Eastern Tamang Language Bible
२ ग्ले 9
येहूदा इस्राएलला ग्ले स्होबा
एलीशा अगमवक्तासे अगमवक्तागदेला समूह न्हङ्ग्याम गिकदा ङ्योइसी थेदा चुह्रङ् भिसी पाङ्जी, “क्रेप्सारी के खीगो, ओच्छे चु छ्युगुला थोङ भोर्सी ए रामोत-गिलादरी निउ। थेरी दोमाहेन्से एसे निम्शीला छाया, यहोशापातला झा येहूदा म्हाइगो। थेदा स्याप्माहेन्से एसे थेदा थेला ह्रोगदेग्याम फेसी थेदा जे जम्मान भन्दा न्हङ्पट्टिला कोठारी भोर्गो। जमाहेन्से चु थोङला छ्युगु येहूला थोबोरी युसी चुह्रङ् भिसी पाङ्गो, ‘परमप्रभुसे चुह्रङ् भिसी सुङ्बा मुला, ङाइ एदा इस्राएलला ग्ले स्होबारी धम्बा मुला।’ जमाहेन्से ए तुरून्तन थे ग्लाग्याम थोन्सी य्हार्गो।”
थेतबासेलमा थे भ्योन अगमवक्ता रामोत-गिलादरी निजी। रामोत-गिलादरी दोमा थे अगमवक्तासे सिपाहीगदेला हाकिमगदेदा ग्ला गिकरी ह्रुप तसी चिबा स्याप्जी। जमाहेन्से थेसे थेनीगदेदा “सिपाहीगदेला हाकिम, ह्राङदेन छ्याम ताम गिक लतोःबा मुला” भिसी पाङ्जी।
येहूसे थे अगमवक्तादा, “ङनीगदे न्हङ्ला खालदेन छ्याम ताम लतोःबा हिन्ना?” भिसी ङ्योइजी।
जमाहेन्से थे अगमवक्तासे “ह्राङदेन छ्याम हिन्ना” भिसी पाङ्जी।
जमाहेन्से येहू रेःसी दिम न्हङ्री निजी। ओच्छे थे अगमवक्तासे येहूला थोबोरी छ्युगु युबान चुह्रङ् भिसी पाङ्जी, “परमप्रभु इस्राएलला परमेश्वरसे चुह्रङ् भिसी सुङ्बा मुला, ‘ङाइ एदा परमप्रभुला म्हि इस्राएलीगदेला ग्ले स्होबारी धम्बा मुला।1 एसे एला मालिक आहाबला वंशदा नाश लतोःला, ओच्छे ईजेबेलसे ङाला अगमवक्तागदेदेन ङाला गे लबा म्हिगदेदा साइबासेलमा ङाइ थेदा सजाय पिन्सी नाङ फाला। आहाबला सन्तानगदे जम्मान नाश तला। घ्याबा हिन्सै घ्याबा आहिन्सै इस्राएलरी थेला म्हेमे न्हङ्ला जम्मान ह्रेम्फेबेगदे नाश तला। ङाइ नबातला झा यारोबामदेन अहियाहला झा बाशाला सन्तानदा खाह्रङ् लबा मुबा आहाबला सन्तानदाएनोन थेह्रङ्नोन लला। ओच्छे ईजेबेलला लाशदा चा खालैसेन आल्हु। तर थेला लाशदा यिजरेललान ग्ला गिकरी नगीगदेसे छ्याकछिक लसी चला।’” चु ताम पाङ्माहेन्से म्राप ठोङ्सी थे अगमवक्ता थे ग्लाग्याम य्हार्जी।2
जमाहेन्से यहू मङ्ग्यार सिपाहीगदेला हाकिमगदे ह्राङला ह्रोगदे मुबा ग्लारी खजी। ओच्छे थेनीगदे न्हङ्ला गिकसे येहूदा चुह्रङ् भिसी ङ्योइजी, “जम्मान ताम ठीक मुला? ए मुबा ग्लारी थे म्योबा म्हि तिग्दा खजिम?”
जमाहेन्से येहूसे थेदा चुह्रङ् भिसी जोहाब पिन्जी, “थे म्हिदा एनीगदेसेनोन ङोसेमुला, ओच्छे थे म्हिसे तिग पाङ्मुला भिबा ताम एनीगदेदा थानोन मुला।”
थेनीगदेसे येहूदा “थे ताम सत्य आहिन, ङन्दा सत्य ताम पाङ्गो” भिसी पाङ्जी।
जमाहेन्से येहूसे थेनीगदेदा चुह्रङ् भिसी पाङ्जी, “थेसे ङादा पाङ्बा ताम चुनोन हिन्ना, ‘परमप्रभुसे चुह्रङ् भिसी सुङ्बा मुला, ङाइ इस्राएलीगदेला ग्ले स्होबाला लागिरी एदा धम्बा मुला।’”
जमाहेन्से थेनीगदेसे येहू भ्रबाला लागिरी चामला लीरी ह्राङ ह्राङला क्वान स्युसी तुरून्तन तीजी। जमाहेन्से थेनीगदेसे बिगुल ह्राप्बान घ्रेन काइ तेःसी “येहू ग्ले हिन्ना” भिसी पाङ्जी।
इस्राएलला ग्ले योरामदा साइबा
जमाहेन्से निम्शीला छाया, यहोशापातला झा येहूसे योराम ग्लेला बिरोध लसी जाल लबारी छ्याइजी। चु धुइरी योराम ग्लेदेन जम्मान इस्राएलीगदेसे अरामला ग्ले हजाएलदेन छ्याम लडाइ लसी रामोत-गिलाददा जोगब लसी थान्बा मुबा। तर अरामला ग्ले हजाएलदेन छ्याम लडाइ लमा योराम ग्लेदा चोट तबा मुबा। थे चोटग्याम फान्बाला लागिरी योराम ग्ले यिजरेलरी निसी चिबा मुबा। येहूसे सिपाहीगदेला हाकिम ह्राङला ह्रोगदेदा चुह्रङ् भिसी पाङ्जी, “चुदे एनीगदेसे ङा ग्ले दोगै भिसी म्हन्बा मुसम चु सहरग्याम चु समाचार भोर्सी खालैनोन यिजरेलरी निआम्याङ्गै।” जमाहेन्से येहू ह्राङला रथरी क्रेसी यिजरेलरी निजी। तिग्दा भिसम योराम ग्ले फान्बाला लागिरी थेरीन आराम लसी चिबा मुबा। ओच्छे यहूदाला ग्ले अहज्याहएनोन योरामदा च्याबारी थेरी खबा मुबा।
यिजरेलला धरहरारी राप्सी चिबा पालेसे येहू ह्राङला सिपाहीगदेदेन छ्याम खबान लबा म्राङ्जी। जमाहेन्से थे पालेसे घ्रेन काइ तेःसी “ङाइ हुल गिक म्हि खबान लबा म्राङ्बान मुला” भिसी पाङ्जी।
ओच्छे योराम ग्लेसे थे पालेदा चुह्रङ् भिसी कुल्जी, “ह्राङनी ज्यबा सेम थोसी फेप्खबा हिन्ना कि आहिन भिसी ङ्योइबाला लागिरी तारी क्रेबा सिपाही गिकदा थेनीगदे मुबा ग्लारी पुइगो।”
थे तारी क्रेसी निबा सिपाही येहूदा ह्रुप तबारी निजी, ओच्छे थेसे येहूदा चुह्रङ् भिसी पाङ्जी, “ग्लेसे ह्राङ ज्यबा सेमसे फेप्खबा हिन्ना कि आहिन भिसी सुङ्बा मुला।”
जमाहेन्से येहूसे थे सिपाहीदा “ज्यबा सेमसे खसै आखसै एदा तिग मतलब? ए ङाला लिच्छा लिच्छा खउ” भिसी जोहाब पिन्जी।
थे धरहरारी चिबा पालेसे ग्लेदा चुह्रङ् भिसी पाङ्जी, “समाचार भोर्बा थे म्हिसे थेनीगदेदा स्याप्बा मि स्याप्जी, तर थे दोःसी चा आखनी।”
जमाहेन्से ग्लेसे तारी क्रेबा अर्गु सिपाही गिकदा दोःसी पुइजी। थेनीगदे मुबा ग्लारी दोमाहेन्से थे सिपाहीसे थेनीगदेदा चुह्रङ् भिसी पाङ्जी, “ग्लेसे ह्राङ ज्यबा सेमसे फेप्खबा हिन्ना कि आहिन भिसी सुङ्बा मुला।”
जमाहेन्से येहूसे थे सिपाहीदा “ज्यबा सेमसे खसै आखसै एदा तिग मतलब? ए ङाला लिच्छा लिच्छा खउ” भिसी जोहाब पिन्जी।
जमाहेन्से धरहरारी चिबा पालेसे ग्लेदा दोःसी चुह्रङ् भिसी पाङ्जी, “थे तारी क्रेसी निबा सिपाहीसे थेनीगदेदा स्याप्बा मि स्याप्जी, तर थेएनोन दोःसी आखनी। थे रथ थोबा म्हि मि निम्शीला झा येहू ह्रङ्बान मुला। थेसे मि म्योबासे ह्रङ् लसीन रथ थोमुला।”
जमाहेन्से योराम ग्लेसे “ङाला रथ ठीक लउ” भिसी पाङ्जी। रथ ठीक लसी जिन्माहेन्से इस्राएलला ग्ले योरामदेन यहूदाला ग्ले अहज्याह ह्राङ ह्राङला रथरी चिसी येहूदा ह्रुप तबारी निजी। योराम ग्लेदेन अहज्याह ग्लेसे थेदा यिजरेलरी चिबा नाबोतला भुरीन स्याप्जी। येहूदा म्राङ्माहेन्से योराम ग्लेसे थेदा चुह्रङ् भिसी ङ्योइजी, “येहू, ए ज्यबा सेम थोसी खबा हिन्ना कि आहिन?”
जमाहेन्से येहूसे योराम ग्लेदा चुह्रङ् भिसी जोहाब पिन्जी, “एला आमा ईजेबेलसे जम्मान खाल्ला मूर्तिदा पूजा लबादेन जम्मान खाल्ला मन्त्रतन्त्र लबा तामगदे य्हाङला गुङ्री मुनोन मुला भिसम तिग्ला ज्यबा सेम?”
ह्राङला रथ फ्लिक दोःसी योराम ग्लेसे अहज्याह ग्लेदा “अहज्याह, चु मि य्हाङला बिरोधरी रेःजीम” भिसी थेग्याम य्हार्जी। जमाहेन्से येहूसे ह्राङला मुदेबा भङसे म्यादली तन्गब लसी योराम ग्लेदा रोब्जी। थे म्यासे योरामला तिङ्नोन फ्लोक चाल्जी। ओच्छे थे ह्राङलान रथरी ह्रिल्जी। येहूसे सिपाहीगदेला हाकिम ह्राङला रथ चलब लबा बिदकारदा चुह्रङ् भिसी पाङ्जी, “थेदा यिजरेली नाबोतला भुरी भोर्सी भ्याङ्गो। एदेन ङा थेला आबा आहाबदेन छ्याम छ्यामनोन रथरी निमा थेला बारेरी परमप्रभुसे चुह्रङ् भिसी सुङ्बा ताम एदा थानोन मुदला, ‘तिला नाबोतदेन थेला झागदेदा साइबा ङाइ म्राङ्बा मुला। ङाइ एदा चुनोन भुरी सजाय पिन्नोन पिन्ना’ भिसी परमप्रभुसे सुङ्बा मुला। थेतबासेलमा परमप्रभुसे सुङ्बा अन्छार थेदा थेनोन भुरी भोर्सी भ्याङ्गो।”3
यहूदाला ग्ले अहज्याहदा साइबा
चु ताम म्राङ्माहेन्से यहूदाला ग्ले अहज्याहएनोन बेथ-हागानपट्टि निबा ग्यामनोन ग्याम य्हार्जी। थेदा म्राङ्सी येहूसे घ्रेन काइ तेःसी “थेदाएनोन साइगो” भिसी ह्राङला म्हिगदेदा पाङ्जी। अहज्याह यिबलाम सहरला ङाम्री मुबा गूर भिबा ग्लाला खान्री तोर रथरी य्हार्सी निबान लबा धुइरी थेनीगदेसे अहज्याहदा चोटनोन चोट तना लजी। तर थे य्हार्सी मगिद्दो सहररी निजी, ओच्छे थे थेरीन सिजी। जमाहेन्से अहज्याह ग्लेला सिपाहीगदेला हाकिमगदेसे अहज्याह ग्लेला लाश रथरी थान्सी यरूशलेमरी भोर्जी, ओच्छे दाऊदला सहररी ग्लेगदेदा ल्हुबारी स्होबा धुर्सारी थेदाएनोन ल्हुजी। आहाबला झा योरामसे इस्राएलरी शासन लसी च्युक गिक दिङ् तमा अहज्याह यहूदाला ग्ले दोबा मुबा।
ईजेबेल ग्लेस्यादा साइबा
जमाहेन्से येहू यिजरेलरी दोखजी। थे धुइरी तिग तिग तबा मुबा थे जम्मान ताम ईजेबेल ग्लेस्यासे थेःसी जिन्बा मुबा। जमाहेन्से ग्लेस्यासे ह्राङला मीरी गाजल फोर्सी क्रा ख्रेसी झ्यालग्याम मङ्ग्यार च्याजी। येहू ग्लेखाङ्ला मूल म्रापग्याम न्हङ्री वाङ्बान लमा ईजेबेलसे घ्रेन काइ तेःसी “ओ ह्राङलान ग्लेदा साइबा म्हि जिम्री, ए चुरी तिग्दा खबा?” भिसी ङ्योइजी।
जमाहेन्से येहूसे तोर झ्यालपट्टि च्याबान घ्रेन काइ तेःसी “ङादेन छ्याम ढिक्बा खला मुला? थेरी खला मुला?” भिसी पाङ्जी। जमाहेन्से ग्लेखाङ्ला झ्यालग्याम गोर न्ही सोम नपुंसकसे येहूदा च्याजी। येहूसे थे नपुंसकगदेदा “थेदा मार भ्याङ्गो” भिसी पाङ्जी। जमाहेन्से थेनीगदेसे ईजेबेल ग्लेस्यादा झ्यालग्याम मार भ्याङ्जी, ओच्छे थेला का भित्ता नाङ्नोन छ्योङ्जी। ओच्छे थेदा नाङ्बाझ्याक्बा लबा तागदेला काङ नाङ्नोन का तजी। जमाहेन्से येहू ग्लेखाङ् न्हङ्री वाङ्सी चबा थुङ्बा लजी, ओच्छे येहूसे चुह्रङ् भिसी पाङ्जी, “सराप याङ्बा थे म्रिङ्म्हेमेदा भोर्सी ज्यना लसी ल्हुगो। तिग्दा भिसम थे ग्लेला झामे हिन्ना।” तर थेदा ल्हुबारी मार निबा म्हिगदेसे थेरी थेला खप्परदेन या काङला नख्रु बाहेक अर्गु तिगैनोन आस्याप्नी। जमाहेन्से थे म्हिगदे खसी येहूदा जम्मान ताम पाङ्जी। ओच्छे येहूसे थेनीगदेदा चुह्रङ् भिसी पाङ्जी, “परमप्रभुसे तिश्बीरी चिबा ह्राङला गे लबा म्हि एलियादा चुह्रङ् भिसी सुङ्बा मुबा, ‘यिजरेलला थे ग्लारी नगीगदेसे ईजेबेलला स्या चला।4 थेला लाश यिजरेलला थे ग्लारी सार ह्रङ्नोन छरपष्ट तला, ओच्छे थेदा ईजेबेल भिसी खालैसेन ङोआसे।’”
Source notes (4)
- Cross-reference १ ग्ले १९:१६
- Cross-reference १ ग्ले २१:२३
- Cross-reference १ ग्ले २१:१९
- Cross-reference १ ग्ले २१:२३
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.