Deukhuri Bible
हिब्रू 6
तबेकमारे आऊ, हम्रे उ चिज सिख्ना बन्द करी, जोन चिज हम्रिहिन्हे पैलेहेँ ख्रीष्टके बारेमे सिखागिल रहे। और गहिँर शिक्षाहे सिखी ताकि हमार विश्वास परिपक्क होजाए। हम्रिहिन्हे फेनदोस्रे परमेश्वरमे विश्वासके बारेमे और मृत्यु ओहोँर लैजिना कामसे दूर हुइना बारेमे सिख्ना सुरु नै करे परी। बहुत मेरिक डुब्किक बारेमे शिक्षा, केक्रो उप्पर हाँथ धरना और मुअल मनैनके फेनदोस्रे जिउठ्ना और सदाकालके दण्ड जसिन बातमे किल लागके विश्वासके जग फेनदोस्रे बैठैना शिक्षामे नै लागी। यदि परमेश्वरके अनुमति हुई कलेसे मै तुहुरिन्हे विश्वासमे परिपक्क हुइना शिक्षा देहम।
जे अपन विश्वास छोरत, ओइन्हे फेनदोस्रे पश्चात्ताप करना अवस्थामे नाने नै सेकजाइत। ओइने एकचो परमेश्वरके सच्चाइहे चिहिन्लाँ, और स्वर्गमेसे वरदान भेटैलाँ। और ओइने दोसुर जहनके संग पवित्र आत्मा भेटासेकल बताँ। ओइने परमेश्वरके थेनसे अइलक सन्देश मजा बा कहिके और ओइने भविष्यमे अइना समयक शक्तिक अनुभव करल रहिँत। ओइन्हे फेनदोस्रे फिर्ता नन्ना कौनो तरिका नै हो। काकरेकी ओइने अप्निहीँ परमेश्वरके छावाहे फेनदोस्रे क्रूसमे टंग्था और हुँकार लाज करथाँ। और दोसुर मनै ख्रीष्टहे बेकार हो कहिके सोँच्थाँ।
मजा शिक्षा स्वीकार करुइया मनैया जमिन हस हो, जेम्ने पानी बर्सत। यदि जमिन मजा बा कलेसे यी जमिन किसानहे मजा बाली देहत, और यम्ने परमेश्वरके आशिष रहत। दोसुर मनै उ जमिन हस हुइँत, जोन जमिन काँटा और सेहुँर जमाइत, और उ जमिन बेकार रहत। असिन जमिनमे ते परमेश्वरके सराप परना डर रहत, और यी आगीलेके नाश होजाई।
मोरिक प्रिय भैयो! तुहुरे मजा काम करतो। काकरेकी परमेश्वर तुहुरिन्हे पैलेहेँ मुक्ति देसेकल बताँ। तबेकमारे यी चेतावनी तुहुरिन्के बारेमे नै हो। जसिके तुहुरे मजा काम करल बतो, और आब परमेश्वरके नाउँमे परमेश्वरके मनैनके लग प्रेमसे सेवाके काम करतो। परमेश्वर तुहुरिन्हे नै बिस्रैहीँ। काकरेकी ऊ धर्मी बताँ। अल्छी ना होऊ। पर कड़ा मेहनत करुइयन हस तुहुरे फेन यी प्रेम भरल काम धैर्यता और विश्वाससे अन्तिमसम कर्तिरहे परत। और परमेश्वरके वाचा भेटाइक लग मजबुत आशा हुई परत।
परमेश्वरके वाचक पक्का
परमेश्वर अब्राहामहे वाचा करेबेर ऊ अपन नाउँमे कसम खैलाँ। काकरेकी केक्रो नाउँ लेके कसम खाइक लग हुँकिन्से भारी केऊ नै रहे। परमेश्वर कलाँ, “पक्कै फेन मै तुहिन्हे आशिष देहम, अथवा तुहिन्हे बहुत्ते सन्तान देहम।” अब्राहाम सँस्सा करके नम्मा समयसम अँस्याइल। तब ऊ परमेश्वरके वाचा कर्लक आशिष भेटाइल।
कसम खाईबेर मनै अपनसे भारी मनैयक नाउँ प्रयोग करथाँ। कसमसे यी साबित हुइत कि ओइन्के कलक सच्चा हो। और कसम सक्कु बहसहे ओर्वादेहत। तबेकमारे परमेश्वर फेन कसम खैलाँ। यिहिसे ऊ वाचा भेटैलक मनैनहे फरछ्वार रुपमे देखाई चाहतिहिँत कि ऊ अपन वाचाहे पूरा करहीँ। तबेकमारे परमेश्वर हम्रिहिन्से वाचा कर्ले बताँ और ऊ कसम खैथाँ, यी दुईथो बात बद्ले नै सेकत। काकरेकी परमेश्वर झूट बोले सेक्हीँ कना बात सम्भव नै हो। तबेकमारे हम्रे जेने सुरक्षा भेटाइक लग परमेश्वरके लग्गे आइल बती। हमार आघे रहल आशाहे भेटाइक लग हम्रे बरवार हौसला भेटाई सेक्थी। जसिके बरवार खम्भामे बाँधल बरहा लाउहे बल्गर और हिले नै देहत। ओस्तेहेँके यी आशा हमार जीवनहे पक्का और सुरक्षित धारत। जेकर आशा हम्रे कर्थी ऊ येशू हुइँत : ऊ स्वर्गमे पवित्र तम्बूक पर्दक पाछे परम पवित्र ठाउँमे परमेश्वरके थेन गैलाँ। हमार लग येशू हम्रिहिन्से आग्गिहीँ उ ठाउँमे जाके बैठसेकल बताँ। मल्किसेदेक पुजारीक हस ऊ सदक लग प्रधान पुजारी हुइल बताँ।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.