Eastern Tamang Language Bible
लूका 21
ह्रेम्बो सिबा म्रिङ्म्हेमेसे पिन्बा भेटी
मर्कू १२:४१-४४
येशूसे परमेश्वरला मन्दिररी फ्युक्पो म्हिगदेसे भेटी युबा ताङ्री भेटी युबान लबा म्राङ्जी। ओच्छे ह्रेम्बो सिबा प्राङ्बो म्रिङ्म्हेमेसेनोन डबल न्ही युबा म्राङ्जी। चु म्राङ्सी येशूसे चुह्रङ् भिसी सुङ्जी, “च्यागो, ङाला ताम ङ्यन्गो। स्य्हान्दो म्हिगदेसे भन्दा चु ह्रेम्बो सिबा प्राङ्बो म्रिङ्म्हेमेसे ल्हानान भेटी युबा मुला। तिग्दा भिसम स्य्हान्दो म्हिगदेसे ह्राङदेन छ्याम मुबा ल्हानान सम्पत्तिग्याम युजी। तर चु ह्रेम्बो सिबा म्रिङ्म्हेमे प्राङ्बो तसीनोन ह्राङदेन छ्याम मुबा जति जम्मान युजी।”
परमेश्वरला मन्दिर नाश तला
मत्ती २४:१-२; मर्कू १३:१-२
तिरेकुनु चेलागदेसे चुह्रङ् भिसी ताम लबान मुबा, “ज्यबा ज्यबा युङ्बादेन म्हिगदेसे फुल्बा भेटीगदेग्याम जेःना लसी स्होबा चु परमेश्वरला मन्दिर गादे जेःबा!” तर येशूसे थेनीगदेदा चुह्रङ् भिसी सुङ्जी, “तिरेकुनु चुह्रङ्बा धुइएनोन खाल, थे धुइरी दन्दे म्राङ्बा चु मन्दिरला युङ्बा गिकनोन बाँकी आचिना जम्मान फुप्ला।”
जम्बुलिङ नाश तबा धुइला चिनुगदे
मत्ती २४:३-१४; मर्कू १३:३-१३
ओच्छे थेनीगदेसे चुह्रङ् भिसी ङ्योइजी, “गुरु, चु तामगदे खाइमा तला? चुह्रङ् तबारी छ्याइजी भिसी खाह्रङ्बा चिनु म्राङ्ला?” येशूसे थेनीगदेदा चुह्रङ् भिसी सुङ्जी, “एनीगदे होशियार तसी चिउ, खालैसे एनीगदेदा झुक्याब आलगै। तिग्दा भिसम ङाला मिन किन्सी ‘ङानोन थार्बा पिन्बा ख्रीष्ट हिन्ना’ भिसी ल्हानान म्हिगदे खला। ओच्छे ‘धुइ खसी जिन्बा मुला’ भिसी पाङ्ला, तर एनीगदेसे थेनीगदेला ताम आङ्यन्गो। ओच्छे लडाइ तजी भिबा ताम थेःसी एनीगदे आत्तेब आतउ। तिग्दा भिसम चु जम्बुलिङ नाश तबा भन्दा ङाच्छा चु तनोन तोःला। तर थेनोन धुइरी चा चु जम्बुलिङ नाश आत।” जमाहेन्से येशूसे थेनीगदेदा दोःसी चुह्रङ् भिसी सुङ्जी, “म्हि य्हुल्ला बिरोधरी म्हि य्हुलनोन ओच्छे य्हुल्साला बिरोधरी य्हुल्सान रेःला। ओच्छे घ्रेन घ्रेन सङ्गुल खला, जम्मान ग्लारी अनिकालदेन देशान खला। मुरी घ्रेन घ्रेन लोङ्बा खबा चिनुगदे म्राङ्ला।
“तर चु तबा भन्दा ङाच्छा म्हिगदेसे एनीगदेदा चुङ्सी दुख पिन्ना। ओच्छे यहूदीगदे ह्रुप तबा दिमरी जिम्मा लसी एनीगदेदा झ्याल्खानरी झाङ्ला। ओच्छे एनीगदेसे ङादा विश्वास लबासेलमा ग्लेदेन अञ्चलाधीशगदेला ङाच्छापट्टि भोर्ला। थे धुइरी एनीगदेसे ङाला बारेरी पाङ्बा मौका याङ्ला। तर एनीगदेसे ह्राङदा जोगब लबारी तिग पाङ्तोःबा भिसी धन्दा सुर्दा आलउ। तिग्दा भिसम थे धुइरी एनीगदेसे तिग ताम पाङ्तोःबा थे ताम पाङ्बारी ङाइ एनीगदेदा ज्ञान बुद्धि पिन्ना। जमाहेन्से थेनीगदेसे एनीगदेला ताम थाबारी आखम ओच्छे एनीगदेसे पाङ्बा तामला जोहाबएनोन पिन्बारी आखम।1 तर एनीगदेदा ह्राङलान आबा आमा, ज्योज्यो आले ओच्छे ह्राङला म्हिगदेदेन ह्रोगदेसेनोन चुङ्सी पिन्ना। ओच्छे एनीगदे न्हङ्ला कोइ कोइदा मि म्हिगदेसे साइपुङ्ला। थेह्रङ् लसीन ङादा विश्वास लबासेलमा एनीगदेदा जम्मान म्हिगदेसे हेला लला। तर एनीगदेला थोबोला क्रा गिक सुत्तै आताइ। जस्तोन दुख तसैनोन एनीगदेसे सेमहेन्सेन विश्वास लसी चिबासेलमा जुकजुकधोनाला जुनी याङ्ला।
येशूसे यरूशलेम नाश तला भिसी सुङ्बा
मत्ती २४:१५-२१; मर्कू १३:१४-१९
“यरूशलेम सहरदा सिपाहीगदेसे घेरब लबा म्राङ्माहेन्से सहर नाश तबा धुइ खसी जिन्जी भिसी एनीगदेसे घोउ। थे धुइरी यहूदिया अञ्चलरी मुबागदे गङ्रीक्यार य्हार्गै, सहर न्हङ्री मुबागदेसे सहर ख्लागै ओच्छे नाम्सारी मुबागदे सहररी आखगै। तिग्दा भिसम थे धिन चा परमेश्वरग्याम सजाय याङ्बा धिन हिन्ना। ओच्छे परमेश्वरला बचनरी भ्रिबा जम्मान ताम पूरा तनोन तला।2 थे धुइरी जीउ न्हीला म्रिङ्म्हेमेदेन कोलादा ङ्हे ख्वाबा आमागदेदा झन गादे ल्हानान दुख तला! ओच्छे य्हुल्सा नाङ्नोन ल्हानान दुख तला। चु य्हुल्ला म्हिगदेदा परमेश्वरसे ल्हानान सजाय पिन्ना। थे धुइरी कोइ कोइ म्हिगदेदा तरवारसे ताम्सी साइला, कोइ कोइदा चुङ्सी य्हुल्सा य्हुल्सारी भोर्ला। ओच्छे अर्गु य्हुल्ला म्हिगदेला धुइ आजिन्देधोना थेनीगदेसे यरूशलेमरी रजाँइ लला।
येशू दोःसी फेप्खबा धुइ
मत्ती २४:२९-३१; मर्कू १३:२४-२७
“लनी धिनीदेन सारगदेरी खाइमै आम्राङ्बा चिनुगदे म्राङ्ला। ओच्छे समुद्र ङ्य्हाबादेन समुद्रला छालसे लमा जम्बुलिङला जम्मान म्हिगदे लोङ्सी आत्तेब तला। 3 जम्बुलिङरी तबारी छ्याइबा दुखला बारेरी था याङ्सी म्हिगदे लोङ्सी सिबा तेःबान तला। तिग्दा भिसम मुरी मुबा जम्मान शक्ति य्हाङ्य्होङ् तला। जमाहेन्से परमेश्वरसे पुइखबा म्हिदा घ्रेन शक्तिदेन य्हाल य्हालरी खसुरी खबान लबा म्राङ्ला।4 थेह्रङ् तमाहेन्से आलोङ्ना एनीगदेसे स्वर्गपट्टि च्यागो, तिग्दा भिसम एनीगदेदा योनान थार्ना लला।”
अञ्जीरला दोङ च्यासी लोप्तोःबा ताम
मत्ती २४:३२-३५; मर्कू १३:२८-३१
जमाहेन्से येशूसे थेनीगदेदा उखानग्याम चुह्रङ् भिसी सुङ्जी, “एनीगदेसे अञ्जीर दोङदेन अर्गु दोङगदे भुबा म्राङ्माहेन्से दाहेन्से छेप्बा छबा ल खबारी छ्याइजी भिसी था याङ्मुला। थेह्रङ् लसीन ङाइ पाङ्बा ताम तबान लबा म्राङ्माहेन्से एनीगदेसे परमेश्वरला य्हुल्सा खबा धुइ तबारी छ्याइजी भिसी था याङ्गो।
“च्यागो, एनीगदेसे ङाला ताम ङ्यन्गो, चु जम्मान ताम पूरा आतदेधोना दन्देला म्हिगदे आसि। मुदेन जम्बुलिङ म्हासी निसैनोन ङाला बचन खाइमै आम्हा।
येशूसे छोर्सी चिउ भिसी लोप्बा
“तर एनीगदे होशियार तसी चिउ, आहिन्सम मोजमजा लसी ङ्य्होइसी भ्रबादेन ह्राङला ल्हुइला धन्दा सुर्दासेलमा एनीगदेला सेम न्होङ्ला। ओच्छे परमेश्वरसे पुइखबा म्हि खमा एनीगदे तिक्खुरीन वारी परब तबा ह्रङ् तला। थेह्रङ् लसीन जम्बुलिङरी चिबा जम्मान म्हिगदेथोरी थे धिन खला। थेतबासेलमा एनीगदे थे लोङ्बा खबा धुइरी जोगब तबारीदेन परमेश्वरसे पुइखबा म्हिला ङाच्छा राप्बारी खम्गै भिसी प्रार्थना लसी छोर्सी चिउ।”
थे धुइरी येशूसे धिनीरी म्हिगदेदा परमेश्वरला मन्दिररी लोप्मुबा, ओच्छे म्हुन तमाहेन्से जैतून गङ्री बास स्य्हूबारी फेप्मुबा।5 येशूला बचन ङ्यन्बाला लागिरी म्हिगदे स्य्होरीन परमेश्वरला मन्दिररी खमुबा।
Source notes (5)
- Cross-reference लूका १२:११-१२
- Cross-reference होशे ९:७
- Cross-reference यशै १३:१०; इज ३२:७; योए २:३१; उन्बा ६:१२-१३
- Cross-reference दानि ७:१३; उन्बा १:७
- Cross-reference लूका १९:४७
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.