Skip to content
BibleKenya

Rana Tharu Bible

उत्पत्ति 5

आदम की वंसावली

(1 इतिहास 1:14)

जौ आदम की वंसावली है। जब परमेस्वर इंसान कै बनाई, तौ बौ उन्हैं अपने तराहनी बनाई।1 बौ उन्हैं नर और नारी करकै बनाई, जब बौ उन दोनों कै बनाई, तौ बौ उन्हैं “इंसान” नाओं दई, और आसीस दई। जब आदम एक सौ तीस साल को भौ, तौ बाको एक लौड़ा पैदा भौ, बौ बाके ही तराहनी दिखात रहै, और बौ बाको नाओं सेत रखी। और सेत के जनम के बाद, आदम आठ सौ साल ले जिंदो रहो। और बाके और भी बालका पैदा भै फिर आदम नौ सौ साल की उमर पूरी होन के बाद मर गौ।

जब सेत एक सौ पाँच साल को भौ, तौ एनोस पैदा भौ। एनोस के पैदा होन के बाद सेत आठ सौ सात साल ले और जिंदो रहो। बाके और भी बालका भै तौ सेत की उमर नौ सौ बारह साल की ही गई बाके बाद बौ मर गौ।

जब एनोस नब्बै साल को भौ, तौ बासे केनान पैदा भौ, केनान के पैदा होन के बाद एनोस आठ सौ पन्द्रह साल ले जिंदो रहो। बाके और भी बालका पैदा भै। और फिर एनोस नौ सौ पाँच साल और जिंदो रहो फिर बाकी मौत ही गई।

जब केनान सत्तर साल को भौ, तौ बाको एक लौड़ा महल्लेल पैदा भौ। और फिर केनान आठ सौ चालीस साल ले और जिंदो रहो। जाके बाद महल्लेल और भी बालका पैदा भै। और केनान कुल नौ सौ दस साल जिंदो रहो फिर बाकी मौत ही गई।

जब महल्लेल पैंसठ साल को रहै, तौ येरेद कै जनम दई, येरेद के जनम के बाद महल्लेल आठ सौ तीस साल और जिंदो रहो। और बाके और भी बालका पैदा भै महल्लेल कुल आठ सौ पिचानबे साल और जिंदो रहो, फिर बाकी मौत ही गई।

जब येरेद एक सौ बासठ साल को रहै, तौ हनोक को जनम भौ, हनोक के जनम के बाद येरेद आठ सौ साल और जिंदो रहो। बाके बाद और भी बालका भै येरेद नौ सौ बासठ साल और जिंदो रहो, बाके बाद बाकी मौत ही गई।

जब हनोक पैंसठ साल को रहै, तौ बौ मातुसाएल कै जनम दई। मातुसाएल के जनम के बाद, हनोक तीन सौ साल तक परमेस्वर के संग-सोवत मैं रहौ और बाके और भी बालका पैदा भै। हनोक कुल तीन सौ पैंसठ साल ले जिंदो रहो। हनोक अपनी जिंदगी परमेस्वर की संग-सोवत मैं बिताई, और फिर बौ गायब ही गौ, काहैकि परमेस्वर बाकै उठाए लई।2

जब मातुसाएल एक सौ सतासी साल को भौ, तौ बौ लेमेक कै जनम दई। लेमेक के जनम के बाद मातुसाएल सात सौ बयासी साल और जिंदो रहौ। बाके और भी बालका पैदा भै मातुसाएल कुल नौ सौ उनहत्तर साल जिंदो रहो बाके बाद बाकी मौत ही गई।

जब लेमेक एक सौ बयासी साल को रहै, तौ बाको एक लौड़ा भौ, बौ बाको नाओं नूह रखी और कही, जो जमीन कै प्रभु स्राप दई है, जहे जमीन मै जौ बालका हमरे काम मैं, जोमैं हम कड़ी मेहनत करथैं, जामैं छुटकारा देगो। नूह के जनम के बाद लेमेक पाँच सौ पिचानबे साल और जिंदो रहो। बाके और भी बालका पैदा भै लेमेक कुछ सात सौ सत्तर साल तक और जिंदो रहो, बाके बाद बाकी मौत ही गई।

जब नूह पाँच सौ साल को भौ तौ बौ सेम, हाम और येपेत कै जनम दई।

Source notes (2)
  1. Footnote मत्ती 1:1; 1 कुरिन्थियों 11:17
  2. Footnote इब्र 11:5; यहू 14;

Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.