Eastern Tamang Language Bible
२ ग्ले 8
शूनम्मी म्रिङ्म्हेमे दोःसी ह्राङला य्हुल्सारी खबा
एलीशासे जुन म्रिङ्म्हेमेला झादा सोना लबा मुबा। थे म्रिङ्म्हेमेदा एलीशासे चुह्रङ् भिसी पाङ्बा मुबा, “उदि दिङ्ला लागिरी एला म्हेमेगदे पूरन चुग्याम निसी खजिबै ग्ला गिकरी चिउ। तिग्दा भिसम चु य्हुल्सारी निस दिङ्धोना अनिकाल तला भिसी परमप्रभुसे सुङ्बा मुला।”1 एलीशासे पाङ्बा ह्रङ्नोन थे म्रिङ्म्हेमे ह्राङला पूरन म्हेमेदा भोर्सी पलिश्तीगदेला य्हुल्सारी निजी, ओच्छे निस दिङ्धोना थेरीन चिजी।
निस दिङ् तमाहेन्से थे म्रिङ्म्हेमे पलिश्तीगदेला य्हुल्साग्याम दोःसी ह्राङला इस्राएल य्हुल्सारी खजी। ओच्छे थेसे ह्राङला दिम व्हारा दोःसी पिन्गो भिसी ग्ले मुबा ग्लारी बिन्ती लजी। ग्ले चा थे धुइरी एलीशाला नोकर गेहजीदेन छ्याम “एलीशासे लबा जम्मान उदेकला गेगदेला बारेरी ङादा पाङ्गो” भिसी ताम लबान मुबा। एलीशासे सिबा म्हिदा खाह्रङ् लसी दोःसी सोना लजी भिसी गेहजीसे ग्लेदा पाङ्बान मुबा, थेनोन धुइरी एलीशासे सिबाग्याम सोना लबा कोलाला आमा ह्राङला दिम व्हाराला लागिरी ग्लेदेन छ्याम बिन्ती लबारी थेरी दोखजी। जमाहेन्से गेहजीसे चुह्रङ् भिसी पाङ्जी, “ङाला ग्ले, थे म्रिङ्म्हेमे चुनोन हिन्ना, ओच्छे एलीशासे सिबाग्याम सोना लबा थेला झाएनोन चुनोन हिन्ना।” थे तामला बारेरी ग्लेसे थे म्रिङ्म्हेमेदा ङ्योइमा थे म्रिङ्म्हेमेसेनोन ग्लेदा जम्मान ताम पाङ्जी। जमाहेन्से ग्लेसे थे म्रिङ्म्हेमेला मुद्दा हाकिम गिकदा जिम्मा पिन्बान चुह्रङ् भिसी पाङ्जी, “थेला भु व्हारा जम्मान दोःसी पिन्गो, ओच्छे चु य्हुल्सा ख्लाबा धुइहेन्से दन्देधोना थेला भु व्हारारी रोबा जम्मान स्हेगदेएनोन दोःसी पिन्गो।”
हजाएलसे बेन-हदद ग्लेदा साइबा
अरामला ग्ले बेन-हदद स्हु खसी चिबा धुइरी एलीशाएनोन दमस्कसरी दोजी। जमाहेन्से “एलीशा चुरी खबा मुला” भिसी ग्लेदा पाङ्जी। जमाहेन्से ग्लेसे हजाएलदा चुह्रङ् भिसी पाङ्जी, “उपहार भोर्सी एलीशादा ह्रुप तबारी निउ। ओच्छे चु रोगग्याम ङा फान्ना कि आफान भिसी परमप्रभुदेन छ्याम ङ्योइगो भिसी थेदा पाङ्गो।”
जमाहेन्से उपहार पिन्बाला लागिरी हजाएलसे दमस्कसला जम्मान भन्दा ज्यबा ज्यबा स्हेगदे बोगल न्ही ऊँटदा काप्सी एलीशा मुबा ग्लारी निजी। ओच्छे एलीशादा ह्रुप तसी चुह्रङ् भिसी पाङ्जी, “अरामला ग्ले बेन-हददसे ह्राङ फान्ना कि आफान भिसी ङ्योइबारी ङादा चुरी पुइखबा हिन्ना।”
एलीशासे हजाएलदा चुह्रङ् भिसी जोहाब पिन्जी, “निसी ग्लेदा, ‘ह्राङ पक्कन फान्ना’ भिसी पाङ्गो। तर पाङ्नोन तोःमा थे सिला। चु ताम ङादा परमप्रभुसे उन्बा मुला।” एलीशासे हजाएलदा च्याबाला च्याबान लबासेलमा हजाएलदा पेःबा खजी। जमाहेन्से एलीशा क्राजी।
हजाएलसे एलीशादा, “ङाला मालिक, ह्राङ तिग्दा क्राबा?” भिसी ङ्योइजी।
जमाहेन्से एलीशासे चुह्रङ् भिसी जोहाब पिन्जी, “तिग्दा भिसम एसे इस्राएलला म्हिगदेला बिरोध लसी ल्हानान आज्यबा गे लला भिबा ताम ङादा था मुला। एसे थेनीगदेला भ्योन म्हिगदेदा तरवारसे ताम्सी साइला, ओच्छे थेनीगदेला जजाबा कोलागदेदा सरी भ्यासी साइला, ओच्छे एसे जीउ न्हीला म्रिङ्म्हेमेगदेदा फो क्लेसी साइला।”
हजाएलसे “ङा नगी ह्रङ्बा म्हि गिकसे चुह्रङ्बा घ्रेन गे खाह्रङ् लसी लखम्ला?”2 भिसी ङ्योइजी।
जमाहेन्से एलीशासे “ए अराम य्हुल्साला ग्ले दोला भिसी ङादा परमप्रभुसे उन्बा मुला” भिसी जोहाब पिन्जी।
जमाहेन्से हजाएल एलीशादेन छ्याम बिदा किन्सी ह्राङला ग्ले मुबा ग्लारी दोसी निजी। हजाएल दोखमाहेन्से बेन-हदद ग्लेसे “एदा एलीशासे तिग पाङ्जी?” भिसी ङ्योइजी।
हजाएलसे बेन-हदद ग्लेदा “ह्राङ पक्कन खम्ला” भिसी पाङ्बा मुला। तर हजाएलसे न्हङ्गरदाङ कम्बल गिक क्युइरी ब्लुम्जी। ओच्छे थे कम्बलसे ग्लेला सुङ् घप्सी ग्लेदा साइजी। जमाहेन्से हजाएल ग्ले दोजी।
यहोराम यहूदाला ग्ले दोःबा
२ काइ २१:१-२०
इस्राएलला ग्ले आहाबला झा योरामसे शासन लबा ङ्हा दिङ् तमा यहोशापातला झा यहोराम यहूदाला ग्ले दोजी। ग्ले दोमा यहोराम बोगल गिकसे च्युक न्ही दिङ् तबा मुबा। थेसे भ्रे दिङ्धोना यरूशलेमरी शासन लजी। आहाब ग्लेला सन्तान ह्रङ् लसी थेएनोन इस्राएलला ग्लेला सिउरी भ्रजी। तिग्दा भिसम थेसे आहाबला झामेदेन छ्याम ब्याह लबा मुबा। थेसे परमप्रभुला ओन्छाङ्री जुन ताम आज्यबा मुबा थेनोन ताम लजी। तसैनोन परमप्रभुसे ह्राङला गे लबा म्हि दाऊदला लागिरी यहूदादा नाश लबा सेम आलनी। तिग्दा भिसम दाऊद ग्लेदेन थेला झागदेदा सदन य्हाल पिन्बा नाङ्सल गिक पिन्ना भिसी परमप्रभुसे कबुल लबा मुबा।3
यहोरामसे शासन लबा धुइरी एदोमला म्हिगदे यहूदाला बिरोधरी रेःजी। ओच्छे थेनीगदेसे ह्राङला लागिरी अर्गुन ग्ले स्होजी।4 थेतबासेलमा यहोराम ह्राङदेन छ्याम मुबा जम्मान रथगदे भोर्सी जाईररी निजी। जाईररी दोमा यहोरामदेन रथरी मुबा थेला सिपाहीगदेला हाकिमगदेदा एदोमला म्हिगदेसे क्युर्सीन खसी गुङ्री झाङ्जी। तर ग्लेदेन सिपाहीगदेला हाकिमगदे थे ग्लाग्याम म्हुनङ्नोन य्हार्सी निजी। ओच्छे थेला सिपाहीगदे चा छरपष्ट तसी ह्राङ ह्राङला दिमरी निजी। थेकुनुहेन्से दन्देधोनान एदोमीगदे यहूदाग्याम फेसी चिबा मुला। थेनोन धुइरी लिब्ना सहरला म्हिगदेएनोन यहूदाला बिरोधरी रेःजी। यहोरामसे शासन लबा धुइरी तबा अर्गु तामगदेदेन थेसे लबा जम्मान गेगदे यहूदाला ग्लेगदेला बारेरी काइरन भ्रिबा किताबरी भ्रिबा मुला। यहोराम ग्ले सिजी, ओच्छे थेदा दाऊदला सहररी ल्हुजी। जमाहेन्से थेला साटोरी थेलान झा अहज्याह ग्ले दोजी।
अहज्याह यहूदाला ग्ले दोबा
२ काइ २२:१-६
इस्राएलला ग्ले आहाबला झा योरामसे शासन लसी च्युक न्ही दिङ् तमा यहोरामला झा अहज्याह यहूदाला ग्ले दोजी। अहज्याह ग्ले दोमा बोगल गिकसे न्ही दिङ् तबा मुबा, थेसे यरूशलेमरी तिदिङ् जे शासन लजी। थेला आमाला मिन चा अतल्याह मुबा। अतल्याह चा इस्राएलला ग्ले ओम्रीला छायास्या मुबा। आहाबला वंशला म्रिङ्म्हेमेदेन छ्याम ब्याह तबासेलमा अहज्याह ग्लेएनोन आहाबला सन्तानना सिउरी भ्रजी, ओच्छे आहाबला सन्तानसे ह्रङ्नोन थेसेनोन जुन ताम परमप्रभुला ओन्छाङ्री आज्यबा मुबा थेनोन लजी।
रामोत-गिलादरी अराम य्हुल्साला ग्ले हजाएलदेन छ्याम लडाइ लबाला लागिरी अहज्याहएनोन आहाबला झा योरामदेन छ्यामनोन निजी। तर अरामी सिपाहीगदेसे योरामदा चोटनोन चोट तना लजी। रामोत-गिलादरी अराम य्हुल्साला ग्ले हजाएलदेन छ्याम लडाइ लमा चोट तबासेलमा फान्बाला लागिरी योराम ग्ले यिजरेलरी दोःसी निजी। जमाहेन्से आहाबला झा योराम ग्लेदा च्याबारी भिसी यहूदाला ग्ले यहोरामला झा अहज्याह यिजरेलरी निजी। तिग्दा भिसम योराम ग्लेदा चोटनोन चोट तबा मुबा।
Source notes (4)
- Cross-reference २ ग्ले ४:८-३७
- Cross-reference १ ग्ले १९:१५
- Cross-reference १ ग्ले ११:३६
- Cross-reference ठुङ् २७:४०
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.