Eastern Tamang Language Bible
व्हाइ 89
दाऊददेन छ्याम परमेश्वरसे लबा कबुलदेन इस्राएलला दुख
एज्री एतानना मस्किल
परमप्रभु, ह्राङला खाइमै आजिन्बा मायाला बारेरी ङाइ सदन व्हाइ गोला,
ह्राङसे लबा विश्वास लखम्बा गेला बारेरी ङाइ सदन घ्रेन काइसे पाङ्ला।
“ह्राङला खाइमै आजिन्बा माया सदन चिला,
ओच्छे ह्राङसे ह्राङला विश्वास लखम्बा गे मु ह्रङ् लसीन कोङ्ना लसी थान्बा मुला” भिसी ङाइ पाङ्ला।
ह्राङसेनोन चुह्रङ् भिसी सुङ्बा मुला,
“ङाइ धम्बा म्हिदेन छ्याम ङाइ कबुल गिक लबा मुला,
ङाला गे लबा म्हि दाऊददेन छ्याम ङाइ कबुल लबा मुला,
‘एला सन्तान चा सदनना लागिरी ग्ले दोसी चिला,
एला सन्तानसे पुस्ता पुस्ताधोनान शासन लला।’” (सेला)
परमप्रभु, ह्राङसे लबा उदेकला गेला बारेरी स्वर्गसे व्हाइ गोमुला,
ह्राङसे लबा विश्वास लखम्बा गेला बारेरी स्वर्गदूतगदेला हुलसे व्हाइ गोमुला।
परमप्रभु, स्वर्गरी ह्राङ ह्रङ्बा अर्गु खालै आरे,
स्वर्गरी मुबा अर्गु खालैनोन ह्राङ ह्रङ्बा आरे।
स्वर्गदूतगदेला सभारी ह्राङदा ल्हानान मान लमुला,
ह्राङला क्युर्सीन मुबागदे न्हङ्री जम्मान भन्दा ल्हाना मान लतोःबा चा ह्राङ जे मुला।
जम्मान भन्दा घ्रेन परमप्रभु परमेश्वर, ह्राङ ह्रङ्बा शक्तिशाली खालैनोन आरे,
ह्राङ शक्तिशाली परमेश्वर हिन्ना,
परमप्रभु ह्राङ जम्मान तामरी विश्वास लखम्बा परमेश्वर हिन्ना।
शक्तिसे प्लिङ्बा समुद्रथोरी ह्राङसे शासन लमुला,
थेरी रेःबा छालगदे ह्राङसेन म्हाना लमुला।
ह्राङसे समुद्रला लोङ्बा खबा जन्तु1 नाश लजी,
ह्राङला घ्रेन शक्तिग्याम ह्राङला शत्रुगदेदा ब्रेना लजी।
स्वर्गदेन जम्बुलिङ ह्राङलान हिन्ना,
जम्बुलिङदेन जम्बुलिङरी मुबा जम्मान स्हे ह्राङसेन स्होबा हिन्ना।
झ्याङदेन लो ह्राङसेन स्होबा हिन्ना,
तबोरदेन हेर्मोन गङ्गदेसे ताङ्सी ताङ्सी ह्राङदा व्हाइ थेःना लमुला।
ह्राङ ल्हानान शक्तिशाली मुला,
ह्राङला भङ् ल्हानान मुला।
ह्राङदा सेम निबा तामदेन ठीक निसाफ चा ह्राङला य्हुल्साला जग हिन्ना,
खाइमै आजिन्बा मायादेन विश्वास लखम्बा ह्राङला ताम चा ह्राङला ङाच्छा ङाच्छा भ्रमुला।
परमेश्वरग्याम मोलम याङ्बा म्हिगदे चा चुगदेन हिन्ना,
थेनीगदेसे ह्राङदा जयजयकार लबारी सेबा मुला,
परमप्रभु, थेनीगदे ह्राङला य्हालरी भ्रमुला।
ह्राङसे लमा थेनीगदे धिन गिकनोन ताङ्मुला,
ओच्छे थेनीगदेसे ह्राङला सत्य तामग्यामसेन ह्राङदा जयजयकार लमुला।
तिग्दा भिसम ह्राङ थेनीगदेला मानदेन शक्ति हिन्ना,
ह्राङला दयासे ङन्दा ढाना लमुला।
परमप्रभु, पाङ्नोन तोःमा ङन्दा जोगब लबा ढाला चा ह्राङलान हिन्ना,
ओच्छे ङन्ना ग्लेएनोन इस्राएलला परमेश्वरलान हिन्ना।
ल्हानान धुइ ङाच्छा ह्राङदा विश्वास लबा म्हिगदेदा ह्राङसे म्हङ्री चुह्रङ् भिसी सुङ्जी,
“ङाइ जम्मासेन ङोसेबा सिपाही गिकदा ह्रो लबा मुला,
ङाइ म्हिगदेला गुङ्ग्याम धम्बा म्हि गिकदा य्हुल्साला ग्ले स्होबा मुला।
ङाइ ङाला गे लबा म्हि दाऊददा धम्बा मुला,
ङाइ थेदा थेला थोबोरी छ्युगु युसी ग्ले स्होबा मुला।
थेदेन छ्याम सदन ङाला शक्ति तला,
ङाला शक्तिसे थेदा बलियो स्होला।
थेला शत्रुगदेसे थेदा खाइमै ढाबारी आखम,
नाइबा गे लबा म्हिसे थेदा खाइमै ब्रेना लबारी आखम।
ङाइ थेला शत्रुगदेदा थेलान ओन्छाङ्री छेक्ला,
थेदा हेला लबागदे जम्मादान ङाइ नाश लला।
ङाइ थेला लागिरी सदन विश्वास लखम्बा गे लला,
ओच्छे थेदा खाइमै आजिन्बा माया लला,
ङाइ थेदा सदन ढाना लला।
ङाइ थेला य्हुल्सादा समुद्रहेन्से
यूफ्रेटिस स्योङ्धोना दोना लला।
थेसे ङादा चुह्रङ् भिसी पाङ्ला,
‘ह्राङ ङाला परमेश्वर आबा हिन्ना,
ङाइ भर लबा पहरादेन ङादा थार्ना लबा ङाला परमेश्वर ह्राङनोन हिन्ना।’
ङाइ थेदा ङाला थेबा झा स्होला,
ङाइ थेदा जम्बुलिङला ग्लेगदे न्हङ्री जम्मान भन्दा घ्रेन स्होला।
ङाइ थेदा खाइमै आजिन्बा माया लला,
ओच्छे थेदेन छ्याम लबा कबुल जुकजुकधोनान चिला।
ङाइ थेला वंशदा जुकजुकधोनान थान्ना,
ओच्छे मु मुदेधोना ङाइ थेला य्हुल्सादा थान्ना।
“तर चुदे थेला सन्तानसे ङाला ठिम ख्लाजी भिसम,
ङाइ कुल्बा अन्छार आभ्रनी भिसम,
चुदे थेनीगदेसे ङाइ लोप्बा तामदा वास्ता आलनी भिसम,
ओच्छे ङाइ कुल्बा ताम आङ्यन्नी भिसम,
ङाइ थेनीगदेदा कडीसे छेक्सी थेनीगदेला पापला सजाय पिन्ना,
ओच्छे कोर्रासे छेक्सी थेनीगदेसे लबा नाइबा गेला सजाय पिन्ना।
तर ङाइ दाऊददा माया लबारी खाइमै आख्ला,
ङाइ थेदेन छ्याम लबा कबुलएनोन पूरा आलना आख्ला।
ङाइ थेदेन छ्याम लबा कबुल खाइमै न्होङ्ना आल,
अथवा ङाला सुङग्याम थोन्बा बचन खाइमै आपो।
“ङाइ दाऊददेन छ्याम लबा कबुल सदनना लागिरी चिला,
ङा सत्य परमेश्वर तबासेलमा थेदेन छ्याम ङाइ खाइमै फट्टा ताम आल।
थेला वंश सदनना लागिरी चिला,
ओच्छे थेला य्हुल्सा चा धिनी ह्रङ् य्हाङय्होङ आतना ङाला ङाच्छापट्टि चिला।
मुरी छ्याबा लनीसे विश्वासला साक्षी उन्मुला,
थेह्रङ् लसीन थेला य्हुल्सा जुकजुकधोनान चिमुला।” (सेला)
तर ह्राङसेन धम्बा ग्लेदेन छ्याम ह्राङ बोमो खबा मुला,
ह्राङसे थेदा ङाला आहिन भिसी ख्लासी पिन्बा मुला।
ह्राङसे ह्राङला गे लबा म्हिदेन छ्याम लबा कबुल पूरा आलनी,
थेसे कूबा मुकुट ह्राङसे हिलोरी भ्याङ्बा मुला।
ह्राङसे थेला सहरला पर्खालगदे फुप्सी पिन्बा मुला,
थेसे ह्राङ जोगब तबाला लागिरी स्होबा कोङ्बा ग्लागदेदा ह्राङसे नाश लसी पिन्बा मुला।
थेला ग्लाग्याम निबा जम्मासेन थेला मालसामान ब्यन्बा मुला,
थे म्राङ्सी थेला खिम्जेमगदे नेमुला।
ह्राङसे थेला शत्रुगदेदा ढाना लबा मुला,
ह्राङसे थेला जम्मान शत्रुगदेदा ताङ्ना लबा मुला।
ह्राङसे थेला हतियारगदे गेआखेल्बा तना लबा मुला,
ओच्छे थेदा लडाइरी ब्रेना लबा मुला।
ह्राङसे थेला मान इज्जत म्हाना लबा मुला,
ओच्छे थेला ठि सरी भ्याङ्बा मुला।
खेप्पा दोबा धुइ आतमन ह्राङसे थेदा खेप्पा दोना लबा मुला,
ह्राङसे थेदा बेइज्जत तना लबा मुला। (सेला)
परमप्रभु, तिग ह्राङ सदन लासी धन्छ्याबा?
खाइमाधोना ह्राङ बोमोसे मे दोसी धन्छ्याबा?
ङाला चु जुनी गादे तुन्बा मुला, ह्राङसे ढन्गो,
ह्राङसे जम्मान म्हिदा सिसी निबा जुनी पिन्बा मुला, थे ढन्गो!
खाइमै आसिना सोसी चिबा म्हि खाला मुला?
अथवा खाल्से ह्राङसे ह्राङदान कालला शक्तिग्याम फेबारी खम्ला? (सेला)
परमप्रभु, ह्राङसे ङाच्छा पिन्बा खाइमै आजिन्बा मायाला चिनु खाइ?
ह्राङसे दाऊददेन छ्याम लबा विश्वास लखम्बा कबुल खाइ?
परमप्रभु, चु ताम ढन्गो, खाह्रङ् लसी ह्राङला गे लबा म्हिला बेइज्जत तबा मुला,
ङाइ खाह्रङ् लसी य्हुल य्हुल्ला म्हिगदेसे लबा हेला सेमहेन्सेन नाबा मुला।
परमप्रभु, ह्राङला शत्रुगदेसे ह्राङसे धम्बा ग्लेला बेइज्जत लबा मुला,
थे जुन ग्लारी निसैनोन थेनीगदेसे थेला बेइज्जत लबा मुला।
सदन परमप्रभुला जयजयकार लउ!
आमेन! आमेन!
Source notes (1)
- Footnote समुद्रला लोङ्बा खबा जन्तु हिब्रू बाइबलरी चा राहाब भिसी पाङ्बा मुला। अय्यू ९:१३; २६:१२; यशै ५१:९ पदरी स्हीगो।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.