तिचुरोङ क्येला सारबा करारयि किताबतेबा
प्रेरित 12
ल्हेहि राङ तुका
हति ङिनला हेरोद क्यालबुइ चर्चयि चोमयि थोला क्योङ अत्यचार किताला छेलसोङ। ख्युइ युहान्नायि भाइ याकुबला तोरबालि स्येसोङ। हति लाइयि यहुदिबा काका थोङदे पत्रुसला याङ सुङयापयि च्युइ क्याइसोङ। हति घटना सिनि ङिनयि लोटायि का:लापसोङ भेलाला च्युच्युङा होतोलो। हेरोदयि पत्रुसला सुङदे झ्याल्ला च्युसोङ, राङ निस्तार कालापसोलयि च्येला खोला जनतायि धुनला ख्योङयापयि च्युइ क्याइरे खोला स्युङानतेबाला सिपाहियि तुम स्यिला टोएसोङ। हति च्वरा क्याइरे पत्रुसला झ्याल्ला च्युसोङ, हिन्नाङ ख्युइ चाला चर्चयि कजसुबाला जोस छेया क्याइरे मोनलाम क्याकिन त्येतु।
पत्रुसला झ्यालने तोतोना
हेरोदयि हतिला फिला ख्योङयाप पापाति छान, पत्रुस च्यालतायि ताम्दे सिपाहि ङि उइला ङ्याङ्याला धु। सिपाहितेबा याङ कोयि धुन यहला लाँरे झ्याल्ला स्युङिन त्येतु। हो:प्तामेला प्रभुयि लोन खेरङान झि हतिया थोङसोङ, राङ कोटायि नाङला होए भारसोङ। तेङलायि लोन खेरङानयि पत्रुसला टाङला क्यापसोङ तेहि “घ्यबो ल्ह” नाइरे खोला लाङसोङ। तेहि च्यालतातेबा ख्युइ लाने पिते छारसोङ। तेङलायि लोन खेरङानयि खोला नाइसोङ, “कोहिला कोन, राङ पोउला कोन।” तेहि ख्युइ हति च्वरा राङ क्याइसोङ। ख्युइ हतिला नाइसोङ, “कोहिला कोन्दे ङाहि च्येला सह।” तेहि को थोन्दे ख्युइ च्येच्येला पुइसोङ। तोङलायि लोन खेरङानयि तेम्बारे हिना नाङान खोला छ्या माच्युङसोङ। हिन्नाङ दर्शन थोङिन नाइरे ख्युइ ठानि क्याइसोङ। जब ताङस्युवा राङ ङिबा स्युङान तुम झोम्दे भजारला स्युङान च्यायि कोला हतिबा क्योपसोङ, तेहि हति को खो राङ हतिबे धुनला प्येसोङ, राङ हतिबा फिला थोन्दे लालिलयि लाम झिकि लाम्ला पुइसोङ, राङ हतितुइना राङ तेङलायि लोन खेरङान खोला ताङदे पुइसोङ।
जब पत्रुसयि होस खोलि च्युङसोङ, “ता ङाला तेम्बारे राङ छ्या च्युङसोङ, कि प्रभुयि रेँ तेङलायि लोन खेरङान चाँरे हेरोद क्यालबोयि लाने, राङ यहुदिबे च्हि किसोम होए हतिबा पोरोने थारथोनयाप पिन्सोङ।”
धि ताम खोला छ्या च्युङ छारते, खो मर्कुस नाङान युहान्नायि आमा मरियमयि खिमला पुइसोङ। हतिया लेइराङ झोम्दे मोनलाम क्याकिन त्येतु। ख्युइ को तुङितुइना रोदा मिन क्याक्याइबि यक्मुवा को भेरु लेप्सोङ। पत्रुसयि क्ये ङस्येरे हति कारे को राङ मा पिया नाङला स्युरते पुइसोङ “पत्रुस खोला लाँरे राङ त्यतु” नाइरे लोन पिन्सोङ। हिन्नाङ हतिबे हतिला नाइसोङ, “ख्योए ङ्योमबा राङ ना” हिन्नाङ हति नानाइबि ताम तेम्बारे राङ ना नाइरे हति राङढिया क्याइसोङ। तेहि हतिबे नाइसोङ, “हति ख्युइ लोन खेरङान हिनोम।”
हिन्नाङ पत्रुसयि तुङिन राङ त्येसोङ। को भेतुइना कोल थोङदे हतिबा हा:लाइसोङ। मुइ “च्यामाना त्योए” नाइरे लाक्पि इसारा क्याइसोङ, राङ प्रभुयि हतिला च्हिरु क्याइरे झ्यालने फिला तोन्दे सो हतिबाला स्येसोङ। धि तामबे लोन याकुब राङ स्यान भाइतेबाला पिन नाइरे हति बिदा च्युङदे स्यान साला पुइ छारसोङ।
साल्बो च्युङ छारते पत्रुसला च्हि च्युङसोङ नाइरे सिपाहितेबे उइला हलचल छेया च्युङसोङ। हेरोदयि खोला पाते याङ माखुसोङ, सिपाहितेबे छोए ताइरे खोला सोएयापयि ङेबा तेरयापयि टिसोङ आदेश पिन्सोङ। हेरोदते यहुदियाने कैसरियाला पुते हतिया राङ त्येसोङ।
हेरोद स्यिस्यिया
हेरोद टुरोस राङ सिदोनयि मितेबा ङ्याबो लेइराङ तुका च्युङसोङ। हतिबा तुम झि च्युङदे ख्युइ तेहा लेप्सोङ, राङ क्यालबोयि कोटा नाङयि लाइ किङान बलस्त ङ्याबो कारु च्युक्ते ढियापयि चाला स्युवा क्यापसोङ। चिचालानाना हतिबे देश साइयि चाला क्यालबोयि देशला त्योएकोइ च्युङसोङ।1
तोकि क्याक्याइबि ङिनला क्यालबुइ कोहिला कोन्दे हेरोद ख्युइ ठिला त्येसोङ, राङ हतिबाला ख्युइ भाषाण पिन्सोङ। मितेबा “धि ता कजसुबायि क्ये ना, मितेबे माना!” नाइरे क्ये तोन्सोङ। हिन्नाङ कजसुबाला छे मातेकाति हतितुइना राङ कजसुबायि तेङलायि लोन खेरङान झिकि खोला क्यापसोङ, राङ सिसि खोलखोल भु क्यापते खो स्यिसोङ।
हिन्नाङ कजसुबायि वचन छारिन राङ फेलिन पुइसोङ। बारनाबास राङ शाउल रेँ मिशन पुरा क्याइरे यरुश्लेमने लसोङ। हतिबा ङ्याबो मर्कुस नाङान युहान्ना याङ पुइसोङ।
Source notes (1)
- Cross-reference १ राजा ५:११; इजकिएल २७:५
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.