लेप्ते, तेहि हति हतिबाला चर्च, लोब्टु राङ एल्डरतेबे स्वागत क्याइसोङ। कजसुबायि हतिबा ङ्याबो क्याक्याइबि ताम पोरो रिपोट हतिबे हतिया पिन्सोङ। तेहि फरिसियि तुमयि नाङने हिछे किङान चोम राङयि लाँरे नाइसोङ, “यहुदि मान्ते खतना होङयाप राङ हतिबाला मोशायि ठिम पालाना कितु आदेश तेरकोइ हुन।”
धि भारेला सोच विचार कियापला लोब्टुतेबा राङ एल्डरतेबा झोमसोङ। लेइराङ नारे क्याइ छारते पत्रुस लँरे हतिबाला नाइसोङ, “भाइबा, ख्योएला छ्या राङ होतो माने ताङस्युवा ङिनतेबाला च्हिरु क्याइरे कजसुबायि ङाहि खाने यहुदि मान्ते मितेबे लोन लयि वचन ङ्यानोङ राङ हिछे क्यायोङ नाइरे खि उइने ङाला धामसोङ। समयि ताम हा:कोङान कजसुबायि खेला याङ ङेला च्वरा पवित्र आत्मा पिन्दे हतिबाला ग्रहण क्याक्याइबि ताम तानसोङ। ख्युइ हतिबा राङ हुइ उइला च्याङ भेदभाब मा पोरसोङ, हिन्नाङ हतिबे सम हिछेयि लाम्ला चाङमा सोइसोङ। हतिचाला लोब्टुतेबे ठाला धि ङेरस्यिङ पोरते चिला कजसुबाला छोए तेन? धि ङेरस्यिङ न हुइ ताङबुइ काने न हुइ खुर ङ्युइकिन। हिन्नाङ हिछे किन, कि प्रभु येशुयि ङिङच्येने हुला थारथोनयाप खुँखुँबा होतो, च्हिरु क्याइरे हतिबाला लाङ खुँखुँबा होतो।”
तेहि यहुदि झोमसाला पोरो राङ च्यामाना त्येसोङ, तेहि यहुदि मान्ते मितेबे उइला कजसुबायि ख्युइ लाम्ला च्हिरु हा:लाइयापयि लाइतेबा राङ होन:तोरयापयि लाइतेबा क्यासुइ हति मनङि बारनाबास राङ पावलयि क्याइसोङ। हतिबे धि मनङि क्याक्याइबा थोइसोङ। हतिबे ताम नाइछारते याकुबयि जु नाइसोङ, “भाइबा, ङाहि ताम ङ्योन, कजसुबायि रेँ मिनयि चाला यहुदि मान्ते मितेबे चाने मितेबे झि धामयापयि ङिङच्ये कि नाङानयि ताम सिमोनयि स्यास्याता होतो। धि ताम ङ्याबो ङोन्सेखिलङानयि वचन याङ खुकिन, च्हिरु टिधुइ, ‘धि तामबे च्येला ङा लकच्याइ, राङ दाउदयि तितिबि त्योएसा याङ सोज्याइ, हति तिप छाछारा याङ ङा सोज्याइ, राङ ङा हतिला लोङज्याइ, 2 राङ लाँमा मितेबे कजसुबाला प्येयोङ, राङ यहुदि मान्ते मि पोरोयि याङ, काङतेबा ङाहि मिनयि लाम्ला क्ये ताताङा होतो। धि ताम कजसुबा नेन्दु, सुइ ताङबुइ भेलाने राङ धि ताम हा:कोकुवा होतो, काङते सोयापले ताङलाने राङ स्येस्येबा होतो।’
“हतिचाला ङाहि थाकच्योए धि होतो, कि कजसुबा यहला लक्ते होङान यहुदि मान्ते मितेबाला तुका मातेर, हिन्नाङ हतिबाला धि तामतेबा टि, कि हतिबा कुला पुजा कियापयि भाभातेबाने कुरुला त्योए, पातारने, झ्यिङबा च्युइरे सासाति तुढोतेबे स्या राङ ठाने कुरुला त्योए। चिचालानाना ताङमे पुस्ताने राङ भजारयि क्यापला मोशायि ठिमयि टाइक्ये हुन राङ धु, चिचालानाना धि यहुदि झोमसि खिमला ङालसुइ ङिन पोरोला टकिन राङ धु।”
यहुदि मान्ते मिला हिछे किङानयि मिला पत्र
तेहि लोब्टुतेबा, एल्डरतेबा राङ चर्च पोरो ढिक्ते रेँ उइने मि चोमला राङ धाम्दे पावल राङ बारनाबास ङ्याबो एन्टिओखियाला चोङयाप ल ठानि क्याइसोङ, राङ भाइतेबे नाङने ङोधो मितेबा, यहुदा नाङान बारनाबास राङ सिलासला धामसोङ राङ खो ङ्याबो हतिबे धि पत्र चाँसोङ “एन्टिओखिया, सिरिया राङ किलिकियाला त्योएङान यहुदि मान्ते मितेबे हिछे किङान भाइतेबाला, लोब्टुतेबा राङ एल्डरतेबे नामास्ते।” ङि थोथोइबा होतो, कि हुइ उइयि रेनरेन हुइ आदेश मेताला राङ खि सम थारका मेता च्युङदे खेला लेइराङ तामयि तुका पिपिना होतो। हतिचाला हु पोरोयि सहमतियि लाम्ला क्याक्याइबि थाकच्योए च्वरा क्याइरे मि छोमला राङ धाम्दे खेला ङि करि बारनाबास राङ पावल ङ्याबो खि तेहा चोङयापला ङेला ल स्येसोङ। धि मितेबा धि च्वरा ना, काङति हुइ प्रभु येशु ख्रिष्टयि चाला रेँ उ भेन पोपोरा धु। हतिचाला ङि यहुदा राङ सिलासला चाँचाँबा होतो। हतिबे याङ ताम थारकातेबा स्योएङान ना। चिचालानाना पवित्र आत्मा राङ ङेला धि ल स्येसोङ, कि धि कोइबि लाइतेबा अर्थात स्यान लेइराङ बोझ खेला घेलयाप मिहा। “खि कुतेबाला भोल क्याक्याबि क्यु, ठा, झिङबा च्युइरे सासाता तुढोयि स्या राङ पातार ने कुरुला त्योए। धि तामतेबाने कुरु त्योए नाङान ल होङान ना। बिदा।” 3
बिदा च्युङ छारते हतिबा एन्टिओखियाला लेप्सोङ, राङ समाजला च्हि झोम्दे धि च्वरा पत्र पिन्सोङ। पत्रला होएता छोइयि तामतेबा टरे हतिबा कासोङ। यहुदा राङ सिलास खोराङ याङ ङोन्सेखिलङान हिनाति भाइतेबाला लेइराङ वचनयि लाम्ला छोइ पिन्दे हतिबाला क्योङबो सोइसोङ। हतिबे आरोङ भेला हतिया बिताइ क्याइ छारते, हतिबे भाइतेबे हतिबाला चोँङानतेबे तेहा ल सह नाइरे बिदा पिन्दे चाँसोङ। हिन्नाङ सिलासला हतिया राङ त्योएयाप ल स्येसोङ।
पावल राङ बारनाबासते छोइ लोबिन राङ प्रभुयि वचन टाइक्ये किन राङ स्यान लेइराङ ङ्याबो एन्टिओखियाला पुइसोङ।
पावल राङ बरनाबास क्हुरु च्हुच्हुवा
ङिन रेन च्येला पावलयि बारनाबासला नाइसोङ, “सह, काङकाङ भजारला ङि प्रभुयि वचन टाइक्ये क्याइरे हति भजारतेबाला लक्ते पुते भाइतेबाला ठाता राङ हतिबा च्हिरु धुइ ता।” बारनाबासयि मर्कुस नाङान युहान्नाला हतिबा ङ्याबो खेरयापयि धोप्पा क्याइसोङ। हिन्नाङ पावलयि मर्कुसला ङ्याबो खेरयाप ल मास्येसोङ, चिचालानाना खो पामफिलियाने हतिबा ङ्याबो पेरे पुइतु, राङ हतिबा ङ्याबो लाइला पुपुता मिधु। हतिबे उइला झोम छेया भेदभाब च्युङसोङ कि हतिबा खोरे नाङला पेसोङ, राङ बारनाबास मर्कुसला ङ्याबो साइप्रस यहला पुइसोङ। हिन्नाङ पावलयि सिलासला धामसोङ, तेहि भाइतेबाने कजसुबायि ङिङच्येला पुलदे बिदा च्युङसोङ। चर्चला क्योङबो सुन राङ हति सिरिया राङ किलिकियायि ढुल क्याइसोङ।
Source notes (3)
- Cross-reference लेवि १२:३
- Cross-reference यर्मिया १२:१५
- Cross-reference उत्पत्ति ९:४; लेवि ३:१६
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.