Eastern Tamang Language Bible
यहो 9
गिबोनीगदेसे यहोशूदा झुक्यब लबा
जमाहेन्से यर्दन स्योङ्ला न्हुपपट्टि मुबा जम्मान ग्लेगदेसे इस्राएलीगदेसे ढाबा तामला बारेरी थेःजी। चु ग्लेगदे चा यर्दन स्योङ्ला न्हुपपट्टिला गङ्देन चेरी ओच्छे लेबनानधोनान घ्रेन समुद्रला कुनीरी चिबा हित्ती, एमोरी, कनानी, परिज्जी, हिव्वीदेन यबूसीगदेला ग्लेगदे मुबा। जमाहेन्से थेनीगदे जम्मान सेम गिक तसी यहोशू ओच्छे इस्राएलीगदेदेन छ्याम लडाइ लबारी पोप तजी।
तर गिबोनना म्हिगदेसे यरीहोदेन ऐ सहररी यहोशूसे तिग तिग लबा मुबा, थे जम्मान थेःसी जिन्बा मुबा। जमाहेन्से थेनीगदेसे झुक्याब लबारी म्हाइजी। ओच्छे थेनीगदेसे तिगै चबा स्हे ठीक लसी ढेबा बोरागदेदेन अङ्गुरला निङ्गु थान्बा ख्याबा ढिला ताङ्गदे ह्राङला गधाथोरी काप्जी। ओच्छे ह्रेम्फेबेगदेसे ह्राङला काङ्री बोक्टो लखमगदेदेन जीउरी बोक्टो क्वानगदे क्वान्जी। थेनीगदेला चबा स्हेगदेएनोन जम्मान खर्बादेन फुसा खबा मुबा। जमाहेन्से थेनीगदे गिलगालला पालरी यहोशू मुबा ग्लारी खसी यहोशूदेन इस्राएलीगदेदा चुह्रङ् भिसी पाङ्जी, “ङनी थारेङ् य्हुल्साग्याम खबा हिन्ना। थेतबासेलमा ङन्देन छ्याम ढिक्गो।”
ओच्छे इस्राएली ह्रेम्फेबेगदेसे थे हिव्वीगदेदा चुह्रङ् भिसी पाङ्जी, “एनीगदे ङन्नान गुङ्री चिबा म्हिगदेएनोन तखम्ला, खाह्रङ् लसी एनीगदेदेन छ्याम ङनी ढिक्खम्ला?”1
थेनीगदेसे यहोशूदा “ङनी ह्राङला गे लबा म्हिगदे हिन्ना” भिसी पाङ्जी।
तर यहोशूसे थेनीगदेदा चुह्रङ् भिसी ङ्योइजी, “एनीगदे खला हिन्ना, ओच्छे खानङ्ग्याम खबा हिन्ना?”
थेनीगदेसे यहोशूदा चुह्रङ् भिसी पाङ्जी, “ङनी ह्राङला गे लबा म्हिगदे थारेङ् य्हुल्साग्याम खबा हिन्ना, परमप्रभु ह्राङला परमेश्वरला मिन थेःसी खबा हिन्ना। तिग्दा भिसम ङन्से परमेश्वरला बारेरीदेन परमेश्वरसे मिश्र य्हुल्सारी लबा गेला बारेरी थेःबा मुला। यर्दन स्योङ्ला स्यारपट्टि चिबा एमोरीगदेला ग्ले न्ही, हेश्बोनना ग्ले सीहोनदेन अस्तारोतरी चिबा बाशानना ग्ले ओगदा तिग तिग लबा मुबा थे जम्मान ताम ङन्से थेःबा मुला।2 थेतबासेलमा ङन्ना गन्बागदेदेन ङन्ना य्हुल्साला जम्मान म्हिगदेसे ङन्दा चुह्रङ् भिसी पाङ्बा मुला, ‘एनीगदेसे ग्यामरी चबारी चबा स्हे भोर्सी थेनीगदेदा ह्रुप तबारी निउ, ओच्छे थेनीगदेसे ङन्दा चुह्रङ् भिसी पाङ्बा मुला, “ङनी मि ह्राङनीलान गे लबा म्हिगदे हिन्ना। थेतबासेलमा दाहेन्से य्हाङ ह्राङ ह्राङ न्हङ्री ढिक्गे।”’ ह्राङनी मुबा ग्लारी थोन्सी खबा धिनकुनु ङन्से चबाला लागिरी दिमग्याम चु गेङ लेप्लेप्नोन भसी खबा मुबा। तर दन्दे स्य्हीगो, चु खार्सी फुसा खसी जिन्बा मुला। अङ्गुरला निङ्गु युबा चु ढिला ताङ्गदे ङन्से छारनोन भबा मुबा। तर स्य्हीगो, चु ढेसी जिन्बा मुला, ओच्छे ङनी थारेङ्ग्याम खबासेलमा ङन्ना क्वानगदेदेन लखमगदेएनोन बोक्टो दोसी जिन्बा मुला।”
इस्राएलीगदेसे परमप्रभुदा आङ्योइनान थेनीगदेसे भबा चबा स्हे चजी। ओच्छे थेनीगदेदेन छ्याम ढिक्सी यहोशूसे कबुल लजी, ओच्छे थेनीगदेदा छोन्बोन थान्जी। ओच्छे तला भिसी इस्राएलीगदेला गन्बागदेसेनोन घ्रान चजी।
गिबोनीगदेदेन छ्याम कबुल लबा सोमरे लिच्छा थेनीगदे मि ह्राङलान खिम्जेमदेन ह्राङलान गुङ्री चिबा म्हिगदे चिम भिबा ताम इस्राएलीगदेसे था याङ्जी। थेतबासेलमा इस्राएलीगदे दिमग्याम थोन्सी सोमरेकुनु थेनीगदेला सहर गिबोन, कपीरा, बेरोतदेन किर्यत-यारीमरी दोखजी। इस्राएलीगदेसे थेनीगदेदेन छ्याम लडाइ आलनी। तिग्दा भिसम इस्राएलीगदेला गन्बागदेसे थेनीगदेदेन छ्याम परमप्रभु इस्राएलला परमेश्वरला मिनरी घ्रान चबा मुबा। जमाहेन्से जम्मान इस्राएलीगदेसे गन्बागदेला बिरोध लसी ताम लबारी छ्याइजी। तर जम्मान गन्बागदेसे इस्राएलीगदेदा चुह्रङ् भिसी पाङ्जी, “ङन्से थेनीगदेदेन छ्याम परमप्रभु इस्राएलला परमेश्वरला मिनरी घ्रान चबा मुला। थेतबासेलमा दाहेन्से ङन्से थेनीगदेदा तिगै लआखम। ङन्से थेनीगदेदेन छ्याम घ्रान चबासेलमा थेनीगदेदा छोन्बोन थान्तोःला, आहिन्सम परमेश्वरसे ङन्दा सजाय पिन्ना।” ओच्छे गन्बागदेसे चुह्रङ् भिसी पाङ्जी, “थेनीगदेदा छोन्बोन थान्गो। तर थेनीगदेदा य्हाङला लागिरी सिङदेन क्युइ खोबा म्हि स्होसी थान्गो।” थेतबासेलमा इस्राएली गन्बागदेसे थेनीगदेदेन छ्याम लबा कबुल अन्छार थेनीगदेदा चिपुङ्जी।
ओच्छे यहोशूसे गिबोनीगदेदा ङ्योइसी चुह्रङ् भिसी पाङ्जी, “पाङ्नोन तोःमा एनीगदे मि ङनीगदेलान गुङ्री चिबा म्हिगदे चिम, तर ‘ङनी ल्हानान थारेङ्ला य्हुल्साग्याम खबा हिन्ना,’ भिसी तिग्दा ङन्दा झुक्याब लबा? थेतबासेलमा दाहेन्से एनीगदे सराप याङ्बा म्हि दोबा मुला। एनीगदे ङाला परमेश्वरला दिमरी सदन सिङदेन क्युइ खोबा म्हि दोसी चितोःला।”
थेनीगदेसे यहोशूदा चुह्रङ् भिसी पाङ्जी, “परमप्रभु ह्राङला परमेश्वरसे थेला गे लबा म्हि मोशादा चु य्हुल्सा पूरन ह्राङनीदा पिन्ना भिसी सुङ्बादेन चु य्हुल्साला जम्मान म्हिगदेदा नाश लउ भिसी कुल्बा ताम ङन्दा था मुबा। थेतबासेलमा ह्राङदेन छ्याम ल्हानान लोङ्बा खबासेलमा ङन्से ङन्ना ज्यान जोगब लबाला लागिरी चुह्रङ् लबा हिन्ना। स्य्हीगो, दाहेन्से ङनी ह्राङलान छ्यारी मुला। थेतबासेलमा ह्राङनीदा तिग ज्यबादेन ठीक छोर्बा मुला, ङन्दा थेह्रङ्नोन लउ।” चुह्रङ् लसी यहोशूसे इस्राएलीगदेग्याम थेनीगदेदा जोगब लजी ओच्छे इस्राएलीगदेसे थेनीगदेगदेदा आसाइनी। थे धिनकुनु यहोशूसे गिबोनीगदेदा जम्मान इस्राएलीगदेला लागिरीदेन परमप्रभुसे धम्बा ग्लारी परमप्रभुला बलि फुल्बा ग्लाला लागिरी सिङदेन क्युइ खोबा म्हि स्होजी। तिनीला धिनधोनान थेनीगदेसे थे गे लबान मुला।
Source notes (2)
- Cross-reference थोन्बा २३:३२; ३४:१२; ठिम ७:२
- Cross-reference झ्याबा २१:२१-३५
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.