Eastern Tamang Language Bible
लूका 6:31
Verse 31 is marked below, with the whole chapter around it. Read from the start
येशू ब्लप्बा न्हबा धिननाएनोन प्रभु हिन्ना
मत्ती १२:१-८; मर्कू २:२३-२८
ब्लप्बा न्हबा धिनकुनु येशू भुग्याम फेप्बान मुबा। थे धुइरी थेला चेलागदेसे ग्वाला नम थुसी यारी न्हइसी चबारी छ्याइजी।1 तर फरिसीगदे न्हङ्री कोइ कोइसे येशूला चेलागदेदा चुह्रङ् भिसी पाङ्जी, “ब्लप्बा न्हबा धिनकुनु लबारी आतबा गे एनीगदेसे तिग्दा लबा?” जमाहेन्से येशूसे फरिसीगदेदा चुह्रङ् भिसी सुङ्जी, “एनीगदेसे परमेश्वरला बचन पढब लबा आरे? दाऊदसे थेदेन छ्याम मुबागदे फोख्रेन्बा धुइरी थेसे तिग लजी?2 थेसे पूजाहारीगदे बाहेक स्य्हान्दोसे चबारी आतबा गेङ परमेश्वरला दिमरी वाङ्सी तेःसी चजी। ओच्छे थेसे ह्राङदेन छ्याम मुबागदेदाएनोन पिन्मा खालैसेन तिगै पाङ्जी?”3
जमाहेन्से येशूसे थेनीगदेदा चुह्रङ् भिसी सुङ्जी, “परमेश्वरसे पुइखबा म्हि ब्लप्बा न्हबा धिनना प्रभु हिन्ना।”
येशूसे या खर्बा म्हिला या खम्ना लबा
मत्ती १२:९-१४; मर्कू ३:१-६
ब्लप्बा न्हबा अर्गु धिनकुनु येशूसे यहूदीगदे ह्रुप तबा दिम न्हङ्री परमेश्वरला य्हुल्साला बारेरी लोप्बारी छ्याइजी। थेरी दाहिने या खर्बा म्हि गिक मुबा। ब्लप्बा न्हबा धिनकुनु येशूसे थे म्हिला खर्बा या खम्ना लला वा भिसी यहूदी धर्मगुरुगदेदेन फरिसीगदेसे दोष लबाला लागिरी चिवा लसी चिबा मुबा। तर येशूसे थेनीगदेला सेमला ताम था याङ्सी थे या खर्बा म्हिदा “ए रेःसी चुरी राप्गो” भिसी सुङ्जी। ओच्छे थे म्हि राप्जी। जमाहेन्से येशूसे थेनीगदेदा चुह्रङ् भिसी सुङ्जी, “थेह्रङ् भिसम चु तामला जोहाब पिन्गो, ब्लप्बा न्हबा धिनकुनु ज्यबा लबादेन नाइबा लबा, अथवा म्हि सोना लबादेन सिना लबा खजिबा चा ज्यबा हिन्ना?” ओच्छे येशूसे ह्राङला क्युर्सीन मुबा म्हिगदेदा स्हीसी थे या खर्बा म्हिदा “एला या तन्गब लउ!” भिसी सुङ्जी। ओच्छे थेसे या तन्गब लमैछ्याम थेला या खम्जी। चु म्राङ्सी फरिसीगदेदा बोमो रेःसी दाहेन्से येशूदा तिग लबा भिसी ह्राङ ह्राङ न्हङ्री सल्लाह लजी।
येशूसे च्युक न्ही चेलागदेदा धम्बा
मत्ती १०:१-४; मर्कू ३:१३-१९
तिरेकुनु येशू गङ्री फेप्सी म्हुन गिकनोन परमेश्वरदेन छ्याम प्रार्थना लजी। ओच्छे स्य्हो तमाहेन्से येशूसे ह्राङला चेलागदेदा ङ्योइसी थेनीगदे न्हङ्री च्युक न्ही चेलादा धम्जी। ओच्छे थेनीगदेदा मूल चेला भिसी मिन थान्जी। सिमोनदा येशूसे पत्रुस भिसी सुङ्जी, थेला आले अन्द्रियास ओच्छे याकूब, यूहन्ना, फिलिप, बारथोलोमाइ, मत्ती, थोमा, अल्फयसला झा याकूब ओच्छे सिमोन। चु सिमोनदा ह्राङला य्हुल्सादा माया लबा म्हि भिसी पाङ्मुबा। याकूबला झा यहूदा, ओच्छे यहूदा इस्करियोत चुनोन यहूदा इस्करियोतसे लिच्छा येशूदा चुङ्सी म्हिगदेला यारी जिम्मा पिन्जी।
येशूसे ल्हानान म्हिगदेदा खम्ना लबा
मत्ती ४:२३-२५
येशू ह्राङसे धम्बा चेलागदेदेन छ्याम गङग्याम मार फाप्सी सम्म ग्लारी फेप्खसी राप्सी धन्छ्याजी। जमाहेन्से येशूदेन छ्याम भ्रबा म्हिला हुल ओच्छे यहूदिया अञ्चलला जम्मान ग्लादेन यरूशलेम सहर, ओच्छे टुरोसदेन सीदोन भिबा ग्लाग्याम म्हिला हुल येशूसे लोप्बा ताम ङ्यन्बारी ओच्छे ह्राङ ह्राङला रोगगदे म्हाना लबारी खजी। थेरी म्हाङ्से स्याप्सी आखम्बा म्हिगदेएनोन खम्जी। थेतबासेलमा जम्मान म्हिगदेसे येशूदा थुर्बारी म्हाइमुबा। तिग्दा भिसम येशूदेन छ्याम म्हिगदेदा खम्ना लबा शक्ति मुबा। थे शक्तिग्याम रोगसे स्याप्बा जम्मान म्हिगदे खम्जी।
दुखदेन सुख
मत्ती ५:१-१२
जमाहेन्से येशूसे ह्राङला चेलागदेदा स्हीबान चुह्रङ् भिसी सुङ्जी,
“प्राङ्बोगदे, एनीगदेसे परमेश्वरग्याम मोलम याङ्ला।
तिग्दा भिसम परमेश्वरला य्हुल्सा एनीगदेलान हिन्ना।
फोख्रेन्बा म्हिगदे, एनीगदेसे परमेश्वरग्याम मोलम याङ्ला।
तिग्दा भिसम एनीगदेदा परमेश्वरसे म्रेन्ना लला।
ओच्छे क्राबा म्हिगदे, एनीगदेसे परमेश्वरग्याम मोलम याङ्ला।
तिग्दा भिसम एनीगदे ताङ्सी नेम्याङ्ला।
“परमेश्वरसे पुइखबा म्हिदा विश्वास लबासेलमा म्हिगदेसे एनीगदेदा हेला लसी नाम्साग्यामसे तेःला ओच्छे जम्मासेन एनीगदेदा खिसी लमाएनोन एनीगदेसे परमेश्वरग्याम मोलम याङ्ला। 4
“थे धुइरी एनीगदे फुरफुर ताङ्गो। तिग्दा भिसम स्वर्गरी एनीगदेसे घ्रेन इनाम याङ्ला। एनीगदेदा दुख पिन्बागदेला आखेम्हेमेगदेसेनोन अगमवक्तागदेदा चुह्रङ्नोन लमुबा। 5
“फ्युक्पोगदे, एनीगदेसे परमेश्वरग्याम सजाय याङ्ला।
तिग्दा भिसम एनीगदेसे मोजमजा लसी जिन्बा मुला।
म्रेन्बागदे, एनीगदेसे परमेश्वरग्याम सजाय याङ्ला।
तिग्दा भिसम एनीगदे फोइथाननोन चितोःला।
ताङ्बागदे, एनीगदेसे परमेश्वरग्याम सजाय याङ्ला।
तिग्दा भिसम एनीगदे दुख नासी क्रासी चितोःला।
म्हिगदेग्याम मान याङ्बागदे, एनीगदेसे परमेश्वरग्याम सजाय याङ्ला।
तिग्दा भिसम एनीगदेला आखेम्हेमेगदेसेनोन फट्टा अगमवक्तागदेदा मान लमुबा।
येशूसे शत्रुदाएनोन माया लतोःला भिसी लोप्बा
मत्ती ५:३८-४८; ७:१२
“तर ङाइ लोप्बा ताम ङ्यन्बागदेदा ङाइ पाङ्ला, एनीगदेसे ह्राङला शत्रुगदेदा माया लउ, ओच्छे ह्राङदा हेला लबागदेदा ज्यबा व्यवहार लउ। एनीगदेदा केःबागदेदा परमेश्वरसे मोलम पिन्गै भिसी प्रार्थना लउ। ओच्छे खालैसे एनीगदेदा आज्यबा लजी भिसम थेनीगदेदा ज्यबा तगै भिसी परमेश्वरदेन छ्याम प्रार्थना लउ। खालैसे एदा ग्रम्बा गिकरी तोजी भिसम अर्गुपट्टिला ग्रम्बाएनोन तासी पिन्गो। ओच्छे एला स्कोट भोर्बारी छ्याइबादा लबिदाएनोन पिन्गो। एदेन छ्याम ह्रीबागदेदा पिन्गो, ओच्छे एसे थेदेन छ्याम दोःसी आह्रीगो। एनीगदेदा स्य्हान्दो म्हिगदेसे जस्तो व्यवहार लगै भिसी म्हन्बा मुला, एनीगदेसेनोन स्य्हान्दोगदेदा थेह्रङ्नोन लउ।6
“चुदे एनीगदेदा माया लबादा जे एनीगदेसे माया लजी भिसम एनीगदेदा तिग ज्यबा तला? तिग्दा भिसम पापीगदेसेनोन ह्राङदा माया लबागदेदा माया लमुला। ओच्छे एनीगदेसे ह्राङदा ज्यबा लबादा जे ज्यबा लजी भिसम एनीगदेदा तिग ज्यबा तला? तिग्दा भिसम पापीगदेसेनोन थेह्रङ्नोन लमुला। चुदे एनीगदेसे दोःसी याङ्बा सेम लसी खालैदा छे पिन्जी भिसम एनीगदेदा तिग ज्यबा तला? तिग्दा भिसम पापीगदेसे जे जति छे पिन्मुला होत्तेन किन्बा आश लसी पापीगदेदान छे पिन्मुला। तर ह्राङला शत्रुगदेदा माया लउ, जम्मादान ज्यबा लउ, दोःसी किन्बा सेम लसी छे आपिन्गो ओच्छे एनीगदेला मान घ्रेन तला। एनीगदे स्वर्गरी धन्छ्याबा जम्मान भन्दा घ्रेन परमेश्वरला सन्तान तला। तिग्दा भिसम परमेश्वरसे बैगुनीदेन ह्राङला जे ग्याम च्याबा म्हिगदेदाएनोन दया लमुला। थेतबासेलमा एनीगदेला परमेश्वर आबासे दया लबा ह्रङ् एनीगदेसेनोन दया लउ।
स्य्हान्दोदा दोष आलउ
मत्ती ७:१-५
“स्य्हान्दोदा दोष लसी आभ्रउ ओच्छे परमेश्वरसेनोन एनीगदेदा दोष आल। म्हिगदेला निसाफ लसी आभ्रउ ओच्छे परमेश्वरसेनोन एनीगदेला निसाफ आल। म्हिगदेदा माफ पिन्गो ओच्छे परमेश्वरसेनोन एनीगदेदा माफ पिन्ना। म्हिगदेदा पिन्गो ओच्छे परमेश्वरसेनोन एनीगदेदा पिन्ना। परमेश्वरसे मि छुइसी छुइसी पिन्ना ओच्छे जुन दप्बा स्हेसे एनीगदेसे स्य्हान्दोगदेदा पिन्ना, थेनोन दप्बा स्हेसे एनीगदेसे याङ्ला।”
येशूसे थेनीगदेदा उखानग्याम चुह्रङ् भिसी सुङ्जी, “तिग मी आम्राङ्बा म्हिसे मी आम्राङ्बा म्हिदान डोर्याब लखम्ला? चुदे थेसे डोर्याब लजी भिसम थे न्हीनोन व्हाङ्री ताइला।7 ओच्छे खजिबै चेला ह्राङला गुरु भन्दा घ्रेन आत, तर थेसे लोप्सी जिन्माहेन्से गुरु ह्रङ्बान तला।8
“स्य्हान्दोला गोरी सेः भ्रबा म्राङ्बासे ह्राङला गोरी मुइ भ्रबा तिग्दा आम्राङ्बा? ह्राङला गोरी भ्रबा मुइ आम्राङ्बासे खाह्रङ् लसी आलेदा ‘खाइ, एला गोला सेः तेःसी पिन्ना भिसी पाङ्खम्ला।’9 कप्टी, ङाच्छा ह्राङला गोला मुइ तेःगो, ओच्छे जे एसे आलेला गोरी भ्रबा सेः तेःबारी खम्ला।
ज्यबा दोङला रोदेन आज्यबा दोङला रो
मत्ती ७:१६-२०; १२:३३-३५
“ज्यबा दोङरी आज्यबा रो आरो ओच्छे आज्यबा दोङरी ज्यबा रो आरो। जम्मान दोङ थेरी रोबा रो अन्छार ङोसेला। पुजुला दोङग्याम अञ्जीर आथु ओच्छे पोलाङ्ला दोङग्यामएनोन अङ्गुर आथु।10 तिग्दा भिसम ज्यबा सेम मुबा म्हिला सेम न्हङ्ग्याम ज्यबान ताम थोन्मुला ओच्छे नाइबा सेम मुबा म्हिला सेम न्हङ्ग्याम नाइबान ताम थोन्मुला। थेतबासेलमा म्हिला सेम न्हङ्री जे मुला थेनोन थेला सुङग्याम पाङ्ला।11
बुद्धि मुबा म्हिदेन मूर्ख म्हिसे स्होबा दिम
मत्ती ७:२४-२७
“ङाइ कुल्बा ताम आङ्यन्सम तिग्दा ङादा ‘प्रभु, प्रभु’ जे भिबा? ङा मुबा ग्लारी खबा म्हिसे ङाइ पाङ्बा ताम ङ्यन्ना ओच्छे ङाइ कुल्बा अन्छार गे लला। थे खाह्रङ्बा म्हि हिन्ना भिबा ताम ङाइ एनीगदेदा पाङ्ला। थे म्हिसे ह्राङला दिम स्होबा धुइरी जग नुप्ना ख्वसी स्होजी। ओच्छे नाम, भाल खमा थे दिमरी टजी। तसैनोन थे दिम आफुप्नी, तिग्दा भिसम थे दिमला जग नुप्ना ख्वसी स्होबा मुबा। तर जुन म्हिसे ङाइ पाङ्बा ताम थेःसी थे अन्छार गे आल थे म्हि चा जग नुप्ना आख्वना दिम स्होबा म्हि ह्रङ्बा हिन्ना। थेतबासेलमा नाम, भाल बाढी खबा धुइरी थे दिमरी टसी थे दिम फुप्सी ल्हानान नोक्सान तजी।”
Source notes (11)
- Cross-reference ठिम २३:२५
- Cross-reference १ शमू २१:१-६
- Cross-reference लेवी २४:९
- Cross-reference १ पत्रु ४:१४
- Cross-reference २ काइ ३६:१६; मूल ७:५२
- Cross-reference मत्ती ७:१२
- Cross-reference मत्ती १५:१४
- Cross-reference मत्ती १०:२४-२५; यूह १३:१६; १५:२०
- Footnote “ह्राङला गोरी मुइ भ्रबा भिबादेन आलेला गोरी मुबा सेः” भिबा तामदा ग्रीक बाइबलरी “ह्राङला मीरी मुबा मूढादा वास्ता आलना ह्राङला आलेला मीरी मुबा धुलु तेःसी पिन्ना” भिसी भ्रिबा मुला।
- Cross-reference मत्ती १२:३३
- Cross-reference मत्ती १२:३४
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.