Eastern Tamang Language Bible
यहो 11
याबीनदेन अर्गु ग्लेगदे ब्रेबा
चु ताम थेःसी हासोरला ग्ले याबीनसे मादोनना ग्ले योबाब, शिम्रोनना ग्ले, अक्षापला ग्ले, झ्याङ्पट्टिला य्हुल्साला ग्लेगदेदा, ओच्छे किन्नरेतला लोपट्टिला अराबा, ओच्छे मधेसदेन न्हुपपट्टिला डोर ल्हला ग्लेगदेदा, स्यारदेन न्हुप न्हीलोपट्टिन चिबा कनानी, गङ् य्हुल्साला एमोरी, हित्ती, परिज्जीगदे, यबूसीगदे ओच्छे मिस्पा य्हुल्साला हेर्मोन गङ्ला धिरी चिबा हिव्वीगदेदा खउ भिसी समाचार पुइजी। थेनीगदेदेन थेनीगदेला जम्मान सिपाहीगदे, समुद्र कुनीला बालुवा तेनोन तागदेदेन रथगदे ल्हानान खजी। चु जम्मान ग्लेगदे पोप तजी, ओच्छे थेनीगदे खसी इस्राएलीगदेदेन छ्याम लडाइ लबारी मेरोम मिन लबा घ्योइला ङाम्री पाल फ्रेङ्जी।
परमप्रभुसे यहोशूदा चुह्रङ् भिसी सुङ्जी, “थेनीगदेदेन छ्याम आलोङ्गो, तिग्दा भिसम चुनोन धुइरी ङाइ जम्मादान साइसी इस्राएलीगदेला यारी जिम्मा पिन्ना। एसे थेनीगदेला तागदेला घ्रेन नसा थासी पिन्गो, ओच्छे थेनीगदेला रथगदे मेसे ख्राङ्सी पिन्गो।”
जमाहेन्से यहोशू जम्मान म्हिगदेदेन छ्याम मेरोम मिन लबा घ्योइरी खसी तिक्खुरीन थेनीगदेदेन छ्याम लडाइ लजी। ओच्छे परमप्रभुसे थेनीगदेदा इस्राएलीगदेला यारी जिम्मा पिन्जी, ओच्छे इस्राएलीगदेसे थेनीगदेदा ब्रेना लजी, ओच्छे थेनीगदेदा घ्रेन सीदोनदेन मिस्रपोत-मैमधोनान, ओच्छे स्यारपट्टि मिस्पाला चेधोना ताप्जी, ओच्छे गिकनोन छोन्बो आथान्ना थेनीगदेदा इस्राएलीगदेसे साइजी। यहोशूसे थेनीगदेदा परमप्रभुसे कुल्बा अन्छार लजी। ओच्छे थेसे थेनीगदेला तागदेला घ्रेन नसा थाजी, ओच्छे थेनीगदेला रथगदे मेसे ख्राङ्सी पिन्जी।
थे धुइरी दोःसी निसी यहोशूसे हासोरदा ह्राङला यारी किन्जी, ओच्छे थेला ग्लेदा तरवारसे ताम्जी, तिग्दा भिसम हासोर चा ङाच्छा थे जम्मान य्हुल्साला मूल ग्ला मुबा। ओच्छे थेरी मुबा जम्मादान तरवारसे ताम्सी साइजी। थेनीगदेसे थे य्हुल्साला सा मुबा जत्ति गिकदान आख्लाना पूरन नाश लजी। ओच्छे थेसे हासोररी मे लगब लसी पिन्जी।
यहोशूसे थे जम्मान सहरगदेदेन थेला ग्लेगदेदा ह्राङला यारी किन्जी, ओच्छे परमप्रभुला गे लबा म्हि मोशासे कुल्बा अन्छार जम्मादान तरवारसे ताम्सी नाश लजी। तर यहोशूसे मे लगब लबा हासोर बाहेक गङ्गदेरी मुबा अर्गु खजिबै सहररी इस्राएलीगदेसे मे लगब आलनी। चु सहरगदेला जम्मान म्हेमुइगदे ओच्छे धन सम्पत्ति चा इस्राएलीगदेसे ह्राङला लागिरी किन्जी। तर म्हिगदे जम्मादान तरवारसे ताम्सी नाश लजी, सा बुन्बा खजिबै स्हेदा बाँकी आथान्नी। खाह्रङ् लसी परमप्रभुसे ह्राङला गे लबा म्हि मोशादा कुल्बा मुबा, थेह्रङ् लसीन मोशासे यहोशूदा कुल्बा मुबा, ओच्छे यहोशूसे जम्मान ताम ङ्यन्जी। परमप्रभुसे मोशादा कुल्बा जम्मान तामगदे न्हङ्ला ताम गिकनोन आख्लाना यहोशूसे जम्मान ताम पूरा लजी।
यहोशूसे ह्राङला यारी किन्बा य्हुल्सा
चुह्रङ् लसी यहोशूसे थे जम्मान स, अथवा गङ्पट्टिला ग्ला, लोपट्टिला नेगेव भिबा ग्ला, ओच्छे गोशेनना पूरन य्हुल्सा, मधेस, अराबा, इस्राएलला गङ्पट्टिला य्हुल्सादेन थेनोन ग्लाला मधेस, सेइरला खानरी मुबा हालाक मिन लबा गङ्हेन्से हेर्मोन गङ्ला धिरी मुबा लेबनानना ब्याँसीरी मुबा बाल-गादधोनान ढासी ह्राङला यारी किन्जी, ओच्छे थेला जम्मान ग्लेगदेदा चुङ्सी साइजी। थे जम्मान ग्लेगदेदेन छ्याम यहोशूसे ल्हानान धिनधोना लडाइ लजी। इस्राएलीगदेदेन छ्याम ढिक्बा गिबोनना हिव्वीगदे बाहेक स्य्हान्दो खजिबै सहर इस्राएलीगदेदेन छ्याम आढिक्नी, थेनीगदेसे लडाइ लसी जम्मान सहर ह्राङला यारी किन्जी। थेनीगदे जम्मान इस्राएलीगदेला बिरोध लसी लडाइ लबारी खगै ओच्छे दया आलनान थेनीगदे जम्मानदान नाश लगै भिसी परमप्रभुसे म्हन्बा मुबा, परमप्रभुसेनोन मोशादा चुनोन ताम कुल्बा मुबा।1
थे धुइरी यहोशू गङ्पट्टिला य्हुल्सारी खसी हेब्रोन, दबीर, अनाब, ओच्छे यहूदादेन इस्राएलला जम्मान गङ्पट्टिला य्हुल्सारी चिबा अनाकीगदेदा पूरन नाश लजी। यहोशूसे थेनीगदेला सहरगदेदेन छ्यामनोन थेनीगदेदा पूरन नाश लजी। इस्राएलीगदेला य्हुल्सारी अनाकीगदे गिकनोन बाँकी आतनी, गाजा, गातदेन अश्दोदरी जे थेनीगदेला म्हि उदि उदि मुबा। चुह्रङ् लसी परमप्रभुसे मोशादा सुङ्बा अन्छारनोन यहोशूसे जम्मान य्हुल्सादा ढासी ह्राङला यारी किन्जी, ओच्छे थेनीगदेला वंश वंश अन्छार भो लसी थे य्हुल्साथोरी शासन लबाला लागिरी इस्राएलीगदेदा भो लसी पिन्जी। जमाहेन्से य्हुल्सारी लडाइ तबा ख्लाजी।
Source notes (1)
- Cross-reference ठिम ७:१६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.