Skip to content
BibleKenya
SIX Kl 1 Verse

Xoiteupo Kuna

Kl 1

Kristusu nu xokupa sapi nikau tapuniki xati, Xoiteupo xokupa ekeoma xeika kapia xeika nu xosa koxineri

Kl 1.1—3.4

Ye1 Polu, ye Kristusu Yesusupo tianuwopi. Xoiteu nukoini ye xouweina Yesusupo tianuwopi tumuyeretai. Yeu xatai Timotino sinie2 mua nakau tini Xoiteupo xuiapu Kolosi erewese purikiriai xosa xayaritikinuku, paiya tini xatasikimana ukusikimanae Kristusu xosa xotikisukiriai xosa. Sikou Emisiki Xoiteue tinire xousuaxati xouwetikatia tinipo xotikikemu yoroni purakuai.

Kolosi kinie Yesusure xiri xonikisuneri

Sini kunikuninua paiya3, sipesi tinire nanunanunua Xoiteu eiyaseurounua, nu sikou Kokaipa Yesusu Kristusupo Omo. Sinie4 muanumu kuna tinire iyesikiria, asinaku kunapu suau kuna tini xosa koati tinie iyeserinuku, pa asinaku sapi Xoiteue tini akituworitikina mena xouro iyarati purotai tepure tini xotikisukiriai. Pa xati tinie Kristusu Yesusure xiri xotikisunuku Xoiteupo xokupa xuiapu xosa xotikikemu tinikirounuku. Xokupa wese wese ninie mua asinaku kuna uteiwopi saina teri, xokupa xuiapue xonikisuneri taineri, ninipo kapia asinaku xetai. Ximuximu akereki asau xosa Xoiteue xousuaxati xouwesiketai asinaku kuna tinie iyesinuku xiri sipawari, panumu kapiani tini xopu xosa yaraxetai. Epaprasie5 mua asinaku kunapu kuna tini taitaitikati, tinie sipauweikiriai. Epaprasi nu Kristusupo asinaku saina apu. Nu sinipo saina emesiki xati, sinie nu xiri xosikieurounuku. Nue tini tianitikina Kristusupo saina atinani tirouna. Xoiteupo xuiapu xiri xouwenikepi kapia Xoiteupo Supo Youyae tini tikeyaire nue sini kasietai.

Xoiteue Kolosi kini sokisoki nikepinaure Polue kunikuniwotai

Pa xati6 ximuximu akereki asau xosauni, tinipo asinaku kapiaure iyeserinua, Xoiteue tini xouwetiketai atinarini kutu sipawakuaire sipesi sinie kunikuninua Xoiteue tianitikepinaure kotourounua. Kakikiri Xoiteupo Supo Youyae asinaku asinaku sipa xeika nanunanu xeika tikatia paie tini xosa xiri xokopexepina. Kakati7 tinie Kokaipapu xuiapuni kutu nikau kapiarei texaria, tinipo xokupa kapia xouwewopina. Kakatia tinie xokupa asinaku asinaku saina takuai. Kakinari Xoiteu sipaunaria, pa sipae pani sipesi kokaipa xepina. Sinie8 ipaki kunikunirounua, nukou kokaipa sokisoki asinakuni xosa, Xoiteue tini xokupa sokisoki tikatia, tini sokisoki tumunari xokupa xu xemenaria, peuni purinari xu xuwexepineri yause yakuwakuai. Kakatia tinie nimaririeinari Emisiki eiyasewakuai9. Nukoe tini akituworitikeyai asinaku asinaku sapi takuaire, nukoe kakati tini asinaku asinaku kapia taikiniai. Xoiteupo xokupa xuiapu nini nukou memeremu xosa puroteneai xeika pa asinaku asinaku sapi tini takuai. Sini10 ukumupo sokisokipo iru xosa purikiri, nue xiyeri tisikina nukou Nonopu kini xosa iyaisikeretai, pa Nono paiya nukoe xiri xouweurouna. Xoiteupo Nono nukoe11 sini xiyeri isayasikina sikou xokupa xunu weterisikeyai.

Polue Kristusupo kapia xeika saina xeikaure kunawotai

Sini12 Xoiteu xekopusie itou xuwe, pana Xoiteupo Nono nu Xoiteu nuko sieni. Nu Xoiteupo akereki Nono xati, Xoiteu nukoe xokupa sapi iyareyai xiri tapaxi purina. Pa Nonopu xuporei13 Xoiteue xokupa sapi mena xouro xeika ouro xeika xosa iyareyai. Nue xokupa sapi xekopu xuweu xeika xekeurounuku sapi xeika iyareyai, paiya xetauxetau sokisoki xenikorokoro xeika sokisoki youya xeika xokupa sapi sokisoki tuku xeika iyareyai. Nukoe xokupa sapi nukouni iyareyai. Mua xokupa sapi putawopu xuweu yauseni14, nu puroyai. Nue kakati xokupa sapi ati purineri xirini atineri saina tirouneri. Nue15 tapaxina Yesusure xonikisuneri tairouneri xuiapu yakunikirouna xati, nini paiya nukou mupokemu. Nu paiya ninipo ekenikioma xotapa. Akerina kopa upuropu xiyeri saroyai apu nuko, pa xati nukoini xokupa sapi tapatapaxi puropina. Xoiteue16 pa Nono xosa nukou xokupa ekeoma xeika kapia xeika puropinaure xina, pa xati Xoiteu nukoini nu xosa xiri xokopexina. Kakina17 Xoiteue nu xeika xokupa sapi xeika xokumo iyarepurexetai, paiya ouropu sapi xeika mena xouropu sapi xeika rania kakepina. Pa xati Kristusu wetati na nikitoto xosa xumati, nupo yawi kusawati, pa kapiae Xoiteue sinipo xiwai kapia ororetai.

Tini ekime18 Xoiteu nutiemu puropu xuwe. Tinipo nanunanue, nu xiwaixiwainuku, xoxixoxi kapia tepi saina tikiriai. Pana19 Kristusue na nikitoto xosa xumotai xati, pa kapiarei Xoiteue tini nu xeika xotiki tumaretai. Nukou ekero tini Xoiteupo xuiapu sieni purinari muputiki teteiwoki purinari xu xuweu purakuai xati, tini nuko xosa sotiki kopure nu kaketai. Xoiteue20 sikou asinaku kunaure kasikekeyai sie tini tinipo xotikisu xosauni kutu puropi puropinari, atapu xai sie sokisoki tumuwaria kire sapie pa asinaku sokisoki kuna yaku purikiriaire tini purutikepuwatixe. Ye Polu ye mua asinaku kunapu saina apu saitiai xati, sinie mua ouro puroteneai xuiapu xosa kuna uteikiriai.

Polue Kolosi kini tianiketai

Ximine21 tini tianitikepure tatau xemeropi nimaririne. Ye Yesusure xonikisuwoteai xuiapu tianikepurexine. Nini nukou mupokemuni. Kristusue Yesusure xonikisuwoteneai xuiapu tianikepure tatau xemerotai paiya xuwe xatixe. Paina ikoe ikou mupi xosa xemetiai tatau paiya, Kristusupo tatau xousokuwopure ye kakitiai. Xoiteu22 nukoini ye tumuyerati tini tianitikepure Yesusure xonikisuwoteneai nikau saina apu xitiai. Pa xati ye Xoiteupo xokupa kuna atinei uteiwopine saina tuku. Ekime23 xokupa yause paiya mua kuna ximiaki purati, paire xokupa xuiapu kinie sipawopu xuwe. Pana muaia Xoiteupo xuiapu ekinikiro yarani putawotai. Xoiteu24 nukou xouweni kakina, mua ximiaropu kuna sini nukou xuiapu atarisikatia, sini sipaunuku, mua kuna xiri asinaku xati paie xokupa xetau xuiapu kini tianikepina xepu. Mua ximiaropu kuna paiya muai. Kristusue tini xopu purinana, sotiki xowati nuko xeika purinari nukou asinaku asinaku sapi mena xouro purotai takuaire nu yakuwa. Sini25 xokupa kireni kireni apu xosa Kristusupo asinaku kuna uteirounuku. Sinie asinaku nanunanu xeika sipa xeika tainuku taitainikinuku sokisoki kuna tinikirounuku, pa amure, ninie Kristusu sokisoki taiwopinerire xinukuna, nini kakineria Xoiteu xosa xowopineri. Pa xati26 Kristusue xokupa kokaipa sokisoki ye sirouna xati, mua saina tepure ye xiri irereiroune.

Source notes (26)
  1. Cross-reference Ep 1.1
  2. Cross-reference Ro 1.7
  3. Cross-reference Ep 1.16;Pl 1.3
  4. Cross-reference Mk 4.8; 16.15;Yo 15.16;Ep 1.15; 3.2;2 Ti 4.8;Pm 5;Ip 6.10;1 Pi 1.4; 5.12
  5. Cross-reference Kl 4.12;Pm 23
  6. Cross-reference Ro 12.2;1 Ko 1.5;Ep 1.8-9; 1.15-17; 5.10; 5.17;Pl 1.9
  7. Cross-reference Yo 15.16;Ep 2.10; 4.1;Pl 1.27;1 Ts 4.1;Ip 13.21
  8. Cross-reference Ep 1.19; 3.16; 4.2
  9. Cross-reference Ep 1.11; 1.18
  10. Cross-reference Lu 22.53;Ep 2.2;1 Ts 2.12;2 Pi 1.11
  11. Cross-reference Ep 1.6-7
  12. Cross-reference Yo 1.18;2 Ko 4.4;Ip 1.3
  13. Cross-reference Yo 1.3; 1.10;Ro 8.38; 11.36;Ip 1.2; 2.10;1 Pi 3.22
  14. Cross-reference Yo 1.1-3; 8.58; 17.5;1 Ko 8.6
  15. Cross-reference YT 26.23;1 Ko 15.20; 15.23;Ep 1.10; 1.22-23;XKY 1.5
  16. Cross-reference Yo 1.16; 3.34;Kl 2.9
  17. Cross-reference Ro 5.1;2 Ko 5.18;Ep 1.7; 1.10; 2.13; 2.16;1 Yo 2.2
  18. Cross-reference Ro 5.10;Ep 2.12; 4.18;Ta 1.15-16
  19. Cross-reference Ep 2.14-16; 5.27;1 Ts 4.7;Ta 2.14
  20. Cross-reference Mk 16.15;Ep 3.17;1 Ti 3.16;Ip 3.14
  21. Cross-reference Ro 5.3;2 Ko 1.5-6;Ep 1.23; 3.13;Pl 3.10;2 Ti 1.8
  22. Cross-reference Ep 3.2; 3.7-8
  23. Cross-reference Ro 16.25-26;1 Ko 2.7;Ep 3.3-5; 3.9-10;2 Ti 1.10
  24. Cross-reference Ro 9.23;2 Ko 2.14;Ep 1.18; 3.8;1 Ti 1.1
  25. Cross-reference Ep 4.13; 5.27
  26. Cross-reference YT 20.20; 20.27;Ep 3.7; 3.20;Pl 4.13

Xoiteupo Kuna. Copyright © 2024 Pioneer Bible Translators. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.