Eastern Tamang Language Bible
यहो 10
धिनी अघल्बा धिन
यहोशूसे यरीहोदेन थेला ग्लेदा लबा ह्रङ्नोन ऐ सहरदेन थेला ग्लेदाएनोन लजी। ओच्छे ऐ सहर ह्राङला यारी किन्जी भिबा ताम यरूशलेमला ग्ले अदोनिसेदेकसे थेःजी। ओच्छे गिबोनना म्हिगदे इस्राएलीगदेदेन छ्याम ढिक्सी चिबा मुला भिबा तामएनोन थेसे थेःजी। चु ताम थेःसी थेदेन थेला म्हिगदे ल्हानान लोङ्जी। तिग्दा भिसम ग्ले मुबा ह्रङ्बान गिबोन गोर गिक घ्रेन सहर मुबा। थे ऐ सहर भन्दाएनोन घ्रेन सहर मुबा ओच्छे थेला जम्मान म्हिगदे लडाइ लबारी सेबादेन भङ्बा मुबा। थेतबासेलमा यरूशलेमला ग्ले अदोनिसेदेकसे हेब्रोनना ग्ले होहाम, यर्मूतला ग्ले पिराम, लाकीशला ग्ले यापीदेन एग्लोनना ग्ले दबीरदा चुह्रङ् भिसी समाचार पुइजी, “ह्राङनी ङा मुबा ग्लारी फेप्खउ, ओच्छे गिबोनदेन छ्याम लडाइ लबारी ङादा ह्रो लउ। तिग्दा भिसम थे यहोशू ओच्छे इस्राएलीगदेदेन छ्याम ढिक्बा मुला।”
जमाहेन्से एमोरीगदेला ग्ले ङ्हा, यरूशलेम, हेब्रोन, यर्मूत, लाकीशदेन एग्लोनना ग्ले ङ्हा ढिक्जी, ओच्छे थेनीगदेसे ह्राङ ह्राङला जम्मान सिपाहीगदेदेन छ्यामनोन गिबोनना ङाच्छा पाल फ्रेङ्जी ओच्छे गिबोनना म्हिगदेला बिरोध लसी लडाइ लजी।
गिलगालरी स्होबा पालरी यहोशू मुबा ग्लारी गिबोनना म्हिगदेसे चुह्रङ् भिसी म्हि पुइजी, “ङनी मुबा ग्लारी योना फेप्खसी ङन्दा जोगब लउ, ओच्छे ह्रो लउ। ह्राङला गे लबागदेदा आख्लागो, तिग्दा भिसम गङ् य्हुल्सारी चिबा एमोरीगदेला जम्मान ग्लेगदे ङन्ना बिरोधरी पोप तबा मुला।”
थेतबासेलमा जम्मान लडाइ लबा भङ्बा म्हिगदेदा भोर्सी यहोशू गिलगालग्याम निजी। ओच्छे परमप्रभुसे यहोशूदा चुह्रङ् भिसी सुङ्जी, “एनीगदे आलोङ्गो, तिग्दा भिसम ङाइ थेनीगदेदा एला यारी जिम्मा पिन्बा मुला। थेनीगदे गिकएनोन एला ङाच्छा राप्बारी आखम।”
यहोशू म्हुनङ् म्हुननोन गिलगालग्याम निसी तिक्खुरीन एमोरीगदेदेन छ्याम लडाइ लजी। परमप्रभुसे थेनीगदेदा इस्राएलीगदेला ङाच्छा लोङ्सी थुरथुर तना लजी। ओच्छे इस्राएलीगदेसे गिबोनरी थेनीगदेदा ब्रेना लजी, ओच्छे बेथ-होरोनना खानरी थेनीगदेदा ताप्सी ताप्सी आजेकादेन मक्केदाधोना साइबान निजी। इस्राएलीगदेदा म्राङ्सी एमोरीगदे बेथ-होरोनहेन्से आजेकाधोना ग्युरोरी य्हार्बान मुबा, थेनीगदेथोरी परमप्रभुसे स्वर्गग्याम घ्रेन घ्रेन सेर्बा पुइखजी। एमोरीगदे इस्राएलीगदेसे तरवारसे ताम्सी साइबा भन्दा ल्हाना सेर्बाग्याम सिजी।
परमप्रभुसे एमोरीगदेदा इस्राएलीगदेला यारी जिम्मा पिन्बा धिनकुनु यहोशूसे परमप्रभुदेन छ्याम इस्राएलीगदेला ओन्छाङ्री चुह्रङ् भिसी पाङ्जी,
“धिनी, ए चा गिबोनथोरी,
ओच्छे लनी, ए चा अय्यालोनना ब्याँसीथोरी छ्यासी चिउ।”
थेतबासेलमा इस्राएली य्हुल्से ह्राङला शत्रुदा आढादेधोना धिनीदेन लनी थेनोन ग्लारी छ्याबाला छ्याबान तजी। चु तामला बारेरी याशारला किताबरी भ्रिबा मुला। धिनी मु गुङ्री छ्याजी ओच्छे धिन गिकनोन धिनी आघल्नी।1 परमप्रभुसे म्हिला ताम ङ्यन्जी। थेह्रङ्बा धिन ङाच्छाएनोन आतनी लिच्छाएनोन खाइमै आतनी। परमप्रभुसे पक्कान इस्राएलीगदेला लागिरी लडाइ लजी।
जमाहेन्से यहोशू ओच्छे थेदेन छ्याम मुबा जम्मान इस्राएलीगदे गिलगालरी मुबा ह्राङला पालरी दोःसी निजी।
यहोशूसे एमोरी ग्ले ङ्हादा चुङ्बा
थे ग्ले ङ्हा य्हार्सी मक्केदाला ऊरी लाबा मुबा। थे ग्ले ङ्हा मक्केदाला ऊरी लासी चिबा स्याप्जी भिबा समाचार यहोशू मुबा ग्लारी दोजी। चु थेःसी यहोशूसे चुह्रङ् भिसी पाङ्जी, “घ्रेन घ्रेन युङ्बा ब्लिङ्सी थे ऊला सुङ्री थान्गो, ओच्छे थेनीगदेदा ख्रुङ्बारी म्हिगदे ऊ ङाम्रीन थान्गो। तर एनीगदे चा थेरी ख्रुङ्सी आचिउ, एनीगदे चा ह्राङला शत्रुदा ताप्बाला ताप्बान लउ, थेनीगदेदा घ्यापग्याम छेक्गो। थेनीगदेदा थेनीगदेला सहरगदेरी वाङ्आपुङ्गो। तिग्दा भिसम परमप्रभु एनीगदेला परमेश्वरसे थेनीगदेदा एनीगदेला यारी जिम्मा पिन्बा मुला।” यहोशूदेन इस्राएलीगदेसे थेनीगदेदा साइजी, ओच्छे सोबागदे चा क्युर्सीन पर्खाल लबा सहर न्हङ्री वाङ्जी। जमाहेन्से जम्मान म्हि मक्केदाला पालरी यहोशू मुबा ग्लारी ज्यना लसी दोःसी खजी। इस्राएलीगदेला बिरोधरी खालैसे तिगै पाङ्आखम्नी।
यहोशूसे चुह्रङ् भिसी पाङ्जी, “ऊला सुङ् ठोङ्सी थे ग्ले ङ्हादा ऊग्याम तेःसी ङा मुबा ग्लारी भउ।” थेनीगदेसे ऊला सुङ् ठोङ्सी यरूशलेमला ग्ले, हेब्रोनना ग्ले, यर्मूतला ग्ले, लाकीशला ग्लेदेन एग्लोनना ग्लेदा ऊग्याम तेःसी भजी। थेनीगदेसे थे ग्लेदा यहोशू मुबा ग्लारी भमाहेन्से यहोशूसे इस्राएलला जम्मान म्हिगदे ओच्छे थेदेन छ्यामनोन खबा सिपाहीगदेला हाकिमगदेदा ङ्योइसी चुह्रङ् भिसी पाङ्जी, “चुरी खउ, ओच्छे एनीगदेला काङसे चुनीगदेला खारेरी नाङ्गो।” ओच्छे थेनीगदे खसी ह्राङ ह्राङला काङसे थेनीगदेला खारेरी नाङ्जी। यहोशूसे थेनीगदेदा चुह्रङ् भिसी पाङ्जी, “आलोङ्गो, सुर्दा आलउ। आँट लसी भङ लउ, तिग्दा भिसम एनीगदेसे लतोःबा लडाइरी एनीगदेला शत्रुगदे जम्मादान परमप्रभुसे चुह्रङ्नोन लला।” जमाहेन्से यहोशूसे थे ग्ले ङ्हादा छेक्सी साइजी, ओच्छे थेनीगदेदा गोर ङ्हा दोङरी च्योजी, ओच्छे थेनीगदेला लाशदा ङ्यसेधोनान दोङरी च्योसी थान्जी। धिनी घल्माहेन्से यहोशूसे ह्राङला म्हिगदेदा थेनीगदेला लाश मार तेःगो भिसी कुल्जी। जमाहेन्से थेनीगदेला लाश दोङग्याम मार तेःसी थेनीगदे लासी चिबा ऊरीन भ्याङ्जी, ओच्छे ऊला सुङ्री घ्रेन घ्रेन युङ्बागदे थान्सी पिन्जी, थे युङ्बा तिनीला धिनधोनान मुनोन मुला।
यहोशूसे एमोरीगदेला अर्गु य्हुल्साएनोन ह्राङला यारी किन्बा
ओच्छे थेनोन धिनकुनु यहोशूसे मक्केदादा ह्राङला यारी किन्जी, ओच्छे थेदेन थेला ग्लेदा तरवारसे ताम्सी साइजी। थेसे थेरी मुबा जम्मान म्हिगदे गिकनोन बाँकी आथान्ना साइजी, यहोशूसे यरीहोला ग्लेदा लबा ह्रङ्नोन मक्केदाला ग्लेदाएनोन लजी।
जमाहेन्से यहोशू इस्राएलीगदेदेन छ्याम मक्केदाग्याम भ्रसी लिब्नारी निजी, ओच्छे थेदेन छ्याम लडाइ लजी। परमप्रभुसे थेदेन थेला ग्लेदा इस्राएलीगदेला यारी जिम्मा पिन्जी, ओच्छे थेदेन थेरी मुबा जम्मान म्हिगदेदा तरवारसे ताम्सी साइजी। थेसे खालैदान बाँकी आथान्नी। थेसे यरीहोला ग्लेदा लबा ह्रङ्नोन थेला ग्लेदाएनोन लबा मुबा।
जमाहेन्से यहोशू जम्मान इस्राएलीगदेदेन छ्याम लिब्नाग्याम भ्रसी लाकीशरी निजी, ओच्छे थेदा गुङ्री झाङ्सी थेदेन छ्याम लडाइ लजी। परमप्रभुसे लाकीशदा इस्राएलीगदेला यारी जिम्मा पिन्जी, ओच्छे अर्गु धिनकुनु थेनीगदेसे थेदा ह्राङला यारी किन्जी, ओच्छे यहोशूसे थेदेन थेरी मुबा जम्मान म्हिगदेदा लिब्नादा लबा ह्रङ्नोन लजी, थेनीगदेदा तरवारसे ताम्सी साइजी। थेनोन धुइरी गेजेरला ग्ले होराम लाकीशदा ह्रो लबारी खजी। तर यहोशूसे खालैदा छोन्बो आथान्ना होरामदेन थेला सिपाहीगदेदा ब्रेना लजी।
जमाहेन्से यहोशू जम्मान इस्राएलीगदेदेन छ्याम लाकीशग्याम भ्रसी एग्लोनरी निजी, ओच्छे थेनीगदेदा गुङ्री झाङ्सी थेदेन छ्याम लडाइ लजी। थेनीगदेसे थेनोन धिनकुनु थेदा नाश लसी ह्राङला यारी किन्जी। थेनीगदेसे लाकीशदा लबा ह्रङ्नोन थेला जम्मान म्हिदा तरवारसे ताम्सी साइजी।
जमाहेन्से यहोशू जम्मान इस्राएलीगदेदेन छ्याम एग्लोनग्याम तोर हेब्रोनरी निजी, ओच्छे थेनीगदेसे थेरीएनोन लडाइ लजी। थेनीगदेसे थे सहर ह्राङला यारी किन्जी, ओच्छे थेदेन थेला ग्ले ओच्छे थेला जम्मान नाम्सागदेदेन थेरी मुबा जम्मान म्हिगदेदा तरवारसे ताम्सी साइजी। थेनीगदेसे खालैदान बाँकी आथान्नी। एग्लोनरी लबा ह्रङ्नोन थेनीगदेसे थेदेन थेरी मुबा जम्मादान पूरन नाश लजी।
जमाहेन्से यहोशू जम्मान इस्राएलीगदेदेन छ्याम दोःसी दबीररी निजी, ओच्छे थेदेन छ्याम लडाइ लजी। थेनीगदेसे थेला ग्लेगदेदेन थेला जम्मान नाम्सागदेदा ह्राङला यारी किन्जी, ओच्छे थेनीगदेसे थेनीगदेदा तरवारसे ताम्सी साइजी। थेसे खालैदान बाँकी आथान्ना थेरी मुबा जम्मान म्हिगदेदा साइजी। थेनीगदेसे हेब्रोनदेन लिब्ना ओच्छे थेला ग्लेदा लबा ह्रङ्नोन, दबीरदेन थेला ग्लेदाएनोन लजी।
चुह्रङ् लसी यहोशूसे जम्मान य्हुल्सा, अथवा गङ्पट्टिला य्हुल्सा, लोपट्टिला नेगेव भिबा ग्ला, गङ्गदेदेन मधेस ओच्छे थेरी मुबा जम्मान ग्लेगदेदा नाश लजी। थेसे गोर गिकदाएनोन बाँकी आथान्नी। परमप्रभु इस्राएलला परमेश्वरसे कुल्बा अन्छार सा मुबा जत्ति जम्मादान थेसे नाश लजी। यहोशूसे कादेश-बर्नेहेन्से समुद्रला कुनीरी मुबा गाजाधोना ओच्छे गोशेनहेन्से गिबोनधोनाला जम्मान ग्लादा ब्रेना लजी। चु जम्मान ग्लेगदेदेन थेनीगदेला य्हुल्सागदेदाएनोन यहोशूसे तिरेम लडाइ लबारी थोन्बा धुइरीन ब्रेना लजी। तिग्दा भिसम परमप्रभु इस्राएलला परमेश्वरसेन इस्राएलीगदेला लागिरी लडाइ लबा मुबा। जमाहेन्से यहोशू जम्मान इस्राएलीगदेदेन छ्याम गिलगालरी मुबा पालरी दोःसी निजी।
Source notes (1)
- Cross-reference २ शमू १:१८
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.