Rana Tharu Bible
उत्पत्ति 6
इंसान को पाप
जब इंसानी जाति पूरी दुनिया मैं फैल गई रहै, और उनकी लौड़िया भी जनम लेत रहैं, तौ कुछ परमेस्वर के लौड़ा, इंसान की लौड़ियन कै देखीं कि बे सुगड़ है। फिर प्रभु कही, “मेरी आत्मा इंसान के भीतर हमेसा के ताहीं बास ना करंगो; काहैकि इंसान एक मात्र सरीर है। अब से बे एक सौ बीस साल से जाधे जिंदगी ना जींगे।” बे दिनन मैं पृथ्वी मैं दानव रहैं, बे तहुँओं रहैं, जब परमेस्वर के लौड़ा इंसान की लौड़ियन के झोने गै तौ उनके जरिये जो बालका पैदा भै, बे पुराने जमाने के सक्तिसाली और सुप्रसिद्ध वीर रहैं।
जब प्रभु देखी, कि पृथ्वी मैं सब रहन बारे लोग कित्ते दुस्ट हैं, और उनके मन बिचार हर समय बुराई के घाँईंये रहथै, और प्रभु पृथ्वी मैं इंसान कै बनाएकै बड़ा पछतानो। बौ अपने मन मैं भौत दुखी भौ। प्रभु कही, “मैं इंसान कै पालतू जानवरन कै नेंगन बारे, और आसमान के पक्छियन कै मिटाए दुंगो, काहैकि मोकै जौ बात को दुख कि मैं उनकै बनाओ हौं।” लेकिन प्रभु को कृपा नूह के ऊपर रहै।
नूह के बारे मैं
जौ कहानी नूह के परिवार की है, नूह एक धर्मी आदमी रहै और बौ अपने समय मैं इकल्लो निर्दोस रहै। और बौ हर समय परमेस्वर के संग - सोवत मैं रहत रहै। नूह के तीन लौड़ा रहैं, सेम, हाम, और येपेत। परमेस्वर की नजर मैं पृथ्वी भ्रस्ट और हिंसा से गई रहै। परमेस्वर पृथ्वी ऊपर नजर डारी और पाई कि सब दुस्टता से भर गै हैं काहैकि सब लोग दुस्टता की जिंदगी जीत रहैं।
परमेस्वर नूह से कही मैं सब प्राड़िन कै नास कर दुंगो और पृथ्वी इंसान से भ्रस्ट हुई चुकी है। निस्चय मैं पृथ्वी और बे लोगन सुंदा नास कर दुँगो। तैं गोपेर पेंड़ की अच्छी कठिया से अपने ताहीं एक बड़ी नईंय्याँ बना; जामैं कमरा बना और जाके अंदर-बाहर कोलतार को लेप लगइये। ऐसे करकै तुम जाकै बनाबौ, जहाज एक सौ तैंतीस मीटर लम्बो, बाईस मीटर चौंड़ो और तेरह मीटर ऊँचो बनइये। जहाज मैं एक खिड़की बनइये और आधे मीटर ऊपर छत बनईयो, और जहाज मैं एक और फाटक बनईयो, और जहाज मैं तीन मंजिल बनईये, ऊपर, बीच और नीचे को मंजिल। मैं आसमान के नीचे बे सब जिंदे प्राड़िन कै, जिनमैं जिंदगी की साँस है, नास करन के ताहीं पृथ्वी के ऊपर जल-प्रलय करंगो। जासे पृथ्वी के सब प्राड़ी मर जाँगे। लेकिन मैं तेरे संग वाचा भाँदंगो। तैं अपनी बईय्यर, अपने लौड़ा और उनकी बईंय्यरन कै संग लैकै जहाज मैं जा। सब जिंदे प्राड़िन मैं से दुई-दुई, एक नर और एक मादा कै अपने संग जहाज मैं ले जा, ताकी बे तेरे संग जिंदे रहमैं। सब तराहनी के पक्छी, और पालतू जानवर मैं से दुई-दुई तेरे झोने आंगे, कि तै उनकै जिंदो रखै। हर तराहनी को खान बारो खाना, जो खाओ जागो, इखट्टो कर लिये। बौ तेरे और उनके खान के ताहीं होगो। नूह ऐसोई करी। बौ परमेस्वर की आग्या के हिसाब से सब कछु करी।
Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.