Eastern Tamang Language Bible
२ ग्ले 10
आहाब सन्तानदा साइबा
आहाब बोगल सोमसे च्युइ झागदे सामरिया सहररी चिमुबा। थेतबासेलमा येहूसे यिजरेल य्हुल्साला मूल म्हिगदेदेन गन्बागदे ओच्छे आहाबला सन्तानना सयार लबा म्हिगदेदा चुह्रङ्बा चिठी भ्रिसी सामरिया सहररी पुइजी। ओच्छे येहूसे थेनीगदेदा चुह्रङ् भिसी पाङ्जी, “एनीगदेला ग्लेला झागदे एनीगदेदेन छ्यामनोन मुला, ओच्छे एनीगदेदेन छ्याम रथगदे, तागदे, हतियारगदेदेन जोगब तबाला लागिरी क्युर्सीन पर्खाल लबा सहर मुला। थेतबासेलमा चु चिठी याङ्मै छ्याम एनीगदेसे ह्राङला ग्लेला झागदे न्हङ्री खाल जम्मान भन्दा ज्यबादेन ग्ले दोखम्बा म्हि मुला थेदान धम्सी थेला आबाला साटोरी ग्ले स्होउ। जमाहेन्से एनीगदेसे ह्राङला ग्लेला वंश जोगब लबाला लागिरी लडाइ लउ।”
तर चु ताम थेःसी थेनीगदे ल्हानान लोङ्जी, ओच्छे थेनीगदेसे चुह्रङ् भिसी पाङ्जी, “ग्ले न्ही ढिक्सी मि येहूदेन छ्याम लडाइ लबारी आखम्नी भिसम ङन्से खाह्रङ् लसी थेदेन छ्याम लडाइ लबारी खम्ला?” थेतबासेलमा ग्लेखाङ्ला मूल म्हिगदे, सहरला हाकिमगदे, गन्बागदेदेन ग्लेला सन्तानदा सयार लबा म्हिगदे जम्मान ढिक्सी चुह्रङ्बा ताम भ्रिसी येहू मुबा ग्लारी पुइजी, “ङनी ह्राङला गे लबा म्हिगदे हिन्ना। ङनीथोरी ह्राङदा तिग लबा सेम मुला थेनोन लउ। ङन्से खालैदान ग्ले आस्हो, ओच्छे ह्राङदा खजिबा ताम ठीक छोर्बा थेनोन ताम लउ।”
जमाहेन्से येहूसे थेनीगदेदा चुह्रङ् भिसी दोःसी अर्गु चिठी भ्रिसी पुइजी, “चुदे एनीगदे ङादेन छ्याम ढिक्सी ङाइ कुल्बा ताम ङ्यन्बा हिन्सम एनीगदेसे ह्राङला ग्लेला झागदेला थोबो थासी न्हाङ्गर चुनोन धुइरी यिजरेलरी भसी खउ।”
थे धुइरी आहाब ग्लेला बोगल सोमसे च्युइ झागदे चा थेनीगदेदा सयार लबा सहरला घ्रेन घ्रेन म्हिगदेदेन छ्याम मुबा। येहूला चिठी याङ्माहेन्से थेनीगदेसे आहाब ग्लेला बोगल सोमसे च्युइ झागदेदा साइजी। ओच्छे थेनीगदेसे आहाब ग्लेला बोगल सोमसे च्युइ झागदेला थोबो डालोरी युसी यिजरेलरी येहू मुबा ग्लारी पुइजी। समाचार भोर्बा म्हि खसी येहूदा “थेनीगदेसे आहाब ग्लेला झागदेला थोबोगदे भसी खबा मुला” भिसी पाङ्जी। जमाहेन्से येहूसे थेदा चुह्रङ् भिसी कुल्जी, “थेनीगदेला थोबो उम न्ही स्होसी स्य्होधोनान सहरला मूल म्रापला ङाच्छापट्टि थान्गो।” न्हङ्गरदाङ स्य्होरी मङ्ग्यार मूल म्रापरी निसी जम्मान म्हिगदेला ङाच्छापट्टि राप्सी येहूसे चुह्रङ् भिसी पाङ्जी, “एनीगदेला तिगैनोन दोष आरे। ह्राङलान ग्लेला बिरोधरी जाल लसी ग्लेदा साइबा म्हि चा ङानोन हिन्ना। तर चुगदेदा चा खाल्से साइजी? थेतबासेलमा चु ताम जम्मासेन घोसी थान्गो। तिग्दा भिसम आहाब ग्लेला वंशला बारेरी परमप्रभुसे सुङ्बा जम्मान बचन पूरा तनोन तला। चु चा परमप्रभुसे ह्राङला गे लबा म्हि एलियाग्याम सुङ्बा बचन पूरा लबा हिन्ना।” जमाहेन्से येहूसे यिजरेलरी चिबा आहाबला अर्गु सन्तानगदेदाएनोन साइजी, ओच्छे थेला वंशला मूल म्हिगदेदेन थेला ह्रोगदे ओच्छे पूजाहारीगदे खालैदान आख्लाना जम्मादान साइजी।1
अहज्याह ग्लेला म्हिगदेदाएनोन साइबा
जमाहेन्से येहू सामरिया सहरपट्टि निजी। ग्यामरी निबानलमा थेसे बेथ-एकेदरी2 यहूदाला ग्ले अहज्याहला कोइ कोइ म्हिगदेदा स्याप्जी, ओच्छे येहूसे थेनीगदेदा “एनीगदे खाला हिन्ना?” भिसी ङ्योइजी।
थेनीगदेसे येहूदा चुह्रङ् भिसी जोहाब पिन्जी, “ङनी अहज्याह ग्लेला ङाम्लान म्हिगदे हिन्ना, ङनी अहज्याह ग्लेला म्हेमेगदेदेन ईजेबेल ग्लेस्याला म्हेमेगदेदा ह्रुप तबारी खबा हिन्ना।”
येहूसे “थेनीगदेदा छोन्बोन चुङ्गो” भिसी ह्राङला सिपाहीगदेदा कुल्जी। थेनीगदेसे थे म्हिगदेदा चुङ्सी बेथ-एकेदरी साइजी। थेनीगदेसे बोगल न्हीसे गोर न्ही ह्रेम्फेबेदा चुङ्बा मुबा। येहूसे थेनीगदे न्हङ्ला गिकदाएनोन आख्लाना जम्मादान साइजी।
आहाब ग्लेला म्हिगदेदा साइबा
जमाहेन्से येहू थे ग्लाग्याम निजी, निबान लबा धुइरी ग्यामरी थेसे रेकाबला झा योनादाबदा स्याप्जी। येहूसे थेदा फ्याफुल्बान चुह्रङ् भिसी पाङ्जी, “ङा एदेन छ्याम ढिक्बारी म्हाइबा ह्रङ्नोन एदाएनोन ङादेन छ्याम ढिक्बा सेम मुला?”
जमाहेन्से योनादाबसेनोन “ङादाएनोन ढिक्बा सेम मुला” भिसी पाङ्जी।
जमाहेन्से येहूसे थेदा “थेह्रङ् भिसम या भउ” भिसी पाङ्जी। योनादाबसेनोन ह्राङला या पिन्जी, ओच्छे या चुङ्सी येहूसे थेदा ह्राङला रथरी थान्जी। येहूसे थेदा “ङादेन छ्याम खउ ओच्छे परमप्रभुदा ङाइ गादे मान लमुला भिबा ताम च्यागो” भिसी पाङ्जी। जमाहेन्से येहूसे थेदा ह्राङदेन छ्यामनोन रथरी थान्सी भोर्जी। परमप्रभुसे एलियादा सुङ्बा बचन अन्छार सामरियारी दोखमाहेन्से येहूसे आहाब ग्लेला बाँकी मुबा जम्मान म्हेमेगदेदा नाश लजी।
बाल लादा तेन्बा म्हिगदेदा साइबा
जमाहेन्से येहूसे सामरियाला जम्मान म्हिगदेदा ग्ला गिकरी ह्रुप लजी, ओच्छे थेसे जम्मान म्हिगदेदा चुह्रङ् भिसी पाङ्जी, “आहाब ग्लेसे मि बाल लादा सेमहेन्सेन आतेन्नी। तर ङाइ चा बाल लादा सेमहेन्सेन तेन्ना। दाहेन्से बाल लाला जम्मान अगमवक्तागदेदा, थेदा तेन्बा जम्मान म्हिगदेदादेन थेला पूजाहारीगदेदा ग्ला गिकरी ङ्योइगो। खालैनोन छुट्याब आतगै। तिग्दा भिसम बाल लाला लागिरी ङाइ घ्रेन बलि लबारी छ्याइबा मुला। जुन म्हि थेरी आख थेदा साइला।” तर चु गे चा येहूसे बाल लादा तेन्बा म्हिगदेदा साइबाला लागिरी जाल लबा मुबा।
येहूसे “बाल लादा मान लबाला लागिरी सभा गिक लउ” भिसी पाङ्जी। चु समाचार येहूसे इस्राएल य्हुल्सा नाङ्नोन पुइजी। जमाहेन्से बाल लादा तेन्बा म्हिगदे गिकएनोन छुट्याब आतना जम्मान थे सभारी खजी। थे म्हिगदे जम्मान बाल लाला मन्दिर न्हङ्री वाङ्जी, ओच्छे मन्दिरला कुनी गिकहेन्से अर्गु कुनीधोना म्हिनोन म्हि तजी। जमाहेन्से बाल लाला मन्दिरला क्वानना जिम्मा किन्बा मूल म्हिदा येहूसे “बाल लादा तेन्बा जम्मान म्हिगदेला लागिरी क्वानगदे भउ” भिसी पाङ्जी। जमाहेन्से थे मूल म्हिसे थेनीगदेला लागिरी क्वानगदे तेःसी भजी। जमाहेन्से येहूदेन रेकाबला झा योनादाब बाल लाला मन्दिर न्हङ्री वाङ्जी। ओच्छे येहूसे बाल लादा तेन्बा म्हिगदेदा चुह्रङ् भिसी पाङ्जी, “क्यारक्युर जम्मान ग्लारी च्यागो, चुरी एनीगदेदेन छ्याम बाल लादा तेन्बा म्हिगदे जे तगै, चुरी परमप्रभुदा तेन्बा म्हि गिकएनोन आतगै।” जमाहेन्से बाल लाला लागिरी बलि लबारीदेन मेरी ख्राङ्सी बलि लबाला लागिरी थेनीगदे मन्दिर न्हङ्री निजी। येहूसे ह्राङला बोगल ब्लि सिपाहीगदेदा चुह्रङ् भिसी कुल्बा मुबा। “एनीगदेसे चुरी मुबा जम्मान म्हिगदेदा साइगो। चुगदे न्हङ्ला गिकदा जे जुन म्हिसे य्हार्पुङ्ला थे म्हिला साटोरी थेला ज्यान निला।”
मन्दिररी बलि लसी जिन्मैछ्याम येहूसे ह्राङला सिपाहीगदेदेन सिपाहीगदेला हाकिमगदेदा चुह्रङ् भिसी कुल्जी, “मन्दिर न्हङ्री निसी थेरी मुबा जम्मान म्हिगदेदा साइगो, थेरी मुबा गिकदाएनोन स्योरआपुङ्गो।” थेतबासेलमा सिपाहीगदेदेन सिपाहीगदेला हाकिमगदेसे थेनीगदेदा तरवारसे ताम्सी साइजी। ओच्छे थे म्हिगदेला लाश मन्दिरग्याम मङ्ग्यार भ्याङ्जी। जमाहेन्से थेनीगदे मन्दिरला जम्मान भन्दा न्हङ्पट्टिला कोठारी निजी। थेनीगदेसे बाल लाला मन्दिर न्हङ्री मुबा लादा मङ्ग्यार तेःसी मेरी ख्राङ्जी। चुह्रङ् लसी येहूदेन येहूला म्हिगदेसे बाल लाला मन्दिरदा फुप्सी छ्याकछिक लसी पिन्जी। म्हिगदेसे तिनीला धिनधोनाएनोन थे मन्दिरदा चर्पि स्होसी थान्बा मुला।
येहूसे चुह्रङ् लसी बाल लादा पूजा लबा ताम इस्राएलग्याम म्हाना लजी। तर यारोबाम ग्लेसे बेथेलदेन दानरी म्हारला म्हे बहरदा पूजा लपुङ्सी इस्राएलदा लपुङ्बा पाप चा येहूसेनोन आख्लानी।3
परमप्रभुसे येहूदा चुह्रङ् भिसी सुङ्जी, “ङाला ओन्छाङ्री जुन ताम ज्यबा मुबा थेनोन ताम एसे पूरा लबा मुला, ओच्छे ङाइ म्हन्बा जम्मान ताम एसे आहाबला वंशथोरी लजी। थेतबासेलमा पुस्ता ब्लिधोना एला सन्तान इस्राएलला ग्ले दोला।” तसैनोन येहू होशियार तसी ह्राङला सेमहेन्सेन परमप्रभु इस्राएलला परमेश्वरला ठिम अन्छार आभ्रनी। ओच्छे येहू इस्राएलला म्हिगदेदा यारोबामसे लपुङ्बा पापगदे ख्लासी परमेश्वरपट्टिएनोन आदोनी।
येहू सिबा
थे धुइरी परमप्रभुसे इस्राएलला साँध घटब लबा सेम लजी। ओच्छे हजाएल ग्लेसे इस्राएलला साँध साँधग्याम लडाइ लबारी शुरू लजी। जमाहेन्से हजाएल ग्लेसे ढासी यर्दन स्योङ्ला स्यारपट्टि परब तबा इस्राएलला जम्मान ग्ला ह्राङला यारी किन्जी। चुह्रङ् लसी हजाएल ग्लेसे इस्राएलीगदेदा ब्रेना लसी गाद, रूबेनदेन मनश्शेगदे चिबा अर्नोन स्योङ् ङाम्ला अरोएरहेन्से गिलाददेन बाशानधोनाला जम्मान ग्ला ह्राङला यारी किन्जी।
येहूसे शासन लबा धुइरी तबा अर्गु तामगदेदेन थेसे लबा जम्मान गेगदेला बारेरी इस्राएलला ग्लेगदेला काइरन भ्रिबा किताबरी भ्रिबा मुला। येहू सिजी ओच्छे थेदा सामरियारी ल्हुजी। जमाहेन्से थेला साटोरी थेला झा यहोआहाज ग्ले दोजी। येहूसे सामरियाग्याम इस्राएलथोरी बोगल गिकसे भ्रे दिङ्धोना शासन लजी।
Source notes (3)
- Cross-reference होशे १:४
- Footnote बेथ-एकेद बेथ-एकेद भिबा चा “गोठालोगदेला पाल” हिन्ना।
- Cross-reference १ ग्ले १२:२८-३०
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.