Eastern Tamang Language Bible
व्हाइ 88
ह्रो याङ्बाला लागिरी लबा प्रार्थना
संगीत लोप्बा म्हिला लागिरी “दुख” ला राग अन्छार गोबा एज्री हेमानना मस्किल
परमप्रभु, ङादा थार्बा पिन्बा ङाला परमेश्वर,
ङाइ ह्राङदेन छ्याम धिन म्हुननोन गुहार ह्रीला।
ङाला प्रार्थना सान्गो,
सेमरी ल्हानान दुख तसी ङाइ बिन्ती लमा सान्गो।
ङादा ल्हानान दुख तबा मुला,
ओच्छे ङा सिबारीन छ्याइबा मुला।
ङा सिबारीन छ्याइबा स्य्हान्दो म्हिगदे ह्रङ्बान तबा मुला,
ङाला भङनोन म्हसी जिन्बा मुला।
ङादा सिबा ह्रङ्बान म्हिगदेला गुङ्री भ्याङ्बा मुला,
ङा धुर्सारी थान्बा लाश ह्रङ्बान तबा मुला।
जुन म्हिदा ह्राङसे पूरन म्लेःसी जिन्बा मुला,
थेनीगदेसे ह्राङग्याम तिगै ह्रो याङ्बा आरे।
ह्राङसे ङादा सिबागदे चिबा ग्लाला
जम्मान भन्दा नुप्बा धोपधोप्बा ग्लारी भ्याङ्बा मुला।
ल्हिबा धोइ ह्रङ्बान ह्राङला बोमो ङाथोरी खबा मुला,
ह्राङला थे बोमोसे ङादा समुद्रला छालसे ह्रङ् लसी ल्हुसी थान्बा मुला। (सेला)
ङाला ढिक्बा ह्रोगदेग्याम ह्राङसे ङादा फेबा मुला।
ह्राङसे ङादा थेनीगदेला ओन्छाङ्री नाइबा खबा म्हि स्होबा मुला।
ङादा च्युप्सी थान्बासेलमा ङा चुग्याम थोन्बारी आखम्बा मुला।
दुखसेलमा ङाला मी कमजोर तबा मुला,
परमप्रभु, ङाइ धिन धिननोन ह्राङदेन छ्याम बिन्ती लबा मुला,
ओच्छे ङाइ ङाला या तोर थीसी प्रार्थाना लमुला।
तिग ह्राङसे सिबागदेला लागिरी उदेकला गे लमुला?
तिग थेनीगदे सोसी थेनीगदेसे ह्राङला जयजयकार लला? (सेला)
तिग धुर्सारी ह्राङला खाइमै आजिन्बा मायाला बारेरी ताम लमुला?
अथवा नाश तबा ग्लारी ह्राङसे लबा विश्वासला गेला बारेरी ताम लमुला?
तिग धोपधोप्बा ग्लारी ह्राङसे लबा उदेकला गे म्राङ्ला?
ओच्छे म्लेःसी जिन्बा य्हुल्सारी ह्राङसे लबा ज्यबा गे म्राङ्ला?
तर परमप्रभु, ह्रो याङ्बाला लागिरी ङाइ ह्राङदेन छ्याम प्रार्थना लमुला,
ओच्छे स्य्हो दाङ्सीन ङाइ ह्राङदेन छ्याम प्रार्थना लमुला।
परमप्रभु, ह्राङसे ङादा तिग्दा ख्लाबा?
ङा म्राङ्सी तिग्दा ह्राङसे ह्राङला ली घप्बा?
भ्योन मुबा धुइहेन्सेन ङाइ सदन दुख नाबा मुला,
ओच्छे ङा सिबारीन छ्याइबा मुबा।
ह्राङसे ङादा पिन्बा सजायग्याम ङा ब्लप्सी जिन्बा मुला।
ह्राङला बोमोला झोकसे लमा ङा थुरथुर तबा मुला,
ह्राङला बोमो म्राङ्सी ङा लोङ्सी सिबा तेबान तबा मुला।
नाम भालसे ह्रङ् लसी ह्राङला बोमोसे ङादा धिन गिकनोन क्युर्सी थान्मुला,
थेसे ङादा जम्मान ग्लाग्याम घप्सी थान्बा मुला।
ङाला ह्रोगदेदेन ङाइ माया लबा ङाला म्हिगदेदा ह्राङसे ङाग्याम थारेङ् तना लजी।
दन्दे ङाला ह्रो भिबा चा धोपधोप जे हिन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.