Skip to content
BibleKenya

Rana Tharu Bible

उत्पत्ति 4

कैन और हाबिल

फिर आदम अपनी बईय्यर हव्वा से संबंध बनाई, और फिर बौ गर्भवती भई। बाको एक लौड़ा पैदा भौ, और बौ कही, “प्रभु की मदत से मोकै एक लौड़ा मिलो है।” इसलै बौ बाको नाओं कैन रखी। जाके बाद बौ एक और लौड़ा कै जनम दई। हाबिल एक बरदिया बनो, लेकिन कैन एक किसान बनो। कुछ समय के बाद, कैन प्रभु के झोने अपनी फसल मैं से कुछ भेंट लैकै आओ। तौ हाबिल अपनी भेंड़ को पहलोठो मेमना बाकै भेंट करन के ताहीं लाई और बाकै मारकै चर्बी बारे मास कै भेंट करी। प्रभु हाबिल की भेंट से भौत खुस भौ।1 लेकिन बौ कैन की भेंट कै ठुकराए दई। जौ बजह से कैन के मोहों मैं उदासी छाए गई, और बौ गुस्सा से भर गौ। तौ प्रभु कैन से कही, “तू गुस्सा काहे होथै? तेरे चैहरा मैं उदासी काहे है? अगर तू सई काम करतो, तौ का मैं तेरी भेंट ना अपनाओ होतो? लेकिन तू तौ गलत करो है, और पाप तेरे मोहोट मैं बैठो है। जौ तेरे ऊपर सासन करनो चाहथै, लेकिन तोकै जाके ऊपर बिजय पाने होगो।”2

तौ कैन अपने भईय्या हाबिल से कही, “आ आपन मैदान मैं चलथैं।” और जब बे मैदान मैं रहैं, कैन अपने भईय्या ऊपर हमला कर देथै और बाकै मार डारथै।3

प्रभु कैन से पूँछी, तेरो भईय्या हाबिल कहाँ है? बौ जबाब दई, “मोए न पता है, मैं का अपने भईय्या की देखरेख करन बारो हौं?”

तौ प्रभु कही, तैं जौ का करो है? सुन; तेरो भईय्या को खून जमीन से मेरे घाँईं चिल्लाए कै मोए पुकार रौ है।4 इसलै अब मट्टी तेरे भईय्या को खून पीन ताहीं अपनो मोहो खोली है, और अब जौ मट्टी मैं तू खेती नाय कर पागो काहैकि तैं अपने भईय्या कै मारन की बजह से तू स्रापित है। तैं पूरी ताकत से खेती करन की कोसिस करैगो, तौ भी तोकै पूरी फसल नाय मिलैगी; और तोकै पृथ्वी मैं घर ना मिलैगो और भटकन बारो रहगो।

तौ कैन प्रभु से कही, “जौ सजा मेरे सहन से बाहर है। तू मोए जमीन और अपनी मौजूदगी से दूर कर दौ है। मैं पृथ्वी मैं बेघर भटकत फिरंगो, और जो कोई मोए पागो बौ मोए मार डारैगो।”

लेकिन प्रभु जबाब दई, “न। अगर कोई तोकै मार डारैगो तौ बासे सात गुना बदला लौ जागो।” और प्रभु कैन के ताहीं एक चिन्ह ठहराई, ऐसो ना होबै कि कोई बाकै पाएकै मार डारै। और कैन प्रभु के सामने से दूर ही गौ और “नोद” नाओं के देस मैं रहन लगो, जो अदन के अगार दिसा मैं है।

कैन के बंस

कैन अपनी बईय्यर के संग संबंध बनाई, और बौ गर्भवती भई और बौ हनोक कै जनम दई; फिर कैन एक नगर बसाई और बाको नाओं अपने लौड़ा के नाओं के ऊपर “हनोक नगर” रखी। हनोक को लौड़ा इराद और इराद को लौड़ा महूयाएल और महूयाएल को लौड़ा मातुसाएल और मातुसाएल को लौड़ा लेमेक को जनम भौ। लेमेक दुई बईंय्यरन से बिहा करी, एक को नाओं आदा और दुसरी को नाओं सिल्ला रहै। आदा याबाल कै जनम दई, याबाल बे लोगन को पुरखा बनो जो तम्बून मैं रहथै और जानवरन को पालन करकै जिंदगी चलाथैं। उनके भईय्या को नाओं यूबाल रहै, जो बुसली बजान बारे सब संगीतकारन को पुरखा रहै। सिल्ला जो तूबल कैन कै जनम दई, जो पहलो पीतर और लोहो से सब तराहनी के औजार बनान बारो रहै। तूबल की बहेनिया को नाओं नामाह रहै।

लेमेक अपनी बईंय्यरन से कही,

“अरे आदा और सिल्ला मेरी सुनौ:

मैं एक जुआन आदमी कै मार डारो हौं काहैकि बौ मोकै चोट पहोंचाई रहै।

अगर लेमेक कै मारन के ताहीं सात की ज्यान लई जाथै,

तौ अगर कोई मोए मारैगो तौ सत्तर गुना लोगन की ज्यान लै जागी।”

सेत और एनोस

आदम और अपनी बईय्यर के संग फिर से संबंध बनाई; और बौ एक और लौड़ा कै जनम दई और बाको नाओं जौ कहकै सेत रखी कि “परमेस्वर मेरे ताहीं हाबिल के बदले, जोकै कैन मार डारी रहै।” एक और लौड़ा दई है। सेत को एक लौड़ा भौ, जोको नाओं एनोस रखी। और तभई से लोग आराधना मैं परमेस्वर को पवित्र नाओं कै लेनो सुरु कर दईं।

Source notes (4)
  1. Footnote इब्रानियो 11:4
  2. Footnote उत 3:16
  3. Footnote मत 23:35; 1 यो 3:12;
  4. Footnote इब्र 12:24

Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.