तिचुरोङ क्येला सारबा करारयि किताबतेबा
प्रेरित 11
पत्रुसयि येरुश्लेमयि चर्चला च्हाङ ताम सोसोइबा
यहुदियाला होएता लोब्टु राङ भाइतेबे यहुदि मान्ते मितेबे याङ कजसुबायि वचन ग्रहण क्याइदु नाङान थोइदु। जब पत्रुस यरुश्लेमला लेप्ते, हतितुइना खतना किङानतेबे तुमतेबे खोला जु नेन राङ ख्युइ विरोध क्याइसोङ, “खतना मिकिङान मितेबे तेहा पुते हतिबाला ख्युइ च्हिला ङ्योपा साइरे?” तेहि पत्रुस पालिपालि किङगा मनङि क्याकाला छेलसोङ:
“ङा योप्पा भजारला मोनलाम क्याकिन होए, तेहि तन्ना छेया झि च्वरा कुना स्यिला सुङदे तेङलाने माला पापङान चिगा क्यु ङाहि दर्शनला थोङसोङ, राङ हति ङाहि तेहा लेप्सोङ। ङा ल क्याइरे तोतितुइना हतिया पृथ्वी तुढो राङ झङगलयि तुढो, स्युते ढोङानयि तुढो राङ पान्नाङयि च्याचिउतेबा थोङसोङ। ङाला जु नानाइबि क्ये झि ङाहि थोइसोङ, ‘पत्रुस ल्हँ, राङ साते स्हो।’ हिन्नाङ ‘ङाहि माना प्रभु, चिगा भाभा अथवा भाभा ताम ङाहि खाला जब याङ स्युस्युबा मेता।’” “हिन्नाङ हति क्येयि लाम्मा ङिबा तेङलाने ङाला नाइसोङ, ‘च्हि कजसुबायि चाङमा सोइरे हतिला ख्योए भाभा माना।’” लाम्मा सुम धि च्वरा राङ च्युङसोङ, राङ हतिबा पोरो याङ तेङलाना खेरसोङ। हति भेलाला राङ कैसरियाने ङाहि तेहा चाँचाँबि मिरको सुम ङे ताताति खिमला लेप्सोङ। मा झिबा हतिबा ङ्याबो ढोयापला पवित्र आत्मायि ङाला नाइसोङ। धि भाइ टुपाते याङ ङा ङ्याबो खेखेरा होतो, राङ ङे हति मियि खिमला स्युरे। ख्युइ ङेला नाइसोङ, कि तेङलायि लोन खेरङान झि ख्युइ खिमला लाँरे जु नाङान ख्युइ थोङसोङ, योप्पाला मि चाँरे पत्रुस नाङान सिमोनला क्ये ताङते चँह। ख्युइ खेला वचन स्योएङान ना, काङति लाम्ला खोला थारथोनयाप खुङान ना ख्योए राङ क्युइ प्येरा पोरोला। “जब ङाहि ताम नाला छेलदे, हतितुइना ताङला ङि थोला पापाबा च्वरा क्याइरे पवित्र आत्मा ख्युइ थोला याङ पापसोङ। तेहि प्रभु नानाइबि हति वचन ङाला टाम्बा च्युङसोङ, ‘युहान्नि ता छ्युयि बप्तिसमा पिन्सोङ, हिन्नाङ पवित्र आत्माने खि बप्तिस्मा होङान ना।’ प्रभु येशु ख्रिष्टयि थोला हिछे कितितुइना कजसुबायि ङेला काङ वरदान पिन, हतिबाला याङ हति वरदान पिन छारते कजसुबाला घा ङ्युइङान ङा सु ना?” धि ताम थोइ छारते हतिबा च्यामाना त्येसोङ, राङ जु नेन राङ हतिबे कजसुबायि छे तेसोङ, “ता कजसुबायि यहुदि मान्ते मितेबाला याङ मिजेयि चाला घ्योप्पा कियाप पिन्दु।”
एन्टिओखियाला चर्च
स्तिफनसयि सम्बन्धला सुरु च्युच्युङायि तुकायि चाला काङ च्याला खा थोथोरातेबे स्यानला माना, हिन्नाङ यहुदिबाला मात्रा वचन टाइक्ये किन राङ, फोनिके, साइप्रस राङ एन्टिओखिया थु ढुल क्याइसोङ। हिन्नाङ हतिबे नाङने रेनरेन साइप्रस राङ कुरेनियि मितेबा धु। हतिबे एन्टिओखियाला लेप्ते ग्रिकबाला याङ प्रभु येशु टाइक्ये क्याइसोङ। प्रभुयि लाक्पा हतिबा ङ्याबो होतोति हिछे किङानतेबा टाँगा लेइराङला प्रभु यहला लसोङ।
धि लोन यरुश्लेमला होएता चर्चयि नामज्योला क्योपसोङ राङ हतिबे बारनाबासला एन्टिओखियाला चाँसोङ। हति लेप्ते कजसुबायि ङिङच्ये थोङदे कासोङ, राङ हतिबा पोरोला सम तिङने राङ प्रभुयि थोला हिछे त्योएयापयि साला समस्यु पिनसोङ। चिचालानाना हति ल, पवित्र आत्मा राङ हिछेयि खाँखाँबि मि झि होतोलो। मितेबे तुम छोम्मुवा झि प्रभुला थपि च्युङसोङ।
तेहि शाउल फातु बारनाबास टार्ससला पुइसोङ। जब ख्युइ खोला ठेसोङ तेहि ख्युइ एन्टिओखियाला ख्योसोङ। तेहि पुरा लोझि थु चर्चयि मियि तुम छोम्मुवाला छोइ पिन्सोङ। लोब्टुतेबा लाम्मा ताङस्युवा एन्टिओखियाला ख्रिष्टियान नाइसोङ।
हति भेलाला ङोन्सेखिलङानतेबा यरुश्लेमने एन्टिओखियाला लेप्सोङ। हतिबे नाङने अगाबस मिन क्याक्याइबि मि झि लाँरे संसार पोरोला अनिकाल छेया झि होङाला छेलदु नाङान पवित्र आत्मायि लाम्ला ङोन्सेखिलदु। हति अनिकाल क्लौडियसयि शासन कितितुइना परि च्युङसोङ। तेहि लोब्टुतेबा पोरोयि राँ राँसि औकात च्वरा क्याइरे यहुदियाला त्योएङान भाइतेबे सहमति चाला भेटि कुरयापयि थाक च्योए क्याइसोङ। हतिबे जु राङ क्याइसोङ, राङ बारनाबास राङ शाउलयि लाक्पि लाम्ला हतिबे भेटि एल्डरतेबे तेहा चाँसोङ।
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.