Skip to content
BibleKenya
SIX Pl 4 Verse

Xoiteupo Kuna

Pl 4

Sini kireni xosikieni nimaririnuku asinaku nanunanu tepu

Pa xati1, yeu xatai xura, ye kunautiai sie, tini Kokaipa xosa sokisokini tumuwa. Yeu xoikemu tini tikiroune xati, tinire ye xoikemu xiri pirixina. Tini paiya yei sokisoki saina tine asinaku sapi tiyai sie xati, tinire ye pani nimaririroune.

Yuotiano Sintikeno, tini iyesaxa. Tini xui axirini Kokaipapu kini xosaupo, pa xati tini kirenini xotikikemuwaxa. Ne2, ne yeu saina emeini kutu, ye ne kanine, ne mua xui aimore tianike. Asinaku kuna uteiwopi saina xosa ninie ye xeika atineri lixeteneai. Klemeni xeika kireu saina emeumana xeikae sini xeika saina teteneai. Pa xokupa kini nikau weniniki paiya ekisikoma puropu nakau xosa purina.

Tini sipesi3 Kokaipaureni nimaririwa. Ye xiyeri kunaune, tini xiri nimaririwa.

Tinie4 xokupa apimi peuni peuni nikari ninie tinipo asinaku kapia xekopineri. Nanuwa. Kokaipa kopure tomuroirouna. Tini5 kire sapire eiyo xaku. Xuwe. Tinipo xokupa xure sipesi Xoiteu kauna. Tini Xoiteu xosa kunikuninari eiyase kuna kaunari, tianitikepinaure kotowa. Xoiteue xosiki yoro6 sini sikirouna paiya, asinaku sapini kutu xati, sini apue paire xotapani kutu sipawopu xana xuwe. Xoiteue kakati tinipo xotikikemu yoroni purinaria, pa kapiae tini Kristusu Yesusu xeika atinari etokaria, tinipo xotikikemu xeika nanunanu xeika atina kutuni puropina.

Xatai xura7, ye kire kuna pani kunawopurexine. Tini xokupa yause suau kapia kirenire nanunari, apimie asinaku kapia kaketeneaire nanunari, kutu kapiaure nanunari, asinaku teteiwoki kapiaure nanunari, sapi xoseixoseire nanunari, asinaku asinaku sapini kuture nanunari, xokupa kapia akerekire nanunari, apimie xokupa kapia kakeri siko apue xekeri xiri nimaririrounuku xeikaure nanuwa. Tini xokupa kapia8 kakakuaire ye uworitikiyai paiya ati siparinuku, xokupa kapiaure ye kuna uteiti tinie iyesinuku pani kakiti xekeukiriai, pa xokupa kapia tini sipesi kakakuai. Kakaria Xoiteu, nu xosikemu yorowopu kapia xotapa, nue tini xeika puropina.

Pilipai apimie Polu xouineri xuru xesaruwoteneaire nimaririwotai

Tinie ye xiyeri tianiyepure nanunanu tari, ye Kokaipa xosa xiri nimaririne. Suau, ekime tinie ye tianiyepure nanunanukiniaina pana, ye tianiyakuai ime xuwe. Ye9 sapiara xuweitauyati mua kuna kunauixe. Xuwe. Ye amu kapiae xosai moatia, ye peuni puropi kapia sipauweitiai. Ye10 xiri xauna purinere e ye xokupa sapi tukuxine rania, ye peuni puriroune. Ye xokupa xoye tukure e ye iriapu puropine, ye xokupa sapi tukure e ye sapiara xuweitauyepina rania ye peuni puropi kapia sipauweitiai. Xokupa sapi ye xosai putawopina, pana ye pani peuni purine xoikemu asinaku xiroune. Kristusue11 ye sokisokirouna xati, nupo sokisokie ye xokupa sapi kakepine itou.

Ye ipaki kunaune tinie ye tianikiriai kapiaure ye nimaririne xitiaia, pa amure, ye xu xemetiai yause xosa tinie ye xeika lixepure nanuworinuku, mua asinaku kapia kakikiriai. Tini12 Pilipaipo xuiapu, takieni sipaukiriai, ye asinaku kuna uteiwopi saina xotapa taiyeine, Mesetonia Propinsi wetitia, kireu Yesusure xonikisurouneri apimie ye xeika lixineri xeara tianineri siepineri kapia xuwexetai. Xuwe. Tini kirenie panumu kakikiriai. Ye Tesalonaika erewese puriyai yause13 xosa, tinie xayaka xayaka xokupa yause tianikiriai. Tini kakixanari nanunari, tinie ye xoi iwakuaire kototikine xaku. Xuwe. Tinipo asinaku kapiae pani kokaipa xati, Xoiteue tini xosa asinaku kapia kakepinaure ye xoieune. Pana14 tinie xokupa sapi Epaprotitusu xuporo iyari kotai paiya ye itou titiai. Kakari ye xokupa sapi tuku xine paie koirotai. Tinie xuru xesawari kotaia xokupa ekeu emeserina. Tinipo xuru paiya Xoiteu xouiwopu sapi asinaku xuri tuku sie, tini Xoiteu tukiriai. Xoiteu xouiwopure panumu kakeria nu panumu tepure xiri nimaririrouna. Yeu Xoiteue15 siko Kristusu Yesusupo xuiapu sikau xokupa sapi asinaku asinaku akituworisiketai. Pa xati tini sapi xuweitautiketaia nukoe xokupa sapi xiri xousokuworitikepina. Xoiteu16 nu sikou Xoiteu nu sikou Emisiki xati, sini nupo wenumu sipesi sipesi xourorepu. Pa suau.

Polue Pilipai apimi kuso kuna tiniketai

Tini Kristusu Yesusupo xuiapu xosa kuso kuna tikine. Ye xeika puroteneai xataimanae, tini xosa asinaku asau xeteneai. Xoiteupo xuiapu xokupae17 tini xosa ipaki kuso kuna kunauneri asinaku asau xeri, Sisaripo atoro saina tirouneri pa apimi kinie, yei tini asinaku asau kuna tikepineure sokisoki kuna kayeteneai.

Kokaipa Yesusu Kristusue xousuaxina xouwesiketai kapiae tini xokupa xosa puropina.

Source notes (17)
  1. Cross-reference 1 Ts 2.19-20
  2. Cross-reference Siri 69.28;Lu 10.20;XKY 3.5; 20.12
  3. Cross-reference Ro 12.12;Pl 3.1;1 Ts 5.16;1 Pi 4.13
  4. Cross-reference Ip 10.25; 10.37;Ye 5.8-9;1 Pi 4.7;2 Pi 3.8
  5. Cross-reference Asin 16.3;Mt 6.25-34;Lu 12.22-31;Kl 4.2;1 Pi 5.7
  6. Cross-reference Ais 26.3;Yo 14.27;Ro 5.1;Kl 3.15
  7. Cross-reference Ro 12.17
  8. Cross-reference Ro 16.20;1 Ko 14.33;Pl 3.17;1 Ts 5.23;Ip 13.20
  9. Cross-reference 1 Ti 6.6-8
  10. Cross-reference 1 Ko 4.11;2 Ko 6.10; 11.27
  11. Cross-reference Yo 15.5;2 Ko 12.9-10;2 Ti 4.17
  12. Cross-reference 2 Ko 11.9
  13. Cross-reference YT 17.1
  14. Cross-reference XT 29.18;Ese 20.41;2 Ko 9.12;Ep 5.2;Pl 2.25;Ip 13.16
  15. Cross-reference Siri 23.1;2 Ko 9.8;Ep 1.7
  16. Cross-reference Ro 16.27;Ka 1.5
  17. Cross-reference Pl 1.13

Xoiteupo Kuna. Copyright © 2024 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.