तिचुरोङ क्येला सारबा करारयि किताबतेबा
प्रेरित 14
आइकोनियनला पवाल राङ बारनाबास यि स्यापच्यि स्युइस्युइबा
ता आइकोनियनला हतिबा ङ्याबो यहुदि झोमसि खिमला स्युरे जु नाइरे नाइसोङ, कि यहुदिबा राङ ग्रिकतेबा मियि तुम छोम्मुवा हिछे क्याइसोङ। हिन्नाङ हिछे मिकिङान यहुदितेबे यहुदि मान्ते मितेबाला घो ख्यामदु च्युक्ते भाइतेबे विरोधला हतिबे सम क्युमु सोइसोङ। प्रभुयि हिछेला हा:म राङ ङ्याबो नेनराङ लेइराङ भेला थु पावल राङ बारनाबास हतिया त्येसोङ। प्रभुयि हतिबे लाने हा:लाइयापयि लाइतेबा राङ होन:तोरयापयि लाइतेबा कितु च्युक्ते रेँ ङिङच्येयि वचन साछि पिन्सोङ। हिन्नाङ भजारयि मितेबाला पियाला छेलसोङ, राङ रेँ यहुदिबा यहला राङ रेन लोब्टुतेबा यहला पुइसोङ।
यहुदि मान्ते मितेबा राङ यहुदि ङिकारला हतिबे आङकिङान मितेबा ङ्याबो ढिक्ते हतिबाला तुका तेरङान राङ टोउ क्यायापयि कोशिश क्याइसोङ। हतिबे धि ताम हा:कोसोङ, राङ लुकोनियायि भजारतेबा, लुस्त्रा, डर्बि राङ धुनयि जिल्लायि लाम्ला टोइरे पुइसोङ, राङ हतिया हतिबा लोन ल टाइक्ये किनलो।
लुस्त्रा राङ डर्बि
ता लुस्त्रा भजारला लाङ घुल मिङ्युइङान मिझि त्येतु। हति कितुइना राङ काङबा खोरिया हिना, राङ नामयाङ काङबि पुपुता मेता। पावलयि नानाइबा हति ङ्यानिन्दु। पावलयि हतिला ल क्याइरे ताइसोङ, राङ टायापयि हति हिछे माथोङसोङ। क्ये छेया क्याइरे नाइसोङ, “ख्युइ काङबि भरोसाला थारका ल।” तेहि हति हुइ क्याला लाँसोङ राङ ढुवाला छेलसोङ। जब पावलयि क्याक्याइबि धि लाइ मियि तुमयि थोङदे, तेहि हतिबे लुकोनियायि क्येला क्ये छेया क्याइरे जु नाइसोङ, “लातेबा मियि धोला हुइ तेहा पापते लेप्तु।” हतिबे बारनाबासला जिउसयि ला राङ पावलला हर्मेस ला नाला छेलसोङ, चिचालानाना हतिबाते ङोधो भक्ता हिना। भजारयि धुन यहला होएते जिउसयि मोनलाम क्यासि खिमला पुजारि मुल कोतेबाला लोङतेबा राङ मिधोयि यि मालातेबा ख्योरे हतिया मितेबा ङ्याबो ढिक्ते भोल क्यायापयि पुजा किताला छेलसोङ।
हिन्नाङ जब लोब्टुतेबा, बारनाबास राङ पावलयि धि ताम थोइरे, तेहि हतितुइना हतिबे रेँ कोहिला रालदे जु नेनराङ क्ये तोन्दे मितेबे उइला स्युरे ढुन राङ नाइसोङ, “मितेबे नाइसोङ, खे चिला धि च्वरा लाइ किन? ङे याङ खे च्वरा कितु ङ्योङानयि मिना, राङ खेला धि फान मेते तामतेबाने सोम्बो कजसुबा यहला ख्योङयापला लोन ल स्योकिन, काङ कजसुबायि तेङला, पृथ्वी, छो छोम्मुवा राङ हतिया होएता क्यु पोरो सोइरे।1 ख्युइ ताङला पुइ छाछारि पालिला मि पोरोला राँराँसि लुलाम च्वरा ढोरु च्युसोङ। हचु हिन्नाङ ख्युइ राङला साछि मेताला मा ताङा, चिचालानाना ख्युइ ल क्याइरे खेला तेङलाने छ्युयि झरि राङ ढेबु छ्यायापयि ऋतु पिन्सोङ राङ खि समला ङ्योपा राङ आनन्दयि सम खाँतु च्युसोङ।” 2 धि तामतेबा नाइ छारते हतिबे तुका क्याइरे हतिबाला भोल क्यापते भुलयापयि पुजाने मितेबाला कासोङ।
हिन्नाङ यहुदि रेन एन्टिओखिया राङ आइकोनियनने हतिया लेप्सोङ, राङ मियि तुमतेबाला घोकोरते पावलला टोउ क्यापसोङ, राङ खो स्यि होम नाइरे भजारने फिला टुते खेरसोङ। हिन्नाङ जब लोब्टुतेबा क्युइ फाला छुलोला लाँरे खो लाँसोङ, तेहि भजारयि नाङला स्युसोङ, राङ ङाटोतेला बारनाबास ङ्याबो थोन्दे डर्बिला पुइसोङ।
सिरियायि एन्टिओखियाला ल्हयाप
ख्युइ हति भजारला लोन ल टाइक्ये क्याइरे लेइराङ लोब्टु सोइसोङ, राङ हतिबा लुस्त्रा, आइकोनियन राङ एन्टिओखियाला लसोङ, लोब्टुतेबे आत्माला क्योङबो सोइरे हतिबाला हिछेला त्योएयापयि समस्यु पिन्सोङ, राङ लेइराङ तुका ङ्योङदे हु कजसुबायि राज्यला स्यु कोयिन नाइरे हतिबाला नाइसोङ। जब हतिबे ख्योए चर्च पोरोला एल्डरतेबा धाम्दे, तेहि मोनलाम राङ वर्त राङ ङ्याबो हतिबा खोरे हिछे क्याक्याइबि प्रभुयि जिम्माला हतिबाला टोएसोङ।
हति च्येला हतिबा पिसिदियायि लाम्ला पामफिलियाला लेप्सोङ। पाखाला वचन टाइक्ये क्याइ छारते हतिबा अटालियाला पुपसोङ। तेहि हतिने हतिबा छो छोम्मुवायि ढुल क्याइरे एन्टिओखियाला पुइसोङ, काँहा हतिबे पुरा क्याक्याइबि लाइयि चाला कजसुबायि ङिङच्येला हतिबाला पुपुला होतो।
जब हतिबा एन्टिओखियला लेप्ते, तेहि चर्चला झोम्दे, तेहि कजसुबा ङ्याबो क्याक्याइबि लाइ पोरोयि मनङि क्यापसोङ, राङ च्हिरु क्याइरे ख्युइ यहुदि मान्ते मितेबे चाला हिछेयि को पेपिया थोइसोङ। हतिबा हतिया लोब्टुतेबा ङ्याबो लेइराङ त्येसोङ।
Source notes (2)
- Cross-reference प्रस्थान २०:११; भजनसंग्रह १४६:६
- Cross-reference भजनसंग्रह १४७:८; यर्मिया ५:२४
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.