प्रेरित 13

बरनाबास राङ शावल स्येयाप च्हि स्युयापयि चाला ध्हाम्देलो राङ च्हारेलो

1एन्‍टिओखियायि चर्चला ङोन्सेखिलङान राङ छोइ लोपङानतेबा, अर्थात बारनाबास, काला नाङान शिमियोन, कुरेनीका लुकियस, प्रान्‍तीय आङकिङान हेरोद ङ्याबो छाछारा मनेन राङ शाउल होतो। 2हतिबे प्रभुयि आराधाना किन ताताता राङ वर्त ताताताला पवित्र आत्मायि नाइसोङ, “ङाहि चाला बारनाबास राङ शाउलला हति लाइयि चाला कुरु पोर, काङ लाइयि चाला ङाहि खेला क्ये ताताङा होतो।”

3तेहि वर्त राङ मोनलाम क्यापते हतिबे ख्होए थोला रेँ लाक्पा पोरते हतिबाला बिदा पिन्सोङ।

साइप्रसला स्यापच्यि स्युइस्युइबा

4तेहि पवित्र आत्मायि लाम्ला चाँचाँबाति हतिबा सिलुकियाला पुइसोङ राङ हतिने डुङगाला स्योन्दे साइप्रस यहला पुइसोङ। 5सलामिसला लेप्छारते च्येला हतिबे यहुदि झोमसि खिमला कजसुबायि लोन ल टाइक्ये क्याइसोङ। हतिबाला रुवा किङान युहान्ना हतिबा ङ्याबो धु। 6जब हतिबा छोयि उइला होएता सा पोरो ढुल किन राङ ढुनराङ पाफोस थु क्योपसोङ, तेहि हतिया हतिबे यहुदि झि ङोन्सेखिलङान बार येशु नाङान जादुगर झिला ठेसोङ। 7हति जादुगर प्रदेशयि आङकिङान सर्गियस पौलस ङ्याबो तोकिनलो। सर्गियस पौलस रिक्पा होएता मिझि हिना। ख्युइ शाउल राङ बारनाबासला क्ये ताङदे कजसुबायि वचन ङ्यानयापयि धोप्पा क्याइसोङ। 8हिन्नाङ एलुमास जादुगरयि (चिचालानाना ग्रिक क्येला हति मिनयि खुँ हति राङ ना) सर्गियस पौलस हिछे लक्ते ख्योङ च्युइ क्याइरे हतिबे सामाना क्याइसोङ। 9हिन्नाङ शाउलयि, सुला पावल याङ नेन, पवित्र आत्मायि खाँरे हतिला लाम्मा झि ल क्याइरे ताइसोङ, 10“ख्योए दियाबलसयि पिजा, केवाकिङानयि टा, छल राङ अलयि खाँखाँबा! प्रभुयि थारका लाम योम्बो सोयाप मितोङाइ?” 11ता तोइ, प्रभुयि लाक्पा ख्युइ थोला परि च्युच्युङा होतो, राङ ता ख्योए टिझि थुङिमायि होए मिथोङान च्युङदे काना होङान ना। तेहि हतितुइना राङ मुक्पा राङ मुन्नायि हतिला कापसोङ, राङ रेनयि ख्युइ लाक्पा सुङदे ठिते खेरिनतोम नाइरे हति फाला छुला ढुवाला छेलसोङ। 12तेहि प्रदेशयि आङकिङानति धि च्युच्युङा थोङदे हिछे क्याइसोङ, चिचालानाना प्रभुयि छोइला हति हा:लाइदु।

पिसिदियायि एन्टिओखियाला स्येयाप च्हि स्युइस्युइबा

13पावल राङ हतिबे रुवातेबा पाफोसने डुङगा छोम्मुवा स्योन्दे पामफिलियायि पाखाला क्योपसोङ, राङ युहान्नाते हतिबाने पेरे यरुश्लेमला पुइसोङ। 14हिन्नाङ हतिबा पाखाने थोन्दे पिसिदियायि एन्‍टिओखियाला लेप्सोङ, राङ ङालसुइ ङिनला यहुदि झोमसि खिमयि नाङला स्युरे त्येसोङ। 15ता ठिम राङ ङोन्सेखिलङानयि किताबयि पाठ ट छारते यहुदि झोमसि खिमयि आङकिङानतेबे ख्युइ तेहा जु नाइरे चाँसोङ, “ए भाइ बा, खि तेहा मितेबे चाला छोइयि वचन चिगा होए ना नोइ।” 16तेहि लाँरे पावलयि लाक्पि इसारा क्याइरे नाइसोङ, “हे इस्राएलि मि राङ कजसुबाला झिङानबा, ङ्योन” 17इस्राएल मितेबे कजसुबायि हुइ आके ताङबुइ मितेबाला धाम्दे मिश्रदेशला तोतितुइना हतिबाला हा:छेया सोइसोङ, राङ ख्युइ शक्तिशालि लाक्पि हतिबाला हति देशने तोन्दे ख्योसोङ। 1 18च्याङ मेते साला हा:लाम लो खलङि थु ख्युइ हतिबाला ताइसोङ। 19तेहि ख्युइ कनान देशला मितेबे तुनला मासि सोइरे हतिबे देशयि आङ हा: स्यिपक्या ङोपच्यु थु हतिबाला पिन्सोङ।2 20“धि तामयि च्येला शमुएल ङोन्सेखिलङानयि पालो थु ख्युइ न्याय किङानतेबा पिन्सोङ।” 21हति च्येला हतिबे क्यालबो लाँसोङ, राङ कजसुबायि बेन्यामिन क्युइयि किशयि पिजा शाउलला लो खलङि थु हतिबे थोला आङ कितु च्युक्तेलो। 22ख्युइ हतिबाला टिम छारते दाउदला हतिबे क्यालबो होङयापला लाँसोङ। ख्युइ भारेला कजसुबायि साछि पिन्दे नाइसोङ, ङाहि यशैयि पिजा दाउदला ङाहि सम च्वरा मि खुँसोङ, सुइ ङा धोप्पा पोरो पुरा किङान ना। 23“धि मियि होङानयि सन्तनने, ख्युइ ना क्याक्याला च्वरा, कजसुबायि इस्राएलयि चाला मुक्तिदाता झि, येशुला ख्योसोङ।" 24खो होङयापले ताङला युहान्नायि इस्राएलयि मि पोरोला घ्योप्पा कियापयि बप्तिस्मायि टाइक्ये क्याक्याइबा होतो। 25युहान्नायि रेँ लाइ चोरि तुइना नानाइबा होतो, ‘खे च्हि ठानि किन, ङा सुना? ङा खो माना। हिन्नाङ ङाहि च्येला च्हि हुन, सुइ काङबायि पोउलो याङ भुइयापयि लायकयि मेता।’

26“ए, अब्राहामयि क्यालिक्युइयि सन्तन, राङ खि नाङने कजसुबायि झिटा किङान ए भाइबा, ङि तेहा राङ हति मुक्तियि लोन चाँचाँबा होतो।” 27चिचालानाना यरुश्लेमला त्योएङान राङ हतिबे आङकिङानतेबे खोला ङो मास्येबा राङ पोरोयि ङालसुइ ङिनला टङान ङोन्सेखिलङानतेबे वचनतेबा हा: माकुवा राङ खोला ङेबायि आदेश पिन्दे हति वचन पुरा क्याइसोङ। 28सोएयापयि ङेबायि च्याङ खुँ माखु नाङ हतिबे खोला स्योए कोइ हुन नाइरे पिलातसला स्युवा क्यापसोङ। 29राङ ख्युइ भारेला टिटिबा ताम पोरो हतिबे पुरा क्याइ छारते हतिबे खोला पालेपने पापते तुरसाला पोरसोङ। 30हिन्नाङ कजसुबायि खोला स्यिस्यियाने सोम्बो सोइसोङ। 31को राङ ङ्याबो गालिलने यरुश्लेम थु होङानतेबे तेहा खो लेइराङ ङिन थु थोङसोङ, राङ हतिबा थाल्ला जन्ताला ख्युइ साछि होए राङ होए। 32“कजसुबायि ताङबुइ कानाला क्याक्याइबि हति ना क्याक्यालि लोन ल ङे खि तेहा ख्योतोङ। 33अर्थात च्हिरु क्याइरे कजसुबायि येशुला सोम्बो सोइरे लाङदे हति ताम हु, हतिबे सन्तानयि चाला पुरा कि, च्हिरु क्याइरे भजनला टिधुइ, ‘ख्योए ङाहि पिजा ना, तिरिङयि ङिन ङाहि क्ये ख्योएला केरु च्युच्युका होए।’3 34ख्युइ ख्रिष्टला नामयाङ मिरुलयाप क्याइरे सोम्बो सोसोइबि भारेला चाहि जु नानाइबा होतो ‘ङा खेला दाउदला पिपिनि पवित्र राङ जब याङ मिसिनयाप च्यिनलाब तेरच्याइ।’ 35चिचालानाना स्यान साला याङ जु नाइदु, ‘ख्युइ रेँ पवित्र मियि स्हु रुलदु झ्युङान मानाना ना।’” 4

36“चिचालानाना खो रेँ पालिला कजसुबायि उदेश्य च्वरा स्यापच्यि स्युइरे स्यि छारते ख्युइ ताङबुइ मितेबा ङ्याबो दाउद कुँसोङ, राङ ख्युइ स्हु रुलदे पुइसोङ।” 37हिन्नाङ सुला कजसुबायि स्यिस्यियाने सोम्बो सोइसोङ ख्युइ स्हु मारुलसोङ। 38“हतिचाला भाइबा, ख्योएला छ्या सह, कि धि राङ मोशायि ठिमला टिटिबा मियि लाम्ला तिक्पा माप हुन नाइरे घोषाणा ख्योएला क्याक्याइबा होतो।” 39खे हिछे किङान पोरोयि ख्युइ लाम्ला राङ ताम पोरोने थारथोनयाप खुँखुँबा होतो, काङ थारथोनयाप मोशायि ठिमयि लाम्ला ख्युइ चाला सम्भव मेता।

40“हतिचाला च्याङबो क्याइरे त्योए, स्यान अर्थात ङोन्सेखिलङानयि किताबला नानाइबा धि ताम ख्युइ थोला होङान ना। 41‘हे ताम अल नाङानतेबा, तोइ राङ हा:लोइ तेहि मासि च्युङदे क्यु, चिचालानाना खि भेलाला ङा लाइ झि किच्याइ, धि च्वरा लाइ काङयि भारेला सुइ याङ मनङि क्यापना याङ खि जब याङ हिछे किङान मानाना।’5 42पावल राङ बारनाबास यहुदि झोमसि खिमने थोन्दे हुइतुइना होङानयि ङालसुइ ङिनला याङ धि तामबा स्योए नाइरे मितेबे खोला स्युवा क्यापसोङ। 43मि झोम खा थोरते च्युङ छारते यहुदिबा राङ यहुदि भक्ता मानि किङान भक्तातेबा पावल राङ बारनाबास च्येला पुइसोङ, राङ हतिबे हतिबा ङ्याबो हतिबाला कजसुबायि ङिङच्येला त्योए नाइरे स्युवा क्यापसोङ।”

44स्यान ङालसुइ ङिनला हा:लाम पोरो भजार कजसुबायि वचन ङ्यानयापला लक्ते लेप्सोङ। 45मियि तुमला थोङितुइना, यहुदिबा ठाधोयि खाँरे राङ पावलयि नानाइबि तामयि खण्डन क्याइसोङ, राङ ख्युइ ना च्येसोङ।

46हिन्नाङ पावल राङ बारनाबासयि हा:म क्याइरे नाइसोङ, “कजसुबायि वचन पोरोले ताङस्युवा ख्योएला स्योएयाप राङ कोइबा होए। ख्युइ धिला माना नाइरे राङला नामयाङ मिसिनयापयि मिजेयि झ्योदा च्युच्युङाति हु ता यहुदि मान्ते मितेबे चिना ढोङान ना। 47चिचालानाना प्रभुयि हुला धि च्वरा आदेश पिन्सोङ, ‘पृथ्‍वीयि फोइ धुन थु मुक्ति खुयापला ङाहि ख्योएला यहुदि मान्ते मितेबे चाला होए होङयापला धाधामा होए।’” 6 48जब यहुदि मान्ते मितेबे धि ताम थोइरे, हतिबा कासोङ, राङ कजसुबायि वचनयि छे तेसोङ, राङ नामयाङ मिसिनयापयि मिजेयि चाला धाधामा चोमयि हिछे क्याइसोङ।

49प्रभुयि वचन छेत्र काङ खाँसोङ। 50हिन्नाङ पावल राङ बारनाबासयि विरोधला यहुदिबे भक्ता राङ ङो होएता पोमुवातेबाला राङ साजामयि फिला चाँसोङ। 51हिन्नाङ हतिबा रेँ काङबायि साबे हतिबे विरोधला स्युरे, आइकोनियनला लेप्सोङ। 52लोब्टुबा किप्पो राङ पवित्र आत्मायि खाँसोङ।