Eastern Tamang Language Bible
व्हाइ 122
यरूशलेमला जयजयकार लबा
यरूशलेमरी निबा धुइरी गोबा दाऊदला व्हाइ
“य्हाङ परमप्रभुला दिमरी निइ” भिसी
थेनीगदेसे ङादा पाङ्मा, ङा ल्हानान ताङ्जी।
यरूशलेम, दन्दे ङनी
एला म्रापगदेरी राप्सी चिबा मुला।
यरूशलेम, ए ज्यना लसी स्होबा,
कोङ्बा सहर हिन्ना।
परमप्रभुसे इस्राएलला वंशगदेदा पिन्बा ठिम अन्छार,
चुरी परमप्रभुला म्हिगदे परमप्रभुला मिन किन्सी जयजयकार लबारी खमुला।
थेरी निसाफ लमा चिबा ठिगदे मुला,
थेरी दाऊदला वंशला ठिगदे मुला।
यरूशलेमरी शान्ति तगै भिसी प्रार्थना लउ,
“एदा माया लबागदे जोगब तगै।
एला पर्खाल न्हङ्री शान्ति तगै,
ओच्छे एला ग्लेखाङ् न्हङ्री ज्यबा तगै।”
ङाइ ङाला ज्योज्यो आलेगदेदेन कुटुम्बागदेला लागिरी चुह्रङ् भिसी पाङ्ला,
“एनीगदेदा शान्ति तगै।”
परमप्रभु ङन्ना परमेश्वरला दिमला लागिरी
यरूशलेम, ङाइ एदा सदन ज्यबा लबारी म्हाइला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.