Eastern Tamang Language Bible
व्हाइ 5
जोगब तबाला लागिरी प्रार्थना
संगीत लोप्बा म्हिला लागिरी- बाँसुरी ह्राप्सी गोबा दाऊदला व्हाइ
परमप्रभु, ङाला बिन्ती सान्गो! ओच्छे ङाइ हुईया लबा सान्गो।
ङाला ग्ले! ङाला परमेश्वर!
ङाइ क्रासी ह्रो ह्रीमा ङादा ह्रो पिन्गो,
तिग्दा भिसम ङाइ ह्राङदेन छ्याम प्रार्थना लमुला।
परमप्रभु, ह्राङसे स्य्होरीन ङाला काइ थेःला,
ङाइ स्य्होरीन प्रार्थना लला ओच्छे ह्राङला जोहाब भ्रान्सी चिला।
ह्राङ नाइबा गेदेन छ्याम ताङ्बा परमेश्वर आहिन,
नाइबा गे लबा खजिबै म्हि ह्राङला ङाच्छा राप्बारी आखम।
ङा ह्रङ्बा खालै आरे भिसी म्हन्बा म्हि ह्राङला ङाच्छा चिनोन आखम्मुला,
नाइबा गे लबा जम्मान म्हिगदेदा ह्राङसे हेला लमुला।
फट्टा ताम पाङ्बा जम्मादान ह्राङसे नाश लमुला
ओच्छे म्हि साइबागदेदेन फट्टा ताम लबागदेदा ह्राङसे हेला लमुला।
तर ङा चा ह्राङला खाइमै आजिन्बा मायासे लमा ह्राङला दिम न्हङ्री वाङ्ला।
सेमहेन्सेन ह्राङला चोखो मन्दिरपट्टि दोःसी ङाइ ह्राङदा फ्या लला
परमप्रभु! ङाला शत्रुगदे चुदे ल्हानान मुला
थेतबासेलमा ङादा ह्राङला सत्य ग्यामरी थोगो।
ङा भ्रबाला लागिरी ह्राङला ग्याम सोझो स्होपिन्गो।
थेनीगदेला सुङ्री सत्य ताम मुनोन आरे,
थेनीगदेला सेम नाइबा तामसे प्लिङ्बा मुला।
थेनीगदेला ओल्गोङ्ग्याम चा आघप्ना थान्बा धुर्साग्याम थाङ् जे खबा ह्रङ् लसी नाइबा ताम जे थोमुला,
ओच्छे थेनीगदेला लेसे फट्टा ताम जे पाङ्मुला।
परमेश्वर! थेनीगदेला दोष उन्सी थेनीगदेदा सजाय पिन्गो।
थेनीगदेसे लबा जालरी थेनीगदेन परब तना लसी पिन्गो।
थेनीगदेसे ल्हानान थरीला आज्यबा लबासेलमा थेनीगदेदा ख्लासी पिन्गो।
तिग्दा भिसम थेनीगदेसे ह्राङला बिरोध लसी गे लबा मुला।
तर ह्राङ मुबा ग्लारी खबागदे चा ताङ्गै
ओच्छे थेनीगदे सदन ताङ्सी ताङ्सी व्हाइ गोगै।
ह्राङसे थेनीगदेदा जोगब लसी पिन्गो,
ह्राङदा माया लबागदे सेमहेन्सेन ताङ्गै
तिग्दा भिसम परमप्रभु! ह्राङसे कुल्बा अन्छार भ्रबा म्हिगदेदा ह्राङसे मोलम पिन्मुला,
ढालसे जोगब लबा ह्रङ् लसी ह्राङला दयामायासे थेनीगदेदा जोगब लसी थान्बा मुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.