Deukhuri Bible
हिब्रू 5
परमेश्वर इजरायल देशके मनैनमेसे हरेक प्रधान पुजारीनहे रोज्लाँ। और ऊ हरेक प्रधान पुजारीनहे मनैनके ओहोँरसे पापके माफिक लग भेटी और बलिदान चह्राइक लग नियुक्त करलाँ। ताकि परमेश्वर मनैनके पापहे माफ करे सेकिँत। काकरेकी प्रधान पुजारीनके अप्निहीँ फेन कमजोर मनै हुइँत। तबेकमारे ओइने नै जानल और डगर भुलाइल मनैनहे नम्र होके सम्झाई सेक्थाँ। तबेकमारे प्रधान पुजारीनके जसिके दोसुर मनैनके पापके माफिक लग बलि चह्राई पर्थिन। ओस्तेहेँके ओइन्हे अपन पापके माफिक लग फेन बलि चह्राई पर्थिन।
सम्मान भेटाइक लग केऊ फेन अप्निहीँ प्रधान पुजारी हुई नै सेकत। परमेश्वर सुरुक प्रधान पुजारी हारुनहे नियुक्त करलाँ, जसिके परमेश्वरके नियुक्त कर्लक मनैया किल प्रधान पुजारी हुई सेकत। अस्तेहेँके ख्रीष्ट सम्मान भेटाइक लग अप्निहीँ प्रधान पुजारी नै हुइलाँ। पर परमेश्वर हुँकिन्हे उ सम्मान देलिन। और असिके कलिन,
“तैँ मोरिक छावा हुइते,
आज मै घोषणा करतुँ कि तैँ मोरिक छावा हुइते।”
दोसुर ठाउँमे, परमेश्वर हुँकिन्हे फेनदोस्रे कलिन,
“मल्किसेदेक1 पुजारी रहल हस
तैँ सदादिनके लग पुजारी हुइते।”
येशू अपन शारीरिक जीवनमे रहलमे अपनहे मुअलमेसे बँचुइया परमेश्वरसे जोरसे रुइति बिन्ती और प्राथना चह्रैलाँ। हुँकार नम्रता और भक्तिक कारण परमेश्वर हुँकार प्राथना सुन्लिन। येशू परमेश्वरके छावा हुइँत। तभुन फेन अपन भोग्लक दुःख-कष्टसे येशू परमेश्वरके आज्ञा माने सिख्लाँ। मल्किसेदेक पुजारी हुइल हस परमेश्वर येशूहे प्रधान पुजारी बनाके सम्मान देलिन। और जब येशूहे परमेश्वर पूरा रुपमे सिद्ध बनाके सेक्लाँ ते हुँकारमे विश्वास करुइया मनैनके लग ऊ सदाकालके मुक्तिक मूल होगिलाँ।
पतनमेसे बँच्ना चेतावनी
यकर बारेमे कहे परना ते बहुत बा। पर उ बातके बारेमे वर्णन करना कर्रा बा। काकरेकी तुहुरे परमेश्वरके वचन सिखक लग नै हौसल हुइतो। अभिनसम ते तुहुरे दोसुर जहनहे सिखाई सेक्ना मेरिक हुई परना रहे। पर तुहुरे अभिन फेन परमेश्वरके वचनके बारेमे प्राथमिक बात पता नै पाके कौनो दोसुर जाने सिखाई पर्थिन। आँखर खाना खैना ठाउँमे अभिन तुहुरिन्हे लर्कन हस दुधे चाहत। दूध खाके किल जिउइया मनैया भर धार्मिक जीवन बितैना शिक्षामे पूरा नै हुइल रहत। काकरेकी ऊ बच्चै रहत। पर मजबुत मनैयक तुलना आँखर खाना खाई सेक्ना मनैयक संग करल बा। उ मनैया विश्वासमे बल्गर रहत, और गहिँर शिक्षा बुझे सेकत। उ मनैया मजा और खराब छुत्याई सेकत।
Source notes (1)
- Footnote मल्किसेदेक मल्किसेदक अब्राहामके पालामे एकथो पुजारी और रज्वा रहे।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.